"مدى" هو مشروع فني موسيقي غنائي مستقل من الأردن، بيعملوا مزيكا إلكترونيك بس بيغنوا عليها بالعربي، مركزين على تطويرالإنتاج الموسيقي واستخدام برامج مزيكا وأساليب إنتاج فني حديثة في التوزيع، عشان يطلعوا صوت جديد ومميز خاص بيهم. أغاني "مدى" بتعكس الحالة الثقافية والفنية في الأردن والوطن العربي بالصورة الواقعية، عشان كل ده عملنا مقابلة مع خالد أحد أعضاء الفريق.

فريق "مدى" بدأ سنة كام والفكرة جات ازاي؟

تأسيس الفرقة بدأ في صيف 2017 وكان مكون من شخصين فقط، خالد نويران ورائد مساد، والفكرة الأساسية من تكوين الفرقة هي إن كل واحد لقى عند التاني الحاجة اللي نقصاه، فقونا ليه مانعملش فريق نكمل فيه بعض عشان نوصل للصورة الموسيقية الكاملة بالنسبالنا؟

إيه النوع الموسيقي اللي فريق مدى بيعمله؟

"مدى" لما ابتدت شغل ما كانش في نوع موسيقى محدد عايزين ننتخصص فيه كمان لأن احنا عندنا أفكار كتير ومش عاوزين نوع موسيقي معين يحجمنا، بس بالنسبالنا الموسيقى الإلكترونية زي الفضا، هي المنفذ الوحيد اللي يخليك كل مره تعمل حاجة مختلفة ومش متوقعة من ناحية الصوت والتوزيع الموسيقي فبقينا بنلعب موسيقى إلكترونية لكن بنجرب أصناف كتيرة فيها.

متأثرين بحد في المزيكا الأجنبي؟

التأثير الموسيقي مختلط أوي واحنا بنحب الموسيقى الجيدة من وجهة نظرنا عموما، مهما كان نوعها وكل  حد فينا بيسمع أنواع مختلفة من الموسيقى ومش بالضرورة اللي بسمعه يكون شبه اللي بلعبه. أنا كخالد "مؤلف ومغني"، كل فترة من حياتي كنت أحب اسمع موسيقى جديدة وألوان مختلفة، مقدرش أقول اسم معين اتأثرت بيه بس كل حاجة سمعتها اتعلمت منها بشكل مباشر أو غير مباشر واتأثرت بكتير موسيقيين وفرق ومنتجين.

هل في حد في الفريق مسؤول عن المزيكا والتاني عن الكلمات والغناء؟

احنا بنتشاور أوي في التأليف الموسيقي، بس اساسا الغناء والكلمات بتكون مسؤوليتي كخالد وبقبل ملاحظات معينة، والموسيقى بيبقى إنتاجها مسؤولية رائد وبناخد وندي في الملاحظات وأغلب الوقت بنبقى منفتحين على بعض.

ليه بتعملوا أغاني بلهجات مختلفة؟

موضوع اللهجات ده خيار مش أكتر ومدام الخيار ده متاح ونقدر نعمله فهو إضافه لينا وأداة من أدوات الإنتاج، أنا لما باجي أكتب أغنية عايز أقول منها حاجة أو قصة، بشوف أنهي أحسن لهجة ممكن تعبر عن الحاجة دي وبروحلها، فأحيانًا اللهجة البدوية تكون أقرب ليك بالتعبير وأحيانًا اللهجة الأردنية المحلية تكون أقرب وأكيد اللهجة المصرية بتكون أقرب للتعبير أحيانًا.

إيه الأجهزة اللي أنتم شغالين بيها وهل الموضوع مكلف؟

 الموسيقى الإلكترونية بحر واسع وكل قطعة بتشتريها بتساعد بجودة الصوت من جهة أو التكنيك والإنتاج من جهة تانية، ده أكيد مكلف، احنا بصراحة عندنا كتير حاجات ناقصه عشان نطور موسيقانا ونخلق الصوت الخاص بينا كمدى أو اللي يحدد هويتنا، بنحاول نحسن ده في المستقبل. الأجهزة اللي بنستخدمها حاليًا هي "درم باد" لعمل و ضبط الإيقاع وميدي للعزف وللتحكم بالموسيقى والمؤثرات الصوتية، بالإضافة لبرامج الصوت للإنتاج زي "الايبلتون".

بتدرسوا إيه؟ وهل شرط يكون الموسيقي خريج معهد موسيقى؟

دراستنا بعيدة عن الموسيقى، رائد بيدرس مجال الهندسة الصناعية وأنا كخالد درست بكلية الأعمال وبشتغل في مجال إدارة المنتج والتسويق. دراستنا ساعدت في إدارة وتسويق الموسيقى اللي بننتجها، بس مش بالضرورة تدرس الموسيقى أكاديميا عشان تكون موسيقي، بس في مقومات رئيسية ونظريات في الموسيقى لازم تكون عند أي موسيقي، ودلوقتي العالم الرقمي مفتوح تقدر توصل لأي معلومة أو تدريب عشان تطور نفسك، لكن الموهبة دي من عند الله ودي لازم تكون موجودة قبل أي حاجة.

إيه الصعوبة اللي بتواجهكم في المشوار الفني بتاعكم؟

الصعوبات حاليا في التسويق والتكلفة المادية بشكل عام، كمان إنك تلاقي فريق عمل يشتغل معاك ويساعدك، لأنه بالإضافة للوقت والجهد اللي بنبذله في التأليف والإنتاج، مطلوب كمان نشتغل على التسويق وإدارة الحفلات والعلاقات العامة وحقوق الملكية  وحاجات كتيرة مابنلحقش نعملها كلها.

هل في عائد مادي من المزيكا بتاعتكم؟

المزيكا أكيد لو أخدتها بشكل احترافي هيطلعلك منها عائد مادي، بس لازم تعمل حاجات كتير عشان تقدر تجيب مردود بالمقابل، يعني لازم تعاني الأول وفي الوطن العربي هتعاني أكتر.

إيه رأيكم في المشهد الموسيقي للإلكترونيك في الأردن والعالم العربي؟

الموسيقى الإلكترونية في الأردن لسه عاوزه وقت كتير لأن النوع ده من الموسيقى مش سهل خالص ومش دارج برضه، بس على الأقل دلوقتي بتتحسن الأمور شوية بعد ما صارت الأجهزة الموسيقية متاحة بشكل أكبر والحصول عليها أسهل. على مستوى الوطن العربي بشوف برضه إن في شغل على الموضوع بس قليل ومحتاج نضوج أكبر وشغل أكبر على مستوى الإنتاج والجودة أو الكتابة عشان نقدر نقارنه بالشغل الغربي، بس لسه قدامنا شوط كبير، ده ما يمنعش إن في حاجات محترمة وفي ناس بتشتغل صح، بس أنا بقول على المجمل.

إيه الصوت اللي عايزين تخلقوه في ألبوم "بكرة أحلى؟

ألبوم بكرة أحلى أول إنتاجنا كمدى في المرحلة الحالية، ما بنحاولش نخلق صوت جديد، بنحاول بس إننا ندمج الأصوات الموجودة أصلا بس بأسلوبنا، السبب في ده إننا عايزين نمهد الطريق للموسيقى بتاعتنا الأول قبل ما نبتدي نجرب نخلق الصوت الخاص بينا وده عاوز شغل جامد ومراحل متقدمة ومش اي حد يقدر يوصل لده بسهولة.

بتعملوا أنهي الأول الكلمات ولا المزيكا؟

بحكم إن احنا بنحب و بنحس المزيكا وبنتأثر بيها بشكل أكبر من الكلمات، فعلى الأغلب بتكون عي المحرك الأساسي لعواطفنا، عشان كده بنكتب الكلمات بالشكل النهائي بعد المزيكا، بعد كده بييجي عنوان الأغنية، بس لو عاوزين نعبر عن موضوع معين أكيد بناخد بعين الاعتبار إن اللحن يكون مناسب للكلمات واختيار الصوت يكون بيعبر عن الموضوع اللي حابين نتكلم فيه.

إيه رأيكم في مزيكا المهرجانات وتسميتها إنها إلكترو شعبي؟

الموسيقى دلوقتي كلها إلكترونية، بحكم إنها بتتعالج وبتتمنتج من خلال الكمبيوتر، بس الموسيقى الإلكترونية أول ما ابتدت واتصنفت إنها إلكترونية، كان السبب هو نوع المعالجة مش الإنتاج النهائي، للسبب ده ما بنعتبرش أي صوت يطلع من الكيبورد يتصنف إلكتروني. بالنسبة للمهرجانات أنا بتمنى توصل لمرحلة التسمية دي "إلكترو شعبي" ويكون في شغل جامد على مقاييس الصوت والمعالجة والإنتاج، بس التسمية غير دقيقه دلوقتي.

هل في موقف حصل خلاكم تفكروا تبطلوا مزيكا أو فكرتم في كده قبل كده؟

المواقف ممكن تكون كتيره، بس ده عمره ما كان خيار لينا لأن احنا بنعمل الموسيقى أساسا لروحنا وهي بالنسبالنا زي الأكل والشرب وعمر ما حد يبطل الأكل أو الشرب.

بعيد عن الإلكترونيك بتسمعوا إيه تاني؟

أنا كخالد بحب حاجات كتير بس الروك عموما حاجة مميزة عندي وبحب "بينك فلويد" لأنهم أثروا فيا أوي.