لما بقول لحد إن اللي بيقدمه زاب ثروت ده مش راب ده "راب بوب"، الناس بتنزعج وتبدأ تدافع وتقول لأ طبعًا ده راب، النقاش يسخن وأكون مضطر أصدم الطرف التاني وأقول له: "ومكي كمان رابر ضعيف بقى"، طب أنا بقول كده بناءً على إيه؟ إيه هو الراب وبيكون عامل ازاي؟ ينفع أعمل ملوخية من غير طشة؟ و ينفع أعمل الطشة من غير كزبرة ناشفة و ثوم؟ لو إجابتك لأ ماينفعش، يبقى أنت زيي مقتنع إن الملوخية مش معناها الزرع الأخضر ده وخلاص ولازم تكون في عناصر تانية كتير عشان الطعم يطلع حلو.

ازاي تكتب كلمات تنفع راب؟

الأكلة الحلوة لازم يكون ملحها مظبوط، الملح في الراب هو الكلمات، بس زي ما في ملح خشن وملح ناعم وملح من البحر، الكلمات برضه كده، لازم تكون "الجُملة الشعرية" مترركبة بطريقة كويسة ومش تقليدية أو معقدة، تدي وزن وقافية بشكل في الجملة الواحدة عشان تكون أسهل في الودن. الموضوع مش سهل إنك تلاقي كلمات لها نفس الوزن وتحط منها كتير في سطر واحد، الموضوع صعب عشان لازم في الآخر يكون في معنى، سواء واضح أو غير واضح ، يعني مش مجرد حط قوافي وأوزان وبس.

 يعني مثلا في تراك "جف الريق"، رابر توفيق مستخدم كلمات كتير في نفس السطر لها نفس الوزن، عشان في الآخر الجملة تكون قوية التركيب وحلوة على الودن موسيقياً.

اعترافي قل بيكو فجأة طلعت ليكو كلمه كانت صادقه

ببص لروحي فجأ’ كانت مفاجأه شغلي بيت ومش هتشوفني بهدا

أصل مليش في شغل المناهده ما فيش حرافيش مافيش فيكو نفخة

ماتدعونيش مليش في شغل البهجة شباب لطيف أليف مش حمل زغذة

في تراك تاني اسمه "بتلف في دوائر"، رابر ديابلو مستخدم نفس القافية في أول الجملة وآخرها

 ملوش لازمة الكلام لما يتوه العقل هيتبقى صورة أوهام عيش

ميهمنيش لما يتوه اللحن ميلزمنيش

مبحبكيش عشان العشرة تهون أنا مبحبكيش

تكدبى مرة أنا مضمنكيش

حبيبى أنا آسف متلمسنيش

ظبطت الملح؟ هتعمل الطشة ازاي؟

الطشة هنا هي المزيكا والكزبرة بتاعت الطشة هي الآلات الموسيقية والثوم هو الدرامز أو الإيقاع الطبلي. أول حاجة البروديوسر بتاع المزيكا بيعملها هي الإيقاع الطبلي، عشان يعرف يبني عليه و يحط باقي الآلات الموسيقية، ده في الغالب، بس في بروديوسرز بتعمل المزيكا بشكل مختلف.

 أول تراك هنا كمثال هو "أوزوريس X الغلاف" رابر مروان بابلو، المزيكا هنا لها صوت مميز، صعب تعرف إيه الآلات الموسيقية دي، عشان دي مش آلات في شكلها الخام اللي أنت تعرفه، كل دي آلات موسيقية متحرف في صوتها ومتغير عشان يواكب الزمن و التطور اللي حصل في المزيكا.

اللي بيميز الأنواع الموسيقية عن بعض هي المزيكا ولما بقول إن أغاني زاب ثروت ومكي هي بوب راب ومش ده الراب،  برضه عشان هو بيستخدم مزيكا عناصرها كلها بوب زي (جيتار، كمنجات، بيانو) بصوتها المعروف، يعني المزيكا بتاعته ينفع حماقي وشيرين و مسار إجباري يغنوا عليها، وده مش وحش لكن ده يضر النوع الموسيقي نفسه ويضر الراب ويدي للناس فكرة غلط عن الراب.

 تراك "الوزة الرمادي" الرابرز أدهم غوريلا وشاهين عاملين فيه مزيكا بتكون صعبة أصلا على جمهور الراب المصري نفسه، لأنها حاده جداً وعبارة عن "لووب" شغال ولحن بيعيد نفسه على طول الأغنية مع الإيقاع الطبلي اللي برضه بيعد نفسه.

 المزيكا مش شوية آلات موسيقية محشورة مع بعض في تسجيل صوتي وخلاص، لكن المزيكا لازم تكون عملية شاملة من أول التوزيع واختيار الأصوات اللي هتستخدمها وإيه اللي هيتغير فيها، يعني لو عايز تستخدم "بيانو" هل هيكون صوته خام ولا هتحط مؤثرات عليه تغير صوته وتطلع بصوت مختلف عن المعتاد؟ في تراك " فين الدوا " رابر أبيوسف مستخدم أصوات في الخلفية مستمرة على طول الأغنية، عشان تعزز الأداء، غير إن اللحن الأساسي اللي هو جوهر الأغنية أنت مش عارف هو ملعوب بأنهي آلة.

خلصت الكلمات والمزيكا: فين الأسلوب؟

الرابر اللي هيغني لازم أدائه وأسلوبه يكون مختلف ومش تقليدي، الأداء لازم يكون فيه قوة تعبيرية زي التمثيل، عشان كده مكي أنجح من زاب ثروت في عالم الراب، عشان بيعرف يمثل بصوته ويوصل الكلام بطريقته. كمثال برضه، في رابرز في مصر بتراب بسرعة، زي فهد مصر المعروف باسم "عفروتو"، في تراك "تدريب جمباز"، الأسلوب السريع بيعتمد على إن لازم مخارج الألفاظ تكون واضحة مش مجرد تقول بسرعة وخلاص.

بس في ناس كتير بتحب البوب المصري و بتحب إن يكون في خليط ما بين البوب والراب المصري، وده مفيش مشاكل فيه، بس عشان الخليط  يتعمل صح، على الأقل لازم يكون عناصر الراب زيادة عن عناصر البوب عشان الأغنية ماتقلبش بوب خالص وهنا ممكن يجي تراك "تغريب" ليوسف الجوكر كمثال كويس، هي أغنية بوب طرب صرف بعيد تماما عن الراب، بس المقاطع كلها راب حتى بناء الكلمات والأداء