أفضل 10 رابرز مصريين ظهروا في 2018
أي فترة بتمر في أي مشهد موسيقي، لازم يكون في جيل جديد لسه بيتولد، في الراب المصري سرعة ميلاد الرابرز دائمًا كبيرة وده عيب وميزة، الميزة إن في نشاط وإقبال دائم على الراب أما العيب هو إن بيكون في خسائر كتير، زي الأغاني الوحشة اللي ممكن تنفر الناس من الراب، أو إن في أغاني حلوة مالهاش جمهور. ورغم الصعوبات اللي ممكن تواجه أي رابر في بداية مشواره، لكن في رابرز جداد قدروا يثبتوا وجودهم. دي قائمة بعشرة رابرز "جداد" ظهروا بقوة في 2018 وليهم مستقبل كويس في المشهد ده. القائمة بدون ترتيب.
عمر من القاهرة وعنده 19 سنة، نزل أول تراك له من 4 أو 5 شهور مع بروديوسر اسمه Batistuta، التراك اسمه "زي منا"، التراك حلو، مش عشان أول تجربة موسيقية له، بس عشان في صوت جديد مميز عن الموجود، وعشان يتميز أكتر، كان لازم ينوع ويشتغل مع بروديوسرز تانيين مميزين زي NEON.
من القاهرة مواليد سنة 2000 يعني عنده 18 سنة وده السن اللي معظم الرابر بتبداْ فيه. KEO بداْ بقاله خمس شهور بتراك مع رابر HVRPY وكان يعتبر تجربة وبداية عادية، لكن في تراك تاني مع HVRPY بدأ يرسم الشكل اللي عايز يظهر بيه وده واضح جداً في آخر تراك له باسم MVP بمعنى "MAP" من إنتاج البروديوسر Kingoo Beats
SVGX بمعنى "savage X" رابر وبروديوسر طازة، ده لسه أول تراك له. هو من القاهرة عنده 16 سنة، أنتج أول تراك له، بيعمل إنتاج موسيقي معتمد على الغموض وإثارة الفضول عند اللي بيسمع، كمان التراك مش مجرد راب عادي وهتلاقي فيه mysterious sound. ده بيخلي المستمع فضولي وعايز يسمع أكتر عشان يعرف هو عامل إيه غريب.
استحواذ القاهرة والإسكندرية ومدن القنال على الراب المصري، خلى باقي المدن (زي وجه قبلي) تفقد الأمل إن صوتها يتسمع، رغم الرابز الجامدين في الصعيد ووجه قبلي، برشحلك منهم Sweeket من أسيوط وعنده 21 سنة، وكمان المنتج HAZARDV من أسيوط برضه، يعني اكتفاء ذاتي ومستوى حلو جدًا.
دودزي من السويس من فريق 6ixn9ne اللي أسسه مادو سام. دودزي عنده 20 سنة، مايعتبرش جديد، بس نقدر نقول إن كل اللي فات لدودزي هي مجرد محاولات للبحث عن شكل يقدر يميز بيه نفسه في مشهد الراب خصوصاً إنه من خارج القاهرة، ودي مهمة مش سهلة صعبة في ظل عدم توفر الإمكانيات بس هو مستمر في محاولاته.
من مدينة المنصورة، اللي طلعت MC AMIN ،mohamed osama، و SLYVER PV، عنده 18 سنة وبدأ سنة 2016، وزيه زي غيره في المشهد بيحاول يوصل لأفضل شكل ليه، وشايف إن أفضل شكل ده إن يكون في غنا مع الراب عشان يكون سهل البلع بالنسبة للجمهور.
بدايته تحت اسم MC Hashim من سنة تقريباً، من القاهرة وعنده 16 سنة، يعني بدأ وهو عنده 15 سنة، فطبيعي إن نضجه الفني لم يكتمل، بس عنده استعداد يفضل يجرب ومش مهم عدد المستمعين، هو لحد دلوقتي عنده 12 تراك بس لسه بيحاول يوصل لصوته الخاص.
عنده 18 سنة من القاهرة، بدأ من سنة في تراكات راب "راب مُحن"، زي تراك "مش عايزها"، لكن مع التطور اللي حصل في مشهد الراب المصري وسيطرة المدرسة الجديدة على المشهد، كان طبيعي إنه يخوض تجربة جديدة.
رابر من القاهرة عنده 17 سنة، واحد من حركة THE SHOTTAS HipHop Movement اللي فيها رابر زي KEO وآخرين، رغم إن فكرة ال movement ماتت في ثقافة الهيب هوب، بس هنا في مصر ليها معنى تاني قايم على فكرة دعم الراب عشان الراب في مصر لسه في مرحلة الحضانة رغم التطور الموسيقي. HVRBY صاحب نبرة صوت مميزة بتساعده يخلق حالة صوتية مختلفة.
في مدن في مصر بتعاني بسبب قلة الإمكانيات غير التهميش نتيجة سيطرة مدن معينة على الموسيقى في مصر، بس عندك رابز زي Arsenik من أسيوط، بيمثل وجهة الراب في الجنوب وقرر يحط أسيوط على خريطة الراب في مصر، حسب كلامه يعني.
