• اكتب معانا
  • ماتنسناش
  • تابعنا
الموضوع اللي جاي
حوار مع رامي يوسف بطل مسلسل "رامي" الحاصل على الجولدن جلوب
الموضوع اللي فات
حفلة أونلاين لجورج وسوف يوم الخميس 9 يوليو

ليه احتاجت 10 سنين عشان أقدر أحكي عن 15 دقيقة اتحولت فيهم لضحية اغتصاب؟

سلمى الورداني، كاتبة و مذيعة bbc وناشطة، بتحكي عن تجربة مؤلمة شبه تجارب بنات كتير مستنيهم يتكلموا
سلمى الورداني
تحذير المحتوى ده فيه تفاصيل واقعة اغتصاب.

سلمى الورداني، كاتبة ومذيعة بي بي سي وناشطة، بتحكي عن تجربة مؤلمة شبه تجارب بنات كتير مستنينهم يتكلموا، ومستنين دور الرجالة اللي في إيديهم يغيروا واقع بتعيشه ستات كتير:
 

من فترة طويلة جدًا كنت بقول للناس إني كنت على وشك التعرض للاغتصاب، عشان أقدر أتكلم عن اللي حصل، وبرضه ماقدرتش أتكلم. عشان أعترف إن مرة وأنا ماشية بالليل راجعة بيتي، راجل شدني ولمدة ربع ساعة، حياتي فيها اتغيرت للأبد. أنا حتى ماقدرتش أصرخ لما ده كان بيحصل. أنا فاكرة إني كنت بحاول أنطق، فاتحة بوقي ومستغربة إزاي مفيش كلمة بتطلع مني.

كنت بشتغل في جزيرة يونانية في الصيف ده، والشخص الوحيد اللي حكيتله كل اللي حصل بالتفصيل هو ضابط الشرطة لما بلغت عن اللي حصل في اليوم اللي بعده. كانت محادثة مؤلمة جدًا وأنا بحاول أستخدم إنجليزي مكسر عشان أوصف إزاي راجل حاول يعمل كده فيا وفضل قد إيه يعمل ده.

مش عارفة لو فيه حد حاول يشرح لظابط شرطة "راجل"، الإنجليزي بتاعه ضعيف، إزاي حد قدر يستخدم صوابعه في إنه يدخلها في جسمك وهو بيحاول يمسكك ويحطك في المكان الصح عشان يقدر يغتصبك، بس هي عملية مؤلمة. استخدمت إشارات الإيد، ورسمت صورة في "مكان محدد" بس الظابط ماكنش فاهمني والأمر كان صعب. وقعدت في أوضة رمادية في جزيرة يونانية صوت البحر تحتي كان بيكسر الصخور، في الوقت اللي كانت فيه حاجات جوايا بدأت تتكسر بالبطيء.

العالم مابيسهلش على الستات فكرة إنهم يتكلموا ببساطة عن الاغتصاب. بطريقة أو بغيرها الغلطة غلطتك

التجربة دي أخدت من 10 سنين عشان أقدر أحكي اللي حصل في اليوم ده بشكل كامل، لإن العالم مابيسهلش على الستات فكرة إنهم يتكلموا ببساطة عن الاغتصاب. بطريقة أو بغيرها الغلطة غلطتك. اختيار لبسك هيكون مؤضع تساؤل وشك، وهتتسئلي ليه كنتي بتتمشي لوحدك؟

الستات دايمًا بيتعرضوا للإساءة، للإدانة، للخزي، للتلاعب بيهم، وفي الغالب الناس بتعتبر اللي بنحكيه ده أكاذيب، ولو قعدنا في نقاش عن الدين والسياسة واللون، وكان صعب نتكلم،  فعواقب إننا نتكلم عن الاعتداء الجنسي هتكون أكبر والعواقب هتكون مُدمرة. ولو قلنا إن الاغتصاب هيسبب خراب، فالستات هي اللي هتقف في الأنقاض دايمًا، في الوقت اللي الرجالة هيعيشوا فيه مش متأثرين بحاجة ومبسوطين.

حكاية أحمد بسّام زكي في مصر، المتهم حاليًا باغتصاب أكتر من 100 بنت، كتير منهم قاصرات، هي مثال حي على مدى الحرية اللي هتتمتع بيها كونك راجل في العالم ده. لما المجتمع يكبر ويزدهر على مبدأ "الصمت" والستات يعيشوا على المبدأ ده، كأنه هو الصح، والمؤسسات متتعاملش مع إدعاءات الاعتداء على محمل الجد، يبقى احنا بنخلق جو مثالي عشان الجريمة تزيد، والستات هيزيد وصمها وإحساسها بالخجل، والصمت هيكون أقوى.  والرجالة اللي بنعتبرهم "كويسين" أو أخيار، بيدعموا الصمت ده لما بيسمعوا كلمة "اغتصاب"، لإنهم ببساطة وكالعادة مابيحسوش بارتياح تجاه المناقشة دي، وده اللي بيخلي الست تعتمد على نفسها في التعامل مع الموضوع ده.

ده بالظبط اللي الستات بتعمله في القاهرة، بسبب فشل الأنظمة اللي المفروض تدعمهم. عشان كده الستات بيتعاملوا مع الموضوع بنفسهم وبيشاركوا قصص بعض، قصة ورا قصة، وده اللي حصل في قصة أحمد زكي. بنات بيعملوا منصات لمشاركة تجاربهم، بالصور والأدلة، وبيجمعوا أكبر كم من الدعم من كل العالم وصولًا لإجبار المؤسسات الأكاديمية بشكل جماعي إنهم ياخدوا إجراءات ضد "زكي" عشان نستخدم القانون في مكانه الصح، وهو توفير العدالة.

الصمت والسكوت بيتكسروا لإن الستات دول وصلوا لنقطة الانهيار، واحتاجنا لشهادات أكتر من 100 ست عشان نوصل للنقطة دي ويقدروا يكسروا الصمت ده. احنا دايما بنفضل الضحايا يبقوا عدد كبير عشان نصدقهم. حملة #MeToo بتقولنا بوضوح إنك لو ضحية وعاوزه كلامك يتاخد بجد، لازم يكون وراكي جيش من الستات اللي بيرددوا نفس القصة، ساعتها بس هتتسمعي. ده بيقولنا قد إيه الستات بتحارب في قضية غير عادلة بس، بس حال المتهم أحمد زكي بتقولنا إننا نقدر رغم كل حاجة.

لازم نحافظ على شجاعتنا ونفضل نحكي كل القصص المؤلمة والصعبة وغير المريحة اللي بنمر بيها

مصر دلوقتي عند نقطة التحول ووصلنا لحافة التغيير. في أمل إن الواقع ده يختلف لكن الوصول للأمل ده مش هيكون سهل. مطلوب جهد كبير من الرجالة والستات، يعني كلنا لازم نكون سوا في المعركة دي. بالنسبة للستات في للأسف ده معناه إنكم هتشتغلوا أكتر وهتتعبوا أكتر، لازم نكون كلنا سوا وندعم بعض. لازم نحافظ على شجاعتنا ونفضل نحكي كل القصص المؤلمة والصعبة وغير المريحة اللي بنمر بيها. لو الرجالة بيرتكبوا سلوك إجرامي في حق الستات، فده بيحصل لما الستات يكونوا ساكتين. فلو قدرنا نكمل ونكسر حاجز الصمت ده بشكل مستمر، هنقدر نغير حاجات كتير. بالنسبة للرجالة فآن الآوان إنهم يقوموا بدورهم فعلا ويشيلوا الحمل التقيل. لازم تحاسبوا الرجالة اللي بيعملوا ده ولازم تقفوا مع الستات بدون جدال أو شروط، لازم تكونوا جزء من التغيير.

أنا بقالي سنين بتكلم على فكرة إن الرجالة لازم ينضموا للستات في المعركة دي، لكن الكلام ده مش بيكونله أي صدى، فهحاول أشرح الموضوع للرجالة بطريقة تانية. عزيزي الراج أنت المشكلة، أنت مش جزء من المشكلة ولا بتدعمها، لا أنت المشكلة نفسها. أنت يا بتغتصب يا بتتحرش يا بتعتدي على الست أو تتحرش بيها وكل ده لأسباب واضحة مش هدخل فيها. أنت كل ده. وفي حالة لو كنت فعلا ماعملتش أي حاجة من دي، فأنت عملت نفسك مش سامع قصص الانتهاكات والعنف اللي بتحصل حواليك، تجاهلت وقولت وأنا مالي مش مشكلتي. بتركز على نفسك بس في كل قصة وبتنسى الألم اللي بتتعرضله الستات، واستخدمت الدين كمبرر ليك عشان تتعاطف مع كائنات أقل ما يقال عنهم إنهم حيوانات. بتردد كلام طول الوقت زي "لازم نسمع الجزء بتاعه من القصة ولازم نشوف هو هيقول إيه ويبرر ازاي". فشلت في دعم الستات عشان ياخدوا حقوقهم أو قررت تتجاهل الموضوع تمامًا. لو أنت أي واحد من دول أو عملت أي حاجة من دي، يبقى لازم تعرف إن أنت المشكلة.

أنا مقدرة إنه مش سهل تتكلم عن العنف الجنسي والتحرش والاغتصاب في القاهرة، دايمًا هتلاقي حد بيجيبلك سيرة الدين، ويقولوا البنات المحترمة المتدينة مش هتعمل كده

أنا مقدرة إنه مش سهل تتكلم عن العنف الجنسي والتحرش والاغتصاب في القاهرة، دايمًا هتلاقي حد بيجيبلك سيرة الدين، ويقولوا البنات المحترمة المتدينة مش هتعمل كده، أنا شخصيًا عندي قرايب رجالة بيمشوا ويسيبوا الأوضة لو بدأت أتكلم، فعشان كده انا عارفة إن الموضوع صعب، بس ده الوقت عشان نتكلم، الاغتصاب مش حاجة سهلة ومش فسحة!

الصمت اللي بيتكسر دلوقتي في كل حتة في مصر مش هيكون ليه تأثير دائم وحقيقي إلا لو اتكسر معاه صمت الرجالة كمان، عشان يبقى تغيير حقيقي ومؤثر مش مجرد نقطة في التاريخ لما الستات قالت حاجة، لازم الرجالة ينسوا التحزب لجنسهم ويجربوا يسمعوا الستات عشان يتم محاكمة كل المغتصبين والمتحرشين ومعاقبتهم، عشان زي ماحنا عايزين كستات نحل المشكلة دي، الحل مش في أيدينا، الحل في ايد الرجالة اللي لازم يبدأوا يعملوا حاجة.

سلمى الورداني

Home
خروجات النهاردة
Home
Home