• اكتب معانا
  • ماتنسناش
  • تابعنا
الموضوع اللي جاي
"صندوق العيلة" مبادرة جديدة من "لافاش كي ري" عشان تسلينا واحنا في البيت
الموضوع اللي فات
تخصيص مبنى بنادي الجزيرة للحجر الصحي لمصابي فيروس كورونا

في اليوم العالمي لأمراض الأمعاء المناعية: أمير عيد بيدعم حملة لمساعدة المرضى

التشخيص المبكر للمرض بيفرق كتير
"بنحب الحياة" حملة جديدة للتوعية بأمراض التهابات الأمعاء المناعية

في الوقت اللي العالم كله بيعاني فيه من فيروس كورونا، وتأثيره علينا كلنا سواء أصحاء أو مصابين، سواء كبار أو أطفال، من تعطيل لحركة الحياة والعزل المنزلي، فيه ناس بتعاني من أمراض تانية مختلفة ومحتاجين دايمًا للدعم وإيد تساعدهم، منهم مرضى التهابات الأمعاء المناعية واللي مضطرين يفضلوا في البيت، عشان كده في اليوم العالمي لأمراض التهابات الأمعاء المناعية واللي بيوافق 19 مايو، تم إطلاق حملة جديدة لمساعدة ودعم المرضى، وهي حملة "بنحب الحياة" بمشاركة الفنان أمير عيد.

"بنحب الحياة" هي حملة للتوعية بأمراض التهابات الأمعاء المناعية "داء كرون" وإلتهاب القولون التقرحي" تقوم بها الجمعية المصرية لأمراض التهابات الأمعاء المناعية وهي جمعية علمية غير هادفة للربح بيقوم بادارتها مجموعة من الأطباء المتخصصين في الجهاز الهضمي، الحملة برعاية شركة جانسن مصر، إحدى شركات جونسون اند جونسون للأدوية.

أمراض التهابات الأمعاء المناعية مش مرض معروف أو شائع، بس يعتبر واحد من أمراض المناعة اللي ممكن تسبب التهاب مزمن في الجهاز الهضمي.
طب إيه هي أعراض المرض؟ المرض له أعراض زي الإسهال، البراز الدموي، آلام البطن، التقلصات.. ومن أعراضه كمان الإرهاق وقلة الشهية وفقدان الوزن.

ناس كتير بتخلط بين أعراض أمراض التهابات الأمعاء المناعية وبين القولون العصبي. بس المرضين مش زي بعض وفيه اختلاف ما بينهم، زي إن القولون العصبي مش بيسبب الإلتهاب في الأمعاء، وأنسجة الأمعاء ما بتتأثرش زي ما بيحصل في التهاب الأمعاء المناعي.
كمان من أعراض التهاب الأمعاء المناعي إن المريض بيعاني من الإسهال الشديد.

مرضى التهابات الأمراض المناعية يُفضل دايمًا إنهم يكونوا في البيت وياخدوا بالتدابير والإجراءات الاحترازية الخاصة بالصحة والسلامة، وينتظموا على أدويتهم، بالإضافة لإنه يُفضل إنهم يبعدوا عن العوامل اللي هتسبب لهم توتر اللي بالتبعية بيأثر على تهيج أعراض المرض.

التهابات الأمعاء المناعية زي أي مرض.. التشخيص المبكر بيساعد المريض يبدأ رحلة علاجه ويعرف هيمشي إزاي على نظام يساعده يتعايش مع المرض بخلفية كافية عنه، التشخيص المبكر المصاحب للأدوية الفعّالة ممكن جدًا يمنع أعراض المرض من إنها تتضاعف وتوصل لجراحة أو عجز.
التشخيص المبكر كمان بيساعد في تحسين الحالة النفسية وبيمنع التوابع السلبية اللي بيسببها المرض لو تم اكتشافه متأخر.

بس أنت مش لوحدك.. مبادرة "بنحب الحياة" اللي مكونة من مجموعة من الأطباء المتخصصين هدفهم زيادة الوعي بالمرض ده في مصر، ورفع الحالة المعنوية للمرضى وتشجيعهم، خلوا للدعم أشكال مختلفة، زي إنه يكون من خلال صفحة الحملة على فيسبوك، واللي موجود عليها كل المعلومات المهمة بالنسبالهم عن المرض وإزاي يقدروا يتعايشوا معاه.

ومش صفحة على فيسبوك وبس، الحملة ليها خط ساخن وهو 16689 وجاهز لاستقبال مكالمات المرضى لمساعدتهم وإزاي يقدروا يشخصوا مرضهم في أسرع وقت وإزاي يتعاملوا معاه.

"حياة مريض الكرون صعبة جدًا.. صعب يخطط لأي شيء"، "أسهل حاجة لو حد شاكك في الأعراض دي إنه يروح يكشف"
بالجمل دي بيعبرلنا أمير عيد عن دعمه لمرضى التهابات الأمعاء المناعية، "أمير" واحد من الشخصيات العامة اللي دعمت الحملة بجانب أطباء الجمعية المصرية لالتهابات الأمعاء المناعية اللي بيساعدوا المرضى خلال رحلة علاجهم وبيقدم نصايح للمرضى عشان يشجعهم على التشخيص المبكر.

أمراض التهابات الأمعاء المناعية مرض زي أي مرض لُه نظام علاجي، والتشخيص المبكر لِيه والأخذ بنصايح الأطباء والانتظام على الأدوية بيساعد في السيطرة عليه، فلو حسيت في أي وقت إن عندك أي من أعراض المرض ماتترددش في إنك تكشف وتطلب المساعدة وهتلاقي الدعم المطلوب.

اعرف أكتر عن المبادرة من صفحتهم على فيسبوك من هنا  

Home
خروجات النهاردة
Home
Home