مين بينحت مين؟ مهرجانات مشهورة مسروقة من أغاني الراب
"بص أنا أول مرة سمعت فيها مهرجان كان سنة 2011 كنت لسه نازل القاهرة و كان في واحد اسمه شبح عين شمس عامل فيديو على فيسبوك مغني فيه المقطع بتاعي في أغنية لو فاكرين و المقطع بتاعي في أغنية تيك تاك وربط الاتنين في بعض وعاملهم أغنية واحدة" دي كانت أول مرة شاهين العبقري من فريق الواي كرو يسمع مهرجان ويعرف إن كلماته اتسرقت، بس مش اخر مرة تتسرق فيها كلمات، لكن بعدها سمع مهرجانات لناس مش معروفة سرقوا كلمات تانية زي اغنية "عايز ينحرف ليه" لفريق الواي كرو بس للاسف المهرجانات دي تاهت وسط زحمة المهرجانات والكم المهول اللي بينزل منها، وبياخد من أغاني تانية، لكن بقى موضوع معروف إن فن المهرجانات بياخد كلمات من الراب.
زي ما حصل مع فريق ايجي راب سكول في تراكه جنس ناعم -رغم عيوب التراك ثقافياً بس ده مش موضوعنا هنا- لكن ده ما منعش إن اوكا واورتيجا يسرقوا الكلمات ويعملوها أغنية ليهم وده يوضح نقطة مهمة خرافة فكرة "لغة الشارع" اللي مأخوذة عن المهرجانات وإن المهرجانات هى لغة الشارع عشان كده نجحت رغم أن أغلب المهرجانات في البداية ولحد يومنا ده بتاخد الكلمات من الراب عشان تعمل مهرجانات ناجحة.
يعني لو حصل إن اللي بيكتب لتامر حسني اخد كلمات من عمرو دياب الدنيا هتقوم وهيكون فيه قضايا وتعويضات وغرامات، لكن تحت الارض الموضوع مختلف مفيش قوانين تحمي الملكية الفكرية في الراب فده بيخليه معرض للسرقة بشكل مستمر، غير إن جمهور المهرجان اكتر من جمهور الراب و عدد الجمهور بيدي مصداقية للمهرجان عن الراب، ورغم ان مفيش حاجة تحمي الحقوق الفكرية للرابرز، لكن هما بيقرروا يطبقوا العقاب بنفسهم بأغنية أو بوست فيسبوك زي ما حصل مع باتيستوتا وعلاء فيفتي لما اتاخدت كلمات تراك "هصور قتيل" لنفس الشاعر اللي كتب مهرجان "اسمعوا كلكلو"
كلمات باتيستوتا بتقول " من غير استغراب هتغلط فلازم تدوق العقاب" و كلمات الروبي اللي كتب مهرجان فيفتي بتقول "من غير استغراب لازم تدوق العقاب" الكلمات متاخده بالنص بس متاخدة بالطريقة يعني القوافي و المعنى لكن حذف كلمة "هتغلط" عشان تقفل صح مع الدرامز في المهرجان.
مفيش حاجة تقدر تحمي بها كلماتك غير انك تروح تسجلها في الشهر العقاري مثلا بس مين عنده وقت يعمل كده في كل تراك بينزله؟
عدد التراكات اللي بتنزل كل يوم كتير جدا و محدش عنده الوقت ولا الفلوس إنه يدب مشوار للشهر العقاري الزحمة جدا يسجل تراك بيسمعه عدد قليل في مصر ده غير ان مفيش ربح من وراء التراك اصلا، عشان كده الرابر بكون مضطر انه يشهر ويقول "امسك حرامي"، زي ما باتيستوتا قال عن علاء فيفتي اليل رفض يمسح الأغنية، فاضطر باتيستوتا إنه يدخل معاه حرب موسيقية ويعمل عليه "دس"، اللي هو الهجاء بالراب.
"يا بيه لو كل واحد عزل عشان تحتيه رقاصة البلد كلها هتبات فى الشارع" الكلام ده تقدر تطبقه على المزيكا خصوصًا تحت الارض، لو كل واحد عمل دس عشان واحد سرق منه كلمات البلد كلها هدس بعض و خصوصاً ما بين المهرجانات و الراب. و الغريب ان مشهد المهرجان عارف انه بيسرق من الراب و عادي جداً حتى لو سرق من رابر مشهور زي ابيوسف في تراكه سوبر مان اللي اتسرق و بقى مهرجان سوبر مان و الأكثر غرابة انهم كاتبين كلمات "حسن نجم" يا بجاحتك يا اخي!
السؤال بقى تفتكر في حد في مصر يقدر يحمى الراب من السرقة ؟ يعني اوكا و اورتيجا ينفع يطبق عليهم عقاب بسبب السرقات المتكررة لهم في مشهد الراب؟ ينفع يتم المنع من الحفلات بسبب انهم بيسرقوا كتير فين حد السرقة في المزيكا ولا لازم تكون عضو في النقابة ومسجلها في الشهر العقاري عشان تحمي نفسك ؟
موضوع ان المهرجان يسرق من الراب كلمات موضوع متكرر جدا و فيه اللي نعرفه و اللي منعرفوش بس مين سامع و لا مين بدافع ولا بيعمل حاجة اصلا و خرك تعمل اغنية تشهير وبرضه مفيش نتيجه زي الدس اللي نزل على علاء فيفتي من رابر دينيو.
لكن في سؤال الصراحة لازم نسأله في القصة دي بشكل عام هل مغني المهرجان بكون عارف ان الشاعر اللي كاتب له المهرجان سرق الكلمات من تراك راب و لا لاء ؟ لو عرف ايه رد فعله؟ و هل مغني المهرجان عنده استعداد يخش في حرب مع الرابر ولا لأ وعلى حسب كلام علاء فيفتي "لا طبعاً انا مش بتاع دسات انا بتاع شارع و غير كده معنديش وقت عشان عندي حفلات و شغل كتير"
