• اكتب معانا
  • ماتنسناش
  • تابعنا
الموضوع اللي جاي
18 شخصية عملوا فرق في 2018
الموضوع اللي فات
الحكم على صاحبة فيديو "التحرش بالقرد" بـ3 سنين سجن

أحسن 10 مهرجانات في 2018

عن 10 افضل اغاني مهرجانات في 2018
فيجو

2018 كانت زحمة جدا في المهرجانات، ده حتى الممثل محمد رمضان عمل مهرجانين مش واحد بس، وعشان نقدر نختار 10 مهرجانات من وسط كل المهرجانات دي، كان لازم نضحي بمهرجانات كتير بنحبها وخصوصا مهرجان "لأ لأ" بتاع فريق صواريخ اللي نزل في آخر سنة ديسمبر 2017، بس للاسف كده اتحسب على 2017. القائمة مش بالترتيب ولكن دول أحلى 10 مهرجانات السنة دي. في منها فيديو كليب ومنها صوت.

مهرجان دراكولا

توزيع رامي المصري وغناء سادات العالمي وكلمات الأسطورة والجن. لازم القائمة تضم مهرجان دراكولا اللي قدر فيه السادات يغير ويطور في المهرجان القاهراوى، رغم إن السادات من الجيل القديم، لكن قدر ينافس بقوة ويفرض سيطرته ويأثر على الجيل الجديد، خصوصا في طريقة الإلقاء اللي خلقها في مهرجان دراكولا.

مهرجان رب الكون ميزنا بميزة

توزيع فيجو الدخلاوي وغناء حمو بيكا وعلي قدوره ونور التوت ومن كلمات إسلام المصري. المهرجان بعيد عن شهرة حمو بيكا وعلاقته بوشوش الغضب، لكن المهرجان فعلاً حلو، من أول اللحن اللي صنعه فيجو الدخلاوي وأسلوب حمو بيكا بصوته الغليظ وطريقة الغناء نفسها، ضيف على الكلام ده الكلمات نفسها اللي اتكتبت مخصوص لمناسبة الفرح والجدعنة بين الناس، وإنه مهرجان اتعمل هدية من واحد بيمسي على فرح واحد صاحبه.

مهرجان بطنى بتضحك

توزيع احمد فيجو وغناء فيجو ومدني وإمام سعيد وكلمات إمام سعيد. المهرجان مستوحى من فكرة الفيديو اللي انتشر على الفيسبوك بتاع الواد اللي كان بيقول "بطني بتضحك"، قدر "فيجو" يلفت الانتباه إنه لسه موجود على الساحة ومش معنى إن الإنتاج نسبته قلت يبقى هو بطل، بالعكس، فيجو قادر يخلق مهرجانات تمسك في الودان.

مهرجان كله بالحب

توزيع زوكا وحتحوت وغناء زوكا وعلاء فيفتي وكلمات مكاوي، قدر علاء فيفتي بمساعدة زوكا يخرج من الشكل التقليدي للمهرجان ويدمج التراب المصري في المهرجان ويخلق شكل وصوت جديد لنفسه يقدر يستمر بيه الفترة الجاية في مشهد كله منافسة شرسة والأغنية الأقوى هي اللي بتسمع. طريقة تصوير الفيديو واضح جداً إن فيها تأثر بطريقة تصوير أغاني الراب. زي أغاني DMX الرابر الأمريكي في بداية الألفينات وده على سبيل المثال وليس الحصر.

مهرجان بلاش نفسنة

توزيع زوكا وحتحوت، غناء فريق "خبط" اللي هما حتحوت وكاتى وزوكا، كلمات خالد برجوانة؟ فريق "خبط" قدر يخلق صوت جديد للمهرجان بعيد عن المهرجان الشعبي التقليدي. في تأثر واضح بموسيقى الراب في طريقة الإلقاء وطريقة توزيع الموسيقى. أسلوب "زوكا" هو أبرز واحد فيهم وتميز بسرعة في مشهد المهرجانات عشان مفيش نفس اللون ده ولا حتى قبله، رغم إن كان في محاولات قبله للوصول للأسلوب ده.

مهرجان الكنشه الذهبية

توزيع فارس زيزو وغناء فريق "المزيكاتية"، اللي هما شواحة وفارس زيزو وحودة جوكر وكلمات شمس الناسف. فريق المزيكاتية من أنجح الفرق الإسكندرية وله شكل مميز جدًا ساعد على التميز ده.

مهرجان كازاميزا في التوكتوك

توزيع فيلو وغناء زياد الإيراني وفيلو وايفا الإيراني، من كلمات زياد الإيراني. مهرجان 8 دقايق يعني تشغل المهرجان ومش هتزهق منه، عشان كل شوية القصة بتتغير، مفيش كلام ثابت أو موضوع ثابت واللحن الإسكندراني ثابت ومتكرر بس مش ممل.

مهرجان خربان

توزيع عمرو حاحا وغناء سادات العالمي مع الرابر ويجز وكلمات أبو عمار والفيديو من إنتاج شركة AM PRODUCTION. في مزج أو خلط بين المهرجان والتراب المصري، قدر عمرو حاحا يخلق المزج ده بشكل بسيط من غير ما يبعد عن التراب أو يقرب من المهرجانات، خصوصا إن بداية الأغنية هى تراب صرف مش مهرجان خالص.

مهرجان وهما

توزيع الخضري وموزه، كلمات كالوشا وغباشي وغناء الباور العالي. في محاولات من الموزعين إنهم يطلعوا من شكل المهرجان التقليدي في المزيكا، أو خلينا نقول المدرسة القديمة في المهرجانات، وعايزين يحطوا أصوات جديدة في اللحن من غير ما يغير الإيقاع. الباور العالي عرف بالمهرجان ده يواكب النقلة اللي حصلت في مشهد المهرجانات.

مهرجان أصحابي أخصامي

توزيع زيزو المايستور وغناء إيفا الإيراني وحمو بيكا ومودي أمين، من كلمات سمي الناسف. المهرجان قصة كاملة مستوحى من فيلم "إبراهيم الأبيض" وعن خناقات الشارع وغدر الصحاب طبعاً. المهرجان الإسكندراني أكتر حاجة بتميزه إنه في جزء طربي، يعني في غناء مش مجرد رص.

Home
خروجات النهاردة
Home
Home