• اكتب معانا
  • ماتنسناش
  • تابعنا
الموضوع اللي جاي
وزارة الثقافة: عودة العمل في 16 مكتبة بالمحافظات من أول يوم الأحد 5 يوليو
الموضوع اللي فات
الإعلان عن شكل وسعر الكمامات القماش اللي هتنزل على بطاقة التموين

من تخريب وتشويه لأهم متحف في منطقة مصر الجديدة.. اتفرج على قصة قصر البارون

اتبنى في القرن ال19 ومفيش فيه عفاريت ولا حاجة
قصر البارون

أكيد سمعت عن قصر البارون، لكن غالبا مادخلتوش قبل كده، بسبب إنه كان مقفول لفترة طويلة. من سنتين الحكومة المصرية قررت تعيد ترميم القصر وتفتحه كمتحف للزوار، ومع بداية شهر يوليو كان المتحف جاهز من جديد. بمناسبة انتهاء ترميمه وإعادة افتتاحه، اتعرف على قصة قصر البارون من يوم ما اتبنى في القرن ال19 ولغاية النهاردة، وشوف الفيديو عشان تتفرج على معالم القصر.

القصة كالآتي: البارون إمبان هو مهندس بلجيكي جه مصر في القرن الـ19، اتفق مع الحكومة المصرية على بناء حي في شرق القاهرة اللي هو حي "هليوبوليس"
وهناك صمم قصره وبدأ يبنيه سنة 1907 وخلصه في ٤ سنين. القصر مستوحى من عمارة المعابد الهندوسية. ومتصمم بطريقة تخلي الشمس تدخل كل أوضة فيه.

سطح القصر كان مصمم لإقامة الحفلات وبيتم الصعود ليه بسلم مصنوع من خشب الورد. على السطح كان في برج بيلف، البارون كان قاعد جواه وقت
ما "هيلانة" أخته وقعت من البلكونة، بيقال إن من وقتها اتوقف برج القصر عن الدوران بسبب غضب روح أخت البارون!

طبعا القصر اشتهر بخرافات كتيرة عن وجود أشباح وعفاريت وده بسبب إنه كان مهجور واتعرض للتخريب ووناس بقت بتعمل فيه حفلات وتكتب على الحيطان.. إلخ. لحد سنة 2007 لما الحكومة المصرية عوضت ورثة البارون بأرض جديدة واشترت القصر، ومن سنتين بدأ ترميمه بتكلفة حوالي 175 مليون جنيه.

القصر دلوقتي بقى متحف لمنطقة حي هليوبوليس وجاهز للزيارة. تذكرة دخوله للمصريين 20 جنيه و 10 جنيه للطلبة و50 جنيه لبانوراما القصر اللي بتطل على حي مصر الجديدة كله.

Home
خروجات النهاردة
Home
Home