• اكتب معانا
  • ماتنسناش
  • تابعنا
الموضوع اللي جاي
الإمارات ثالث اكتر دولة قابلة للتغيير على مستوى العالم
الموضوع اللي فات
موقع Lonely planet: خليج دبي من أفضل 10 أحياء في العالم

ليه بنحب السبكي؟

مين ده اللي يذلني يا محمد يا رمزي

موسم العيد بيجي وبيجي معاه الأفلام اللي أغلبها بيكون إنتاج السبكي، وبيتحول لموسم شتيمة السبكي، ""امنعوا الأفلام دي""، ""السبكي السبب في التحرش""، ""آلاف قدام السينمات وقليلين في الجوامع"".. وكلام كتير بينتهي كله في الآخر إن عيلة السبكي السبب في فساد أخلاقنا، وضياع شبابنا، وحروب فلسطين والعراق وسوريا، وهو اللي أكل الجبنة.

وأنت ماشي في شارع التحرير هتلاقي جزارة السبكي، من هنا كانت بداية الحكاية، لما فتح أحمد السبكي نادي فيديو فوق محل الجزارة واتحول بعد كده النادي ده لشركة تسويق الأفلام الأجنبية في مصر، وبالوقت بقى شركة تسويق وإنتاج، في البداية كانت شركة ""السبكي"" واحدة، وبعدين بقى أحمد السبكي ليه شركته المنفصلة عن محمد السبكي وكل واحد ليه أفلامه. الحقيقة أنا عندي أسباب كتير لحب العيلة دي، يمكن أفلامه مش هي المفضلة بالنسبالي، بس عادي مانا مابحبش سينما هوليوود في كتير من الأحيان، بس مش بشتم صناعها.

"صنايعي"

في حوار سابق مع سلوى محمد علي، قالت: إن في وقت من الأوقات اللي شال السينما 2، السبكي والأفلام المستقلة، لأن أهم حاجة في السينما هي العمال ولو مالاقوش شغل هيسيبوا السينما ومش هيبقى عندنا صناعة.

الناس تقريبًا مابتاخدش بالها إن الفن ""شغل""، هو فن آه بس شغل، فمافيش حاجة اسمها ماينفعش تقبل شغل مع المنتج ده، لأن الفنان ده بني آدم طبيعي جدًا ومحتاج فلوس زي غيره.

كتير بيكرهوا "السبكي" علشان جزار، مش فاهم سينما وبيزعق وبينتج حاجات ""شعبية"" ومابيهتمش بالفن، بس الحقيقة الراجل ده هو اللي قوم الصناعة في وقت ماكانش فيه إنتاج في السنة كلها غير أفلامه، وهو اللي خلى الناس تكمل شغل في السينما والسينما متقفش. الأكتر من كده، إن هو اللي خلى الجمهور يقف بالأيام والليالي قدام السينمات علشان يتفرج على أفلام بعد مالناس كانت نسيت نجوم الشباك، واللي يقف مرة علشان فيلم في نظرك –هابط- ممكن جدًا يجيله يوم ويقف علشان فيلم واخد جايزة كان! ماحدش بيتولد بيتفرج على فيللني يعني.

مين قال إن كل أفلامه هابطة؟

السبكي دخل الإنتاج في التسعينات، ومن وقتها لحد النهارده أنتج أفلام كتير، منها مثلًا سواق الهانم، وحلق حوش، ومنها الفرح وكباريه اللى كانوا من أحسن أفلام الألفية الجديدة، فنظرة إن أكيد الأفلام دي هابطة مش صح، بالعكس ممكن يكون منها أفلام ماعندناش زيها تاني.

السينما مابتفسدش الأخلاق

الناس بتشتم في الشارع من قبل السينما دي، والتحرش موجود علشان أخلاقنا مش علشان فيلم فيه رقاصة ولا أغنية شعبي، والجمهور عايز كده علشان ده ذوقهم مش علشان السبكي. أفلام المقاولات موجودة في كل الأجيال، بتخلي صناعة السينما مكملة ومستمرة وبنفتكر بعد ما تخلص الأفلام القيمة بس، ولنا في أفلام السبعينات عبرة.

ملحوظة: نص نجوم أفلام المقاولات بنقول عليهم دلوقتي ""فنان قدير"" وبننسى إن أفلامهم كان فيها مشاهد لو اتعملت دلوقتي هنجلد صناعها.

الأهم من كل ده بقى إننا ماينفعش نطالب بمنع فيلم، علشان لو منعنا مرة السبكي علشان بيبوظ الأخلاق، هنمنع غيره علشان سياسة، وهنمنع غيره علشان رقصة، وهنمنع غيره علشان فكرة، وهندخل دايرة مش هنخرج منها أبدًا.

ماحدش قال إن السبكي "سينمائي" شاطر، هو مش فاهم فن يمكن، ويمكن كمان مايهمهوش من الفيلم غير الفلوس اللي بيصرفها ويكسبها، لكن منعه مش هو الحل، طول الوقت في كل سينمات العالم فيه أفلام تجارية وأفلام فنية وماحدش بيطالب بمنع دي، زي ما فيه أفلام الأكشن والخبط والرزع فيه أفلام بتاخد أوسكار، وأفلام كلها مزيكا. وكل الأفلام مهمة علشان صناعة السينما تفضل مستمرة.

بنحب السبكي علشان بيساهم في الصناعة، ولو عايز تحاربه ادخل الأفلام المنافسة ليه، ماتفضلش تكتب على الفيسبوك تطالب بمنعه، علشان ده هيضر الصناعة وهيقعد ناس في بيوتها ومش هيلاقوا أكل ولا شغل.

الموضوع عن عيلة السبكي أحمد ومحمد، بس محمد السبكي مالوش صور غير اللي بيشتم فيها عشان كده الصورة هنا للحاج أحمد السبكي بس.

Home
خروجات النهاردة
Home
Home