تتفرج على فيلم هندي؟

لا يا عم مش عايز أشوف أنا ناس بتطير وواحد شبه أدهم صبري بيحرك أطرافه الأربعة في آن واحد بطريقه عجز علماء التشريح عن تفسيرها، ويقتل 80 بني آدم بموزة علشان حبيبته اللي ما بيعرفش يتجوزها في الأخر علشان طلعت أخته، والختم على كتفها ما شافوش غير لما البلوزه اللي لابساها اتنتشت من توكتوك ماشي في الشارع، فييعيط وياكل الموزة وينتحر.

تقريبًا دي هتبقى إجابة معظم الناس لما تسألهم السؤال ده، على الرغم من التطور اللي اتطورته السينما الهندية واللي وصل كذا فيلم منها للعالمية.

طبعا لسه في أفلام فيها الناس اللي بتطير، لكن اللي الناس ما تعرفوش إن كلها مش من إنتاج بوليود، وإن في جهة إنتاجية مهمة جدًا في الهند اسمها Tollywood، وهي بتنتج أفلام باللغة البنجابية مش الهندية. إنتاج الهند السينمائي حاليًا أكتر من ربع الإنتاج السينمائي في العالم، والتوسع ده اللي إدى فرصة للصناعة إنها تلاقي مواهب عظيمة في التأليف والإنتاج والموسيقى. علشان كده جبنالك 8 أفلام هندي، بس مش بالشكل الهندي التقليدي اللي في دماغك، من غير أفورة يعني، بس لسه فيهم كل الاستعراضات الجميلة والألوان اللي بتخلي عينينا تتبسط.

1- Taare Zameen Par

ما اعتقدش إن في حد هيختلف معايا على إنك لما تحاول تختبر ( قرد وفيل و سمكة وفرخة) بإنك تطلب منهم يطلعوا شجرة، فده ظلم للجميع بما فيهم القرد، اللي تفوقه في الحالة دي بقى زائف. ده نوع الاختبارات اللي بنخوضها على مدار حياتنا الدراسية بسبب نوع الدراسة اللي ما بيهتمش بالفروق الفردية للأطفال.

الفيلم بيتكلم عن طفل عيلته مش عارفين يتعاملوا معاه، لإنه مختلف عن الشكل التقليدي اللي اتعودوا عليه. بيروح المدرسة بيقابل نفس الصعوبات، الطفل بالنسبالهم في حكم الغبي أو المتخلف عقليًا لإنه ما بيقدرش يعمل الحاجات البسيطة اللي كل الأطفال بيعملوها بسهولة، لحدما بييجي مدرس جديد بيقدر يحدد شخصيته عامله ازاي، وبيقدر يحدد موهبته وطريقة التعامل الأفضل معاه.

الفيلم متصنف من أفضل 250 فيلم على موقع imdb.

2- The Lunchbox 
أوقات بنركب القطر الغلط، لكن بنقابل فيه ناس وبنوصل محطات بتغير حياتنا، أجمل ما لو كنا أخدنا القطر اللي بنتوهم إنه صح. بتتغير حياة ست بيت ومحاسب على بعد أيام من إنه يطلع على المعاش ويسيب الشغل، لما بتوصله علبة أكل من الست بالغلط بدل ما توصل لجوزها، رغم وجود نظام دقيق ومعقد جدا علشان غلطة زي دي ما تحصلش، لكن الصدفة الواحد في المليون بتحصل، الموظف بيبعتلها رسالة في علبة الأكل الفاضية، بتفضل الرسايل ما بينهم وبتطور الأحداث. الفيلم إيقاعه مختلف جدًا عن إيقاع الأفلام الهندي، مش هتلاقي استعراضات ولا الألوان اللي متعودين عليها، ايقاعه أشبه بالأفلام الأوروبية الهادية الجميلة، ومدة الفيلم ساعتين وده وقت قليل بالقياس للأفلام الهندي.

3- Slumdog Millionaire
واحد من أجمل الأفلام في القايمة ويمكن من أجمل الأفلام على الإطلاق. فاز ب 8 جوائز أوسكار. الفيلم إنتاج أمريكي، ودي الحاجة الوحيدة الأمريكية فيه، لكن كل ما دون ذلك هندي. بيتكلم على طفل من أطفال الشوارع في رحلته للوصول لحبيبته اللي اتفرقوا من سنين، لكن الموضوع عامل زي التدوير على إبره في كوم قش، قرر إنه يشترك في برنامج من سيربح المليون، واحد من أكتر البرامج شعبية في العالم، علشان أكيد حبيبته هتكون بتتفرج عليه. يمكن كل الألم اللي مرينا بيه في حياتننا متبطن رحمة، كفوف الزمن اللي علمت على قفانا وارد تكون في لحظة من اللحظات هي السبيل الوحيد للنجاة، هتفهم لما تتفرج على الفيلم، وتسمع مزيكته العظيمة

4- Three Idiots
أول مرة اتفرجت عليه كنت كل شوية أبص ناقص قد إيه من الفيلم علشان مش عايزه يخلص، واحد من أجمل أفلام "أمير خان" ومن أجمل أفلام السينما الهندية عمومًا. بيعرض فشل طريقة التعليم اللي قايمة على الحفظ وسباق مستمر على الدرجات، من خلال طالب في هندسة بيفكر بشكل مختلف بيغير من حياة كل اللي حواليه بما فيهم مدرسينه.

 
5- PK
الفيلم التالت ل "أمير خان" في القايمة. كائن فضائي بينزل في رحلة استكشافية للأرض، بتتسرق منه وسيلة اتصاله الوحيدة بمركبته، فبيبدأ يدور يوصلها ازاي، لكنه بيدور في مدينة من أكبر مدن العالم في الكثافة السكانية، فكل ما حد يسمع قصته يقوله ربنا هو الوحيد اللي يقدر يساعدك، فيحاول الكائن الفضائي يوصل لربنا بخلفية محايدة تمامًا على الفطرة. تصرفات المنتمين للأديان بتوقعه في حيرة بسبب اللي بيتكلموا باسم ربنا، الفيلم من أهم أفلام السينما الهندية.

6- My Name Is Khan
“My Mama always told me: There are only two kinds of people. Good people who do good things and bad people who do bad things”

واحد من أشهر الأفلام الهندية على مستوى العالم ومن بطولة النجم "شاروخان"، بتدور أحداثه بعد هجمات 11 سبتمبر 2001. "رضوان" قرر إنه يعمل رحلة لأمريكا علشان يقول للرئيس الأمريكي إن اسمه خان وإنه مش إرهابي، رضوان مصاب بالتوحد، وطريقه للرئيس كله مصاعب وأعاصير"حرفيًا"، وإثبات إن العالم بكل أديانه ما ينفعش يتقسم إلا لقسمين، ناس بتعمل خير وناس بتعمل أذى.

7- Guzaarish
الفيلم اللي يعتبر النسخة الهندية من الفيلم الإسباني "The Sea Inside"، شخص مصاب بشلل تام بيمنعه من إنه يقدر يهش دبانة وقفت على وشه، كل اللي بيربطه بالعالم نفس خارج وطالع وعينين بيقدر يشوف بيهم اللي في مستوى نظره، وصوت كله أمل وحياة بينشر بيهم الأمل لملايين المستمعين في الراديو، لكنه بيطلب حقه في الموت الرحيم، وبيرفع قضية على الحكومة علشان يقدر ياخد الحق ده. بتتعاطف معاه صديقته اللي بتساعده في كل تفصيلة في حياته لكنها ما تقدرش توافقه على الموت وتوافق ازاي وهي روحها متعلقه بيه، الفيلم غريب برغم كل المعاناه والألم الإنساني اللي فيه، إلا إنه جميل ومليان مزيكا، ماحدش يقدر يعمل ده إلا الهنود.

8-Zindagi Na Milegi Dobara

لما تكون عينك بتلمع، قلبك مليان شغف وإثارة، بينبض بسرعة زي ما يكون في طور هايج بيجري وراه، ساعتها تقدر تقول إنك عايش حقيقي، لكن ما تقدرش تقول إنك عايش لمجرد إن في نفس داخل وخارج وأنت حبيس كل مخاوفك وماضيك وتجاربك السيئة. شلة من 3 صحاب واحد فيهم قرر إنهم هيسافروا سوا لإسبانيا في أجازة إجبارية يتحدوا فيها كل مخاوفهم، وإنهم يرجعوا تاني يختاروا اللي عايزينه من الحياة مش اللي مجبرين يعملوه.

"