مفاجآت السعودية ما بتخلصش، المملكة اللي قعدت سنين طويلة رافضة وجود أي كنيسة فيها، بناءً على فتاوى رجال الدين المقربين للسلطة، لكن مع التغييرات الجديدة، يمكن الإدارة في السعودية شافت إن الوقت جه يغيروا سياستهم تجاه الكنايس، رغم إن الكنيسة هي كنيسة أصلًا مبنية من 900 سنة، وإنها مش هيتصلى فيها بس أهي بداية.

الكنيسة اللي هيتم ترميمها معروفة باسم كنيسة الجبيل، وتم اكتشافها سنة 1986 في منطقة الجبيل في السعودية، واللي فاضل من الكنيسة هو الصحن وتلات هياكل، ودول اللي المفروض هيترمموا، الترميم نفسه يعتبر هدية من ملك السعودية للبطريرك الماروني مار بشارة بطرس الراعي بطريرك أنطاكيا وكل المشرق للموارنة.

المعلومات على الإنترنت ما بتأكدش موضوع ال 900 سنة وفي معلومة بتقول إنها كانت كنيسة بريطانية بتستخدم من البحارة البريطانيين والأوروبيين اللي سفنهم كانت بترسي في جدة، وإن عمر الكنيسة 100 سنة بس. لسه لحد دلوقتي مافيش أي تأكيد رسمي من الحكومة السعودية، لكن الخبر منتشر على السوشيال ميديا ومواقع الأخبار ومنهم رويترز.