• اكتب معانا
  • ماتنسناش
  • تابعنا
الموضوع اللي جاي
ماسبيرو هيعمل متحف بيضم أقدم المقتنيات الإذاعية في مصر والوطن العربي
الموضوع اللي فات
الأمم المتحدة: 7 دول عربية في قائمة البلاد الأكثر جوعًا في العالم

10 أغاني هتخليك تحب الراب العربي

أمجاد يا رابرز يا عرب أمجاد

الراب دخل فرنسا في بداية التمانينات وطبعًا معروف إن في اختلاط ثقافي ما بين فرنسا ودول المغرب العربي، اللي يهمنا هنا هو إن الراب انتقل من فرنسا للمغرب العربي في بداية التسعينات. كان في رابرز مميزين جدًا، زي "مسلم" في المغرب وفريق "أم بي اس" في الجزائر، وبدأ الراب ينتشر في باقي الدول العربية ووصل لبلاد الشام سوريا وفلسطين والأردن ولبنان، وكمان دول الخليج زى السعودية والكويت وقطر.

الراب العربي من أكبر المشاهد الموسيقية تحت الأرض في المنطقة، وتميز بقى بشوية حاجات زي التأثر بثقافة المنطقة من ثقافة دينية واجتماعية وتراث، كمان تأثر بالموسيقى العربية والشرقية في الإنتاج الموسيقي. الحاجة الوحيدة اللي ممكن تكون ساعات مشكلة هي اختلاف اللهجات، بس دي مشكلة حلها إنكم تقروا الكلمات و تفسروها، عادي يعني ما تحبكوهاش بقى.

البلاي ليست دي عشان تاخد فكرة عن المشهد العربي في الراب مش أكتر.

1- أجرمن عنهن - مسلم هديب

رابر ورسام أردني، مسلم صنع حالة تميزه في المشهد بكل اللي بيعمله، من أول إنه بياخد الطرب العربي لمنطقة جديدة عليه وبيدخل عليه التراب، ومش هنقول دمج، لكن هو بيعمل اللي عايزه بالمعنى الحرفي للكلمة من غير ما يدي أي مسميات. ألبومه الجديد بالاشتراك مع رابرز زي الوسام وكريست والألبوم  كله إنتاج TheArchiducer. بعد ما تتفرج على الفيديو اسمع "أنا رسام الأحاسيس".

2- دلوني - بو كلثوم

رابر سوري ولكن هو في الأصل هو بروديوسر وأصدر البومه السنة اللي فاتت تحت اسم "بعبع" واشترك في الألبوم ناس زي مي مراد وشيبوبة وفيني باز الرابر الأمريكي. بو كلثوم زي ما قال في حديثه معايا إن هو قافل على البومباب، بس ده ما يمنعش إنه برضه بيعمل حاجات مختلفة، زي ما قال إنه ناوي يعمل حاجات تانية وتكون بعيدة عن الراب، زي أغنية "زملوا" وأغنية "ترحال"، وهي أغاني عربي عادية، مجرد غناء بس.



3- لاول - السينابتيك

رابر أردني ودكتور، وده بقى أمر عادي إنك تلاقي رابر عربي بس له وظيفة بعيدة عن المزيكا. "السينابتيك" له أغاني كتير مميزة، بس التراك ده هو أكتر تراك علق مع الناس، بسبب الكلمات المناسبة لطريقة الأداء وكمان "بدر عازم" المعروف باسم "وي كيدز"، هو بروديوسر التراك و قدر يصنع مزيكا صنعت مساحة للسينابتيك عشان يعرف يستغل صوته بالشكل ده. في أغاني تاني بحب اسمعها زي الشيخ طاووس مثلا.

 

4 - موسم الضباع - الراس

رابر وبروديوسر لبناني. اما تسمع تراكات الراس هتشوف تقل في المحتوى الكتابي والموضوع نفسه، لكن اللي يخفف العمق ده على المستمع هو الإنتاج الموسيقى للتراك ككل، مش مجرد مزيكا، فكرة في شكل صوتي منسجم كله مع بعض. موسم الضباع من أكتر التراكات المفضلة ليا عشان بيقدم حالة بمقاييس مختلفة عن اللي يقصده هو في الأغنية. الرأس شغال على الألبوم الجديد بتاعه ونزل فيديو جديد باسم "هات".

5- فايت باك - أسلوب ونيسم

إيه اللي ممكن يحصل اما Jazz يقابل الهيب هوب؟ هو ده اللي حصل لما الرابر الفلسطيني أسلوب المقيم في فرنسا، قابل بنت اسمها نيسم سورية فرنسية، ملحنة بتعزف فلوت وناي وخلقوا مشروع غنائي باسم "الآخرين" وأنتجوا البوم بنفس الاسم وقدروا يخلقوا  نوع موسيقى غير منتشر في الوطن العربي وعملوه صح، للأسف هو نوع صعب جدًا على ودان المستع. المزيكا دي مش سهلة على المستمع العادي، بس تجربة غنائية متميزة جدًا، تستحق إنك تسمعها.

6- هملنة - شب جديد والناظر

من رام الله، الرابر "شب جديد" مع البروديوسر "الناظر" بيقدموا صوت مميز ومختلف في الراب العربي. من وجهة نظري إن المهم في أي مشهد موسيقي إنك تميز نفسك عن الموجود من الأول، وده لوحده بيخلق نوع من المزاج الموسيقي المختلف اللي يخلي المستمع يرجع لك كل شوية عشان يشوف إيه اللي نزل، بسبب إعجابه بالتميز.

7- ربي يحاسبكم - كلاي ببي جي

بدأ "كلاي" مشواره في المشهد التونسي سنة 2010 وأثبت وجوده بكل قوة. الفكرة كلها في الاستمرارية، بمعنى إنه عرف يفضل مستمر لحد النهاردة، ودي أصعب حاجة مع التطور السريع للمزيكا وخصوصا التراب ميوزيك، لكن كلاي وارماجيدون قدروا يعملوا هوك يعلق في ودانكم، أول ما تخلص التراك تفضل تردده

8- واش كاين - شايفين

الراب تقريبا أول ما تطور لمرحلة التراب كان في المغرب قبل أي مكان تاني في الدول العربية وخصوصًا في موضوع التصوير واستخدام الاوتوتيون، وعلى طول المغرب في تطور متلاحق، يعني التصوير ده من سنة، و مع ذلك نقدر نقول إن المغرب هي أكتر دولة بتعمل فيديوهات راب صح جدًا ومناسبة للزمن ده. فريق شايفين متميزين في الفيديوهات، عشان كده كل أغانيهم فيديوهات.

9- حكمت عالشعبي - فريق ام بي اس

فريق ام بي اس (الحروف أسماء الفريق معناها الميكروفون يبرز السكات) من أوائل الناس اللي عملت راب في الجزائر. أما تسمعوا الأغنية حطوا في دماغكم إن الأغنية معمولة في سنة 1999 قبل ما يكون في راب في مصر، والممتع في الأغنية هي اللازمة، بمعنى استخدام نبرة الصوت بالشكل ده والخروج عن المألوف والمعتاد في الزمن ده، مجازفة صعبة جدًاً.

لو المشكلة معاك هي اللهجة، الموضوع سهل، دور على الكلمات وأنت تفهم الناس دي سنة 1999 كانت بتتكلم على إيه في الجزائر. المزيكا الأندلسية تأثيرها واضح في اللحن الأساسي للأغنية، مع الاحتفاظ بالشكل الإيقاعي للراب، وده طبيعي عشان الموسيقى الأندلسية فرضت نفسها في منطقة المغرب العربي.

10-  راب فيتنس - ليندا بلاك هارد

لازم نختم البلاي ليست دي بواحدة بنت، عشان نقاوم المجتمع الذكوري اللي عايشين فيه، والأغنية دي اللي هتسمعوها هتثبت إن مافيش فرق بين راجل والست في المزيكا أو في أي حاجة أصلا. ليندا عملت تراك هجومي من حيث قوة الإلقاء والأداء الثابت والتحكم في الانفعال، بحيث مايكنش مبالغ فيه، في نفس الوقت تحافظ على فكرة الأنوثة اللي هي بتمثلها في الراب وإن الراب مش حكر على جنس دون الآخر.

Home
خروجات النهاردة
Home
Home