• اكتب معانا
  • ماتنسناش
  • تابعنا
الموضوع اللي جاي
امتحان موحد أونلاين لكل الدكاترة في مصر
الموضوع اللي فات
فيلم "ورد مسموم": ازاي الرمزية الزيادة هتخلي فيلمك فاشل؟

"ده مش صوت من بُقي دي مزيكا بجد": حوار مع ملوك الـ BeatBox في مصر

ممكن تعمل أغنية كاملة بالبيت بوكس

نظرة الجمهور للمزيكا بتنحصر في إنها لازم تطلع من عازف بالمعنى الحرفي، اللي هو واحد قاعد بيلعب آلة موسيقية، وإن اللحن والإيقاع أو النغمة لازم تطلع من آلة موسيقية معزوفة، زي الجيتار أو الأورج والبيانو والدرامز.. إلخ، بس لو الصوت الموسيقي طلع من أي مصدر تاني زي البيت بوكس BeatBox، اللي هو واحد بيعمل مزيكا من بوقه،  يبقى هبل وحاجة مالهاش معنى، أو تتصنف كموهبة خارقة مكانها في السيرك. رغم إن البيت بوكس BeatBox فن معترف بيه وجزء من ثقافة الهيب الهوب "Hip-Hop"، بس الناس بتعتبره تفاهة أو مش فن مستقل، مع إن في أغاني كاملة ممكن تتعمل بالطريقة دي.

وباعتبار البيت بوكس  جزء من الراب، فهو بداْ كإيقاع طبلي، لحد ما تطور لدرجة إن في ناس قدرت تعمل أصوات آلات موسيقية بيه وتسجل كل صوت مستقل لوحده وتعمل أغاني كاملة، على سبيل المثال Tom Thum وغيره من الموسيقيين المهتمين بالبيت بوكس. الموضوع أكبر من شوية صوت طالع من بوقك. بس الكلام ده بره مصر، هنا الوضع مختلف وصعب، عشان في مشاكل كتير بتواجه الناس اللي مهتمة بالبيت بوكس، ده اللي أنا عرفته لما اتكلمت مع فاروق من القاهرة، والمعروف باسم F.R.K.

بقالك قد إيه في البيت بوكس؟

أنا من 2013 في البيت بوكس وكنا بنظم بطولات في مصر ما بينا لحد 2018 ومستمرين.

مستوى البيت بوكس في مصر عامل ازاي؟

احنا مستوانا ينافس بره جدا كمان، يعني البيت بوكس في كل الدول بس احنا مصر الدولة الرابعة بعد ألمانيا وفرنسا وأمريكا اللي فيها بيت بوكسرز جامدين.

طب ليه مافيش بطولات رسمية بتتعمل ونجوم المجال ده يسافروا ينافسوا بره مصر؟

احنا مش عارفين ننظم بطولة رسمية عشان مش عارفين نجيب الناس بتاعت بره تنزل تحكم في مصر، يعني الناس دي عشان تيجي لازم مصاريف وده مكلف واحنا مش عارفين نعمل كده

والمنافسة برة مصر؟

أنا كسبت ناس كتير جدًا بره مصر وفي منهم مشهورين كمان، بس كسبتهم أونلاين عشان مش متاح إني أسافر ويوم ما جات الفرصة إني أسافر، كنت هسافر بطولة العالم باسم مصر وكان ممكن أكسب كمان عشان مستوايا حلو الحمد الله.

طب في ناس بتعمل بيت بوكس في مدن غير القاهرة وإسكندرية؟

اه فيه زي طنطا وسوهاج بس للأسف مفيش فيديوهات ليهم

طب ليه ما شوفناش فيديوهات ليكم غير قليل جدا؟

الباتل بتاعت 2018 بعد ما اتصورت مش عارفين ننزلها و نكملها عشان مش معانا حد بيعمل مونتاج ومافيش فلوس نجيب حد، ومعظم الباتيلز مش هتلاقيها نازلة كاملة لإن الناس مش مهتمة.

نظرة الناس إيه للبيت بوكس في العموم؟

معظم نظرة الناس للبيت بوكس إنه تفاهة، ويوم ما بيسمعوا بيسمعوا واحد بيعمل بطوط وبيعمل خمس أصوات مع بعض وحاجات هبل خالص يعني، رغم إن البيت بوكس في مصر اتطور جدًا وبندور دلوقتي إننا نعمل بطولة رسمية في 2019.

بعيد عن فكرة ال beatboxer اللي شغال لوحده، بس كمان في بيت بوكسينج في الفرق الموسيقية، زي جون صادق اللي هو واحد من مؤسسي فريق "المينا" في الإسكندرية. لما اتكلمت معاه نظرته كانت مختلفة تمامًا للبيت بوكس في مصر.

أنت بدأت امتى؟

بعمل بيت بوكس من سنة 2005 والبيت بوكس عرفني على رابرز كتير وناس كتير في المجال ده وعملت ورش بيت بوكس عشان أعلم الناس في الاستديوهات، بس محدش كان مهتم.

طب إيه رأيك في البيت بوكس في مصر؟

البيت بوكس محتاج إنه يتعرف أكتر في مصر، الناس كلها فاكراه مجرد تفتفه، مافيش ثقافة، كل واحد عمل صوت تيتيتيت فاكر إن ده هو البيت بوكس، أو كل واحد عمل صوت غريب من بوقه فاكر إن ده كده بيت بوكس! الموضوع محتاج تمرين. ثقافة البيت بوكس في مصر تحت الأرض، مفيش حد شايف إن دي مزيكا، يعني اللي من سني واللي أصغر مني شايفين ده تفاهة والأكبر مني برضه، كان نفسي ناس بتفهم بتلعب بيت بوكس لكن عندنا الموضوع مش كده خالص وفي حاجة غلط، يعني في ناس مشهورة وهما ضعاف، وناس تقال وجامدين بس مش معروفين.

طب المسابقات في مصر؟

مفيش، أو تقدر تقول مستواها مش قد كده، عشان مافيش تحكيم ومستوى الناس لسه ضعيف، يعني أنا قديم وبلعب بس مش هعتبر نفسي حكم.

من وجهة نظري أنا، الأزمة الحقيقية في التجديد والتنويع ومواكبة العصر وخلق صوت جديد في البيت بوكسينج قبل الاهتمام بالبطولات نفسها وعدد الناس اللي بتقدر تعمل النوع ده بشكل قوي، مهم كمان ازاي توظف البيت بوكس ويكون له فيديوهات أكتر ويكون في تنوع في الصوت وخصوصًا لو كان التنوع يجمع ما بين إيقاعات الراب و الإلكترونيك.

Home
خروجات النهاردة
Home
Home