"هند عيارى" أول ست اتهمت حفيد "حسن البنا" الإسلامي السويسري "طارق رمضان" بالاغتصاب ورفعت عليه قضية، اتحطت تحت حماية الأمن بعد ما وصلها تهديدات وشتايم. كانت "هند" قدمت شكوى، ضد مجهول، بتهمة التهديد والسب يوم 16 نوفمبر.

"هند" تونسية فرنسية وسلفية سابقة اتحولت لناشطة نسوية علمانية، وبقالها فترة بتتعرض لمضايقات وسب من خلال رسايل الفيسبوك وتويتر، ووصل الموضوع لحد باب بيتها. بيتقال لها إنها "عاهرة" و"متأجرة من الصهاينة" عشان تشوِّه صورة الداعية "طارق". محاميها قال: "الأمر ليس بسيط، هذه الوقائع عقوبتها يمكن أن تصل إلى السجن ثلاث سنوات، يجب أن يتوقف الأمر".

الخطوة الجريئة اللي عملتها "عيارى" ساعدت ضحايا أكتر على فضح "طارق رمضان"، من بينهم "ياسمينة" اللي قالت إنها سبق ونشرِت تفاصيل جريمته على الإنترنت سنة 2013، وإنها بدأت تتكلم معاه في نصايح دينية على شبكات التواصل الاجتماعى، بعدها طلب منها صورتها عشان يعرف بيكلِّم مين. "بعدها وجدنى جميلة، ومنذ ذلك اليوم، الأربعاء، انحرفت الأمور بيننا واتخذت شكلا إباحيا" زي ما قالت.

وغير "هند" و"ياسمينة"، ذكرت صحيفة لوباريزيان الفرنسية فى تقرير ليها وجود ضحية تالتة رفعت على "طارق" قضية. رفضوا نشر اسمها، قالوا بس إنها ست عندها 42 سنة واعتنقت الإسلام وعندها إعاقة فى الرجلين. التحقيقات شغَّالة دلوقتي بخصوص اتهام "طارق" بـ "الاغتصاب والاعتداء الجنسى والعنف والتهديد بالقتل" بعد رفع اتنين ستات شكاوي ضده.