أحمد سبايدر، اللي ظهر في 2011 وكان بيفك شفرات الإعلانات والبرامج التليفزيونية وحتى لبس عساكر الأمن المركزي، اتفرج على فيلم الأصليين وشافه بعيون استكشافية غير عيوننا و جاي ينوّرنا.  سبايدر عمل حلقة كاملة في برنامجه "مع أحمد سبايدر" على قناة LTC،  لفك رموز وشفرات فيلم الأصليين اللي طلع "ماسوني".

في عالم عادي زي عالمنا، لما تطلع منة شلبي عندها 33 سنة في الفيلم دا معناه إنها عاشت 33 سنة، مش كدة؟ لكن في عالم المؤامرة وعالم أحمد سبايدر ده دلالة على أعلى رتبة في الماسونية اللي هي 33 زي سِن منة شلبي على حسب كلامه، صدفة دي؟ مش بس كدة، نضارة الشمس اللي لبساها منة شلبي في بوستر الفيلم بتثبّت التهمة عليها، لأن الماسونية هي "العين التي ترى كل شيء"، يعني منة شلبي بتمثل الماسونية ف الفيلم والتهمة لابساها من نضارتها للتاج اللي فوق راسها في البوستر التاني.

أحمد سبايدر واثق من كلامه وبيتحدانا نقرا كويس عن الماسونية الأول علشان نتناقش معاه. سبايدر بداية ظهوره كانت على السوشيال ميديا في 2011 ودلوقتي بيعرض برنامج على قناة LTC  كل يوم حد الساعة 4 العصر.