Perfect Sense 2011

في عالم حواس البشر بتنتهى فيه بالتدريج بسبب الحروب والتلوث، طباخ وعالمة أوبئة بيكتشفوا آخر حاسة بتحسسنا إننا لسه بشر، الجنس

حمدي الوزير كان هينبسط أوي في فيلم زي ده

If Only 2004

"أيان" و"سامنثا" بيحبوا بعض، بس بعد خناقه، "سامنثا" بتعمل حادثة، هيحصل إيه لو عندك فرصه تانية تلحق تتصرف بشكل مختلف مع الشخص اللي بتحبه قبل ما تفقده مره تانية للأبد؟

تسمحيلي بتاني رقصة تسمحيلي بتاني فرصة؟ 

P.S. I Love You 2007

زوج ميت بيساعد زوجته انها تحب، وتعيش بسعادة من خلال جوابات كتبها قبل ما يموت، ده أطيب من ماما كريمة.

On Body and Soul 2017

قصة حب بين محاسب عنده ايد معاقه، ومراقبة جودة عندها متلازمة آسبرجر، شغالين في سلخانة، وبيتشاركوا أحلامهم كل ليلة، الرومانسية في وسط رؤوس البقر المدبوحة، بس حلو والله جو حب في السلخانة ده.

Upside Down 2012

سمعت عن قصص حب مستحيلة كتير، لكن أكيد عمرك ما سمعت عن قصة بين شخصين من عالمين مختلفين، متضادين حتى في قانون الجاذبية، نيوتن زمانه بيشتم في قبره، مشيها بيشتم.

The Age of Adaline 2015

بنت اتولدت في العشرينات، حصلها حاجة في 1933 خليتها خالدة، لأكتر من 80 سنة، وحبت شخص يمكن يخليها تتخلى عن الخلود وتعيش معاه لكن في الآخر فتحت السمكة اتفرج بقى على الفيلم عشان تعرف لقت الخاتم ولا لاء

50First Dates 2004

تخيل بتصحى كل يوم الصبح، تلاقي اللمبي بيقولك انت مين ياض، مش فاكرك ياض، وتضطر توقعها كل يوم في حبك، لإنها هتنسى تاني يوم. دي فرهدة وربنا سيبك منها يابني وهجوزك بنت خالتك.

Eternal Sunshine of the Spotless Mind 2004

هيحصل إيه لو لقيت شركة ممكن تمسحلك ذكرياتك، وتنسى الشخص اللي تعبك؟ وكل ماضيك القذر؟

Warm Bodies 2013

ينفع زومبي وبنت عادية يحبوا بعض؟ جربوا ونفع.

The Lake House 2006

صديقك بالمراسلة اللي بقالك فترة بتتكلموا طلع مش عايش معاك في نفس الزمن، أبعاد متوازية مش شغل عفاريت ما تقلقش

Ghost 1990

ده بقى شغل عفاريت، رغم انه اتقتل، بس روحه فضلت تحرس حبيبته لحد ما يطمن عليها من الخطر اللي بيلاحقها، أصيل يا أبو نسمة

In Your Eyes 2014

اتنين بيشوفوا من خلال عينين بعض، تخيل أكنك بتشوف اللي بيشوفه شخص تاني على بعد آلاف الكيلومترات عنك، اكنك مركب كاميرا في عينك، غمض عينك بقى لما تعمل حمام، مش لازم حد يشوف الحاجات دي

Ruby Sparks 2012

كاتب بيخلق شخصية بنت كبطلة لروايته، لكن بيقع في حب البطلة اللي كتبها، أنا بحب البطلة دي تحسها بريئة كده، عموما ياريت تعمل أفلام كتير.
 

City of Angels 1998

بهيرة معرفتش تتجوز بهير عشان طلع ملاك، بس طبعا دي كانت اشتغالة، لكن الفيلم مش اشتغالة، هيحصل إيه لو بنت وملاك حبوا بعض؟ فيلم من أيام ما نيكولاس كيدج كان بيعمل أفلام حلوة، وميج رايان كانت حسن حسني بتاعهم، راشقة في أي فيلم رومانسي.

Love Me If You Dare 2003

الجرأة حلوة مفيش كلام، بس مش هقول ع الفيلم ده أكتر من كده، شوفوه بس وهتتبسطوا.

Lars and the Real Girl 2007

علاقة حب بين رايان جوسلينج وعروسة لعبة، في أوروبا والدول المتقدمة بيعملوا كده، افضلوا انتوا يا بنات تنفضوا للانبوكس، آدي النتيجة.