• اكتب معانا
  • ماتنسناش
  • تابعنا
الموضوع اللي جاي
رمضان صبحي عرض استضافة أسرة طفل سوري تعرض للتنمر في إنجلترا لمدة يوم
الموضوع اللي فات
فلوس كتير ومافيش مدير: حوار مع مؤسسة أول موقع مصري للـ Freelance

"من طالب بكلية التجارة لعازف الأورج الأساسي مع عزيز مرقة".. حوار مع لؤي حجازين

مقابلة مع لؤي حجازين
لؤي حجازين

المشهد الموسيقي في الأدرن صعب، في فرق موسيقية كبيرة وتقيلة الوزن، وجودها ممكن يكون مانع الفرق الصغيرة إنها تطلع على السطح وتتشاف، رغم كده في موسيقيين بتقدر تطلع وتحاول تتعلق في مكان تتشاف منه، من الموسيقيين دول البروديوسر لؤي حجازين اللي بدأ مشواره الفني من سن 15 سنة كبروديوسر وعازف أورج وعمل ستوديو the blue room عشان يشتغل فيه كموزع وملحن في الأردن، وقدر يجذب -بالصدفة- ودان عزيز مرقة وبقى لؤي هو عازف الأورج الأساسي في فريق "مرقة".

لؤي حجازين جه مصر يعمل حفلات في مركز "الجيزويت" الثقافي في الإسكندرية وفي the room art space في القاهرة. قابلناه وعملنا معاه حوار.

إيه اللي دخلك في المزيكا؟

من 7 سنين كنت بتفرج على اليوتيوب بقلب في المزيكا والأنواع،  لحد لما دخلت على "الداب ستيب" ولقيت "سكريلكس" وبدأت اسمعله، فضلت اسمع لـ "سكريلكس" كتير جدا وبدأت اسأل نفسي ازاى بيعمل كده؟ شوفت انترفيوز بيقول فيها إنه بيعمل مزيكا بلابتوب فقلت لنفسي ازاي؟ كان عندي 15 سنة واكتشفت إني ممكن أعمل ده. بدأت انزل البرامج والسوفت وير وال VST و trap ودخلت إلكترونيك ميوزيك كتير واشتريت Midi كيبورد عشان يسهل الدنيا عليا، من هنا دخلت في المزيكا.

إيه النوع الموسيقي اللي أنت بتلعبه؟

سؤال صعب، احنا وصلنا لمرحلة إن كل الثقافات دخلت في بعض، وده نفس الموضوع بالنسبة للمزيكا، يعني ممكن تلاقيني بلعب تراك بوب وفي نفس التراك اعمل حتة بلوز وبعدها روك وكل ده في تراك واحد، يعني مش بلعب نوع موسيقي صافي، التراك بيكون متنوع.

كنت عارف إن في مشهد موسيقي عربي مستقل؟

لا زمان ماكنتش اعرف حد، أعتقد بالصدفة "اوتوستراد" سمعتهم أول مرة وبعد كده فضلت ادخل من هنا لهنا ودخلت على مصر كمان ولقيت في ناس كتير كويسين في المشهد الأردني والمصري.

أنت عندك فريق ولا لوحدك؟

بص أنا solo artist، بكتب وبلحن وبوزع وبعمل كل حاجة لوحدي، بس وقت التسجيل بستعين بأصحابي عشان الصراحة مش بعزف جيتار فبستعين بـ عازفين، بالنسبة للحن ده بيكون موجود في راسي أو لما بنقعد سوا بنطلعه، وهما بيسجلوا اللحن اللي أنا راسمه في راسي

و أمتى بدأت تكتب و تغني ؟

بص انا فضلت solo artist بال project بتاعي، لحد من سنتين كده بدأت اكتب شوية، اللي هو جه على بالي أجرب ممكن يطلع حلو، خصوصًا إني في فترة المشهد الموسيقي في الوطن العربي ماكانش فيه جديد فكان نفسي في حاجة جديدة، بدأت أكتب حاجات واركنها، وبعد فترة قررت أطلع الحاجات دي.

في صعوبة في المشهد الموسيقي الأردني؟

بص هو صعب من ناحيتين، الأول الجمهور الأردني صعب جدًا مش سهل، بمعنى إنه صعب يسمعك ويحبك مقارنة بأي جمهور تاني. تاني حاجة هي الفرق الموسيقية نفسها اللي موجودة وعمرها كبير زي "جدل" و "اتوستراد" و "المربع" و "عزيز مرقة" و "آخر زفير"، الفرق الجديدة اللي بتطلع بيكون في بينها وبين القدام دول Gap.

 بدأت تدرس مزيكا ازاي؟

أنا درست سنتين finance وفي السنة التالتة في تالت محاضرة رفعت إيدي وقلت للدكتور ممكن اطلع برة؟ طلعت وحكيت مع أهلي إني I can't do this وروحت حولت كلية الفنون الموسيقية بالأردن، وكده دراستي بتساعدني في شغلي ومعتمدة على شغلي. كمان أنا اخترت أدرس مزيكا عشان في الآخر مالاقيش نفسي قاعد ورا مكتب، أنا عايز أشوف آخرة تعبي وبعد كده المزيكا هتبقى my full time job وأنا بحاول كتير أوزن بين الجامعة والشغل في المزيكا، يعني أنا أهو في مصر بس عندي امتحان بعد يومين أول ما ارجع.

شايف إن المزيكا اللي أنت بتعملها عايز توصل بيها رسالة للناس؟ وهل يشترط يكون في رسالة في المزيكا؟

من ناحية يشترط اه يشترط، عشان كل إنسان بالنسبالي له هدف من وجوده على الأرض وبالحياة ولازم يقدم حاجة للمجتمع، يعني لازم يكون في رسالة توصلها ورسالة هادفة وواعية خصوصًا للجيل الجديد، عشان الجيل الجديد بيكون منفتح أكتر للفن والحب والسلام وده اللي أنا بقدمه في المزيكا بتاعتي.

اه يعني زي تراك عمان 2030 ايه اللي خلاك تعمل تراك زي ده؟

الأغنية كانت بالعكس، كانت عن قد إيه الوضع سيئ وصعب، بس سألت نفسي مين هيسمع الموضوع ده؟ أكيد اللي هيسمع هو جيلي أو الجيل الأصغر مني، طب ليه اديهم الطاقة السلبية دي؟ خليني أقوله يطور ويحسن وعايزين عمان تكون أحسن عاصمة في العالم وخليك ورا الموضوع لحد ما تنفذه.

و ليه عملت الأغنية دي ريجي؟

عشان الريجي بيرقص وبيدي طابع السعادة وأنا اشتغلت في التراك ده 7 شهور، يعني في منها 7 إصدارات والأخير اللي طلعته هو الريجي وأخدت الفترة دي عشان أقدر أطلعها بالشكل والموود الأخير ده.

ازاي وصلت إنك تلعب في فرقة عزيز مرقة؟

الموضوع بدأ إني كنت عايز أعمل ريمكس لأغنية "سمعتك"، وقتها بعت رسالة على الفيسبوك لعزيزة مرقة إني عايز اعمل كده، رد وقالي أكيد وأخدت رقم تليفونه وبدأنا نتواصل وبدأت أسمّعه شغلي وبقينا صحاب، وفي يوم قالي أنا جاي الأردن تعالى احضر الحفلة وتتعرف على الناس، وبعديها بأسبوعين أو تلاتة بعتلي فويس نوت بيقولي: "إيه رأيك لو تعزف معي" قلت له أكيد يلا بينا ودي كانت القفزة من الاستوديو للمسرح

أغنية "انادي" مختلفة عن الباقي إيه القصة وراها؟

أنادي كتبتها بعد "ريد بول في الشارع" اللي كان في مصر لما جيت مع عزيز مرقة، وبحكم إنه كان 9 باندات وبنلف 9 محافظات، كان في كتير مزيكا بسمعها من كل الأماكن والباندات ده ألهمني كتير، يعني الأغنية دي أنا كاتب نصها في مصر، كنت في الطريق من المنصورة للقاهرة خمس ساعات وكنت ماسك التيليفون وعليه بيانو وقاعد بكتب كوردات وأجرب ألحان، ده اللي طلع الأغنية بالشكل ده. نزلت من الطيارة على الكيبورد أجرب اللي كنت بعمله في مصر وأنا في الطريق والفندق.

تجربتك مع عزيز مرقة خصوصا في حاجة زي ريد بول في الشارع خليتك تشوف نفسك بطريقة مختلفة عن الأول؟

منظر 30 ألف بني آدم وهما بيتفرجوا عليك، ده لوحده شعور تاني، وهنا افتكرت نفس الجملة اللي قولتها من شوية، الواحد لازم يفضل ورا الحاجة اللي هو عايزها، يعني أنا كان نفسي اوصل لمكان معين وفضلت أجرب، الرسالة اللي باعتها لعزيز مرقة كنت بجرب أصلا، رسالة صغيرة فتحتلي طريق كبير وده اللي خلاني مؤمن إن عندي موهبة بجد.

تفتكر هيجي الوقت اللي تقول لا خلاص أنا مش هعمل مزيكا تاني؟

بص كل واحد بيمر بفترات ups and downs أنا لما بمر بالمرحلة دي باخد نفسي واقعد عند البيانو واعزف حاجة بحبها، يعني من الآخر لو إيه اللي حصل أنا مش هسيب المزيكا.

رايح لفين بالمزيكا بتاعتك؟

مش عارف بس في حاجة لازم اوصلها

صورة الموضوع الرئيسية من تصوير مؤمن محمد في حفلة مركز جيزويت الثقافي

Home
خروجات النهاردة
Home
Home