حمو بيكا هو الاسم الأشهر حاليًا في عالم المهرجانات، ووصل للمركز السادس عالميًا على ساوند كلاود لأكتر الأغاني المسموعة، في نفس الوقت، أعداد كبيرة على السوشيال ميديا هاجمت حمو بيكا بشكل كبير، بعد ما ظهر ليه مهرجان من سنة 2017، اسمه "انتحار علي خط النار"، بيتكلم فيه عن واقعة زنا محارم بتحصل بين أب وبنته.

الكلمات المستخدمة في المهرجان خلت الناس تقول إنه بيشجع على زنا المحارم وكمان بيلوم البنت بشكل أساسي، اللي كانت سبب في اللي حصل عشان بتلعب رياضة قدام أبوها وفي النهاية أخو البنت بيلومها ويضربها وأمها بتقتلها عشان تنتقم منها. المهرجان بيغني فيه مع حمو بيكا ميسو ميسرة وكلمات الشاعر الفاجر وتوزيع فيجو الدخلاوي، ووصلت عدد مشاهدات المهرجان لأكتر من 600 ألف.

"بيكا" كانت اتلغت ليه حفلة في إسكندرية مؤخرا، بعد ما نقيب الموسيقيين هاني شاكر اتدخل وطلب من الأمن إنه يمنع الحفلة بسبب الغنا بدون ترخيص وإفساد الذوق العام، وأكد "شاكر" إنه هياخد إجراءات قانونية ضد "بيكا".