أهم 18 أغنية في 2018
18 أغنية من اختيارنا، أكتر أغاني سمعت السنة دي وأغاني ماتقفلش 2018 من غير ما تسمعها. القائمة مش بالترتيب، يعني مفيش مركز أول وأخير.
غلطة في حرف كانت السبب الرئيسي في انتشار مقطع بيغني فيه حمو بيكا وهو بيقول: "رب الكون ميسنا بميسة"، لكن المهرجان حلو وتوزيع فيجو الدخلاوي، واحد من أهم الموسيقيين في مشهد المهرجانات في الإسكندرية.
مهرجان سوري متكلف جدا جدا الصراحة و اتعمل بالطريقة االراب بتاعت برة بالظبط يعني من اول الالوان و العربية و اللبس يعني هو احلى فيديو كليب مهرجان اتعمل في 2018 و اللي مميز فيه انهم عملوا فيديو كليب على الطريقة الجديدة و طلعوا من جو المصري المعتاد في المهرجانات اللي تحس انها مصنوعة برخص كده
الواحد اتعود إن العسيلي لازم يطلع بحاجة جديدة كل سنة، كمان مافيش أغنية "بتجلي" من العسيلي والأغاني بتاعته بتكون حالة خاصة. أغنية "حلم بعيد" تقدر تقول إنها بعيدة عن صوت البوب المصري اللي بيكون فيه صوت الطبلة والسقفة والحشو اللي بيكون في الأغاني كلها.
دخول فضل شاكر القائمة دي، بسبب خروجه من الأزمة اللي دخّل نفسه فيها، ضيف على كده كمان إنه طلع براءة من كل القضايا اللي كانت عليه، يعني المياه رجعت لمجاريها وبقى له ذهن صافي يعمل مزيكا ويرجع الجمهور.
مغني المهرجانات السادات قدر في سنة 2018 يعمل تجارب موسيقية تعتبر ناجحة، تتميز إنها مزج بين الراب والمهرجانات، زي مهرجان "خربان" اللي عمله مع الرابر الإسكندراني "ويجز" صاحب أغنية "تي ان تي" اللي سمعت على مستوى المشهد الموسيقي في الوطن العربي في 2017 وقدر يجذب انتباه السادات إنه يعمل أغنية مهرجان معاه. الأغنية نجحت واتصورت في شرم الشيخ.
نمبر وان هو الفيديو الأول مشاهدة في قناة محمد رمضان، مش بسبب إن الأغنية حلوة، لكن اللازمة بتاعت "نمبر وان" مسكت في وادن الواحد ومش راضية تسيبها خالص، وبغض النظر عن قصد محمد رمضان من المهرجان، بس هو كان نفسه يخوض تجربة غنائية كاملة لوحده والنتيجة كانت مش بطالة رغم الهجوم عليه ورغم المستوى الفني (يارب يكون اتعلم بقى).
119 مليون مشاهدة منها 1 مليون لايك! رغم إن رقم 119 مليون مشاهدة ده يخض بس احنا مش مختارين الأغنية دي بسبب عدد المشاهدات، اخترناها عشان أكتر أغنية كان فيها حاجة مرتبطة بين حمزة والجهور اللي بيموت في النكد والحزن.
لما سمعت أغنية تامر حسني كنت معترض على فكرة خفة الدم في الأغنية وإن فعلا الدنيا صعبة جدًا على ناس كتير، بس يمكن تامر حاول يبسط الدنيا دي على الناس في الأغنية.
إسهامات شيبة السنة دي كانت قليلة بس دورها كان مؤثر زي أغنية نسر الصعيد في رمضان اللي فات، رغم إنها أغنية مسلسل لكن الأغنية سمعت لدرجة خرجت من إطار إنها معمولة مخصوص لمسلسل لإنها أغنية فردية تم إصدارها.
الفنان اللي رافض إنه يعجز أو يعتزل، والصراحة عمرو دياب أكتر فنان لما بشوفه وبسمع له أغنية جديدة بقول ماينفعش يبطل أو يعتزل! ده الألبوم رقم 32 ولازم في كل ألبوم تلاقي أغنيتين تلاتة الناس تتخانق عليهم على إنهم الأفضل وفي الألبوم الجديد دي واحدة منهم.
مش مهم إن عدد المشاهدات وصل لمليون بس وإن أغاني حمو بيكا وصلت ل 30 مليون، المهم إن الكينج نزل أغنية والواحد بيستنى لما محمد منير ينزل أغنية، خصوصاً بعد الفترة الصعبة صحيًا اللي عدت عليه. لما اختارنا كان في تردد بين "طاق طاقية" والأغنية دي، لكن أغنية لو "باقي في عمري" حسيت إن محمد منير بيغنيها للجمهور وبيكلمهم.
لما تحط "ابيوسف" الراب والشعبي اللي هما "إسلام شيبسي وشعبان عبد الرحيم" في أغنية واحد بالتصوير والمزيكا دي وبالشكل ده، يبقى دي مرحلة موسيقية جديدة على مصر، خصوصًا إن محاولات الدمج بين الشعبي والراب قبل كده كلها محاولات وتجارب ضعيفة مش قوية زي أغنية أنا مش هقدر حد.
"مسار إجباري" قدروا يحققوا نجاح موسيقي كبير من الألبوم ده، ونهايات الحكاوي من الأغاني اللي سمعت كتير مع الناس عشان في حاجة مرتبطة ما بينهم، والأغنية مود كده وحالة مزاجية قدرت تميز نفسها عن باقي الألبوم.
أكتر حاجات تقدر تنجح الأغنية هي حركات الرقص، يعني إن يكون في حركة رقص سهلة بتصاحب الكلمات اللي بتتقال ومعبرة نوعاً ما، زي اللي حصل في البرومو بتاع أغنية شرين لما عملت ستوري بتقول فيها "حبيبي نساي نساي"، والناس بقى ما صدقت وهاتك يا ستوري.
أكتر حاجة لفتت انتباه الناس هو ازاي الفيديو ده اتصور، يعني الناس من أول بتوع المونتاج لحد المخرجين والرابرز، كل واحد بيقول نظرية وتقريباً أغلب النظريات غلط، لكن الفيديو والأغنية نفسها مكملين بعض جدا وعاملين معادلة مناسبة في إن التصوير محير والراب بتاع ابيوسف في عزرائيل كان صدمة لمشهد الراب كله.
رصيد شارموفرز السنة دي يعتبر مافيش غير يا دوبك أغنيتين بس، ده عشان في تجهيز للألبوم وأغنية "زامبا" هي أغنية من الألبوم، عشان الناس تقدر تشوف أو بمعنى تاني تاخد خطفة من الجديد بتاع شارموفرز والأغنية نزلت في أواخر الصيف وسمعت.
خلي بالكم لما تيجي تدور على أغنية "الصحاب يلا" هتلاقي حاجات كلها "يلا" في الآخر زي مهرجان "المنتخب يلا" اللي اتعملت على نفس اللحن، واللي ميز "الصحاب يلا" هو اللحن في الرد الموسيقي اللي اتلعب بالأورج وخلاها من أكتر المهرجانات اللي سمعت السنة دي، خصوصا إن في أغاني كتير عن الصحاب بس مفيش أغاني فيها الرتم الشعبي ده.
يومين أغنية جميلة ومودها حلو جدا كده فكرتني بأغاني كولد بلاي اللي تتفرج عليها، تحس إنك مبسوط كده وعشان كده لازم تبقى موجودة في القائمة.
