لما "Steven Spielberg" طلع علينا سنة 1975 بتحفته "JAWS"، نسي يحط في البوستر بتاعه واحد من أهم أبطال فيلمه، "John Williams"، جون هو أكتر واحد ظهر في أحداث الفيلم، أكتر من الممثلين وأكتر من القرش الأبيض نفسه، مزيكا "John Williams" كان إنجازها الأعظم هو نقل حالة من التوتر والقلق والرعب طول أحداث الفيلم، بمجرد ما تبدأ في التصاعد نفسيتنا بتتأهب بشكل تلقائي، ارتباطها في أذهانا بالرعب مالوش علاقة بوجود القرش نفسه، ويليامز قدر ينقلنا مشاعر الرعب والقلق من خلال المزيكا بس. عايز تعرف مدى عبقريته، حط المزيكا على مشهد تاني وشوف المزيكا هتغير فهمك للمشهد ازاي.


هوفر عليك ده، اخترت مشهد من فيلم "شمس الزناتي" وغيرت المزيكا بتاعته، مرة كوميدي مره تراجيدي مره أكشن وهكذا، والفيديو نسخة عربية احنا اللي عاملينها لكن في فيديو تاني أجنبي حاول يوصل الفكرة تقدر تشوفه من هنا

نفس المشهد لما تشوفه من كذا وجهة نظر موسيقية، كل تراك مزيكا بيغير رؤيتك للفيلم، نفس حركة الممثلين، مرة بتشوفها احترافية، ومرة بتشوفها كوميدية مضحكة، حاسس إنه هيقع على وشه في أي لحظة، حتى تعاطفك ورؤيتك للأبطال بتختلف، يعني في الفيديو اللي فات مع موسيقى ياسر عبد الرحمن من فيلم "ملاكي اسكندرية"، بتحس إن تعاطفك بيتنقل بشكل تلقائي من عادل إمام ومحمود الجندي اللي بيمثلوا طرف الخير في الفيلم، للشخصين اللي بيتقتلوا، بينقك إحساس انك بتتفرج على مأساة، ده اللي بيخليك بشكل تلقائي بتتعاطف مع الطرف الأضعف.

دول مجموعة أفلام من وجهة نظري كان مزيكتهم بتلعب دور من أدوار البطولة في الفيلم

Amiele
الفيلم الفرنسي مزيكته واحدة من أجمل مقاطع الموسيقى التصويرية، المزيكا اللي ألفها "Yann Tiersen" بمجرد ما بتسمعها بتنقلك لباريس في فرنسا، بتبقى شايف واحد بيلعب على أكورديون وناس بتجري حواليك وشمس صباحية جميلة، المزيكا شاركت في إنها تنقلك إحساس كل ما تسمعها تبتسم.

Dunkirk
رغم إن الفيلم بصنفه كأسوأ فيلم عمله نولان، وإن العظيم "hans zimmer" عمل مزيكا أفضل من كدة وعلقت في دماغنا بشكل أجمل زي Interstellar و Pirates of the Caribbean و Gladiator و The Lion King اللي أخد عليها الأوسكار، لكن في فيلم Dunkirk المزيكا كله ادتنا إحساس بالحصار جوه الوقت، وسط المحركات، إننا واقعين في فخ مش عارفين نهرب منه، وإن في دانة واقعة علينا من السما، لا احنا عارفين نشوفها ولا عارفين نتفادها، الموضوع عامل زي أفلام توم وجيري لما تكون في حاجة واقعة عليه من السما وقاعد بيجري يمين وشمال علشان يهرب منها، وفي الآخر بيستسلم لمصيره، المزيكا شاركت في الحصار.

Atonement
الفيلم كله تحفة فنية، مافيهوش غلطة، ومن أجمل التجارب الممتعة اللي ممكن تمر بيها في حياتك، المشاهد كلها عبارة عن لوحات فنية، لكن اللي "Dario Marianelli" عمله، هو إن الصورة خلقلها روح، إداها إيدين ورجلين، وخلاها تتحرك. جزء من الإبداع بتاعه شوفناه في مقطوعة "Briony" اللي متسمية على اسم شخصية رئيسية في الفيلم، واللي هي في الأصل كاتبة، مزيكتها تقدر تشوف روحها فيها بكل سهولة، دي المقطوعة وبعدها مشهد ليها من الفيلم

الكيت كات
راجح داود عمل واحدة من أجمل وأصدق المقطوعات اللي عملها في حياته، الفيلم ده من الأفلام اللي تقدر تقول عليها مافيهاش غلطة، كل شخص بيتصرف وكأن الفيلم ده دور عمره، محمود عبد العزيز، عايدة رياض، داود عبد السيد، راجح داود.
الكوميدياء السوداء وإحساس العجز اللي مسيطر على كل أبطال الفيلم، ومحاولة الهروب من الواقع بكل الطرق المتاحة، راجح داود واحد من أهم أبطال الفيلم بموسيقته الخالدة.

Fountain
الحب أعظم محرك لأفعال الإنسان في التاريخ، مش الغضب ولا الخوف، بيتجاوز الزمان والمكان والعوالم، حربنا مع الموت احنا دايمًا فيها الطرف الأضعف، بيخطف اللي بنحبهم طول الوقت، وقدرتنا على استعادتهم صفر، إحساس العجزمع عدم الاستسلام ليه مع الحرب اللي ما بتنتهيش في محاولة إننا نلاقي فرصة عادلة في مواجهة الموت نحمي بيها اللي بنحبهم. مش متخيل كلام زي ده ازاي ممكن في شخص يقدر يعبر عنه بمزيكا، "Clint Mansell" قدر يعمل ده! الفيلم جميل والمزيكا واحدة من أهم بطلات الفيلم

حسن ومرقص
رامي إمام ويوسف معاطي كانوا بيحاولوا في الفيلم يكونوا الصابون اللي يقدر يمزج الزيت بالمياه، نفس الكلام مع"ياسر عبد الرحمن" قدر يمزج الابتهالات والترانيم من خلال مزيكته، المزيكا نفسها بقت بطل من أبطال الفيلم تحديدًا في المشهد اللي مجموعة من الكنيسة ومجموعة من المسجد ابتدوا يصلوا في بيوت حسن ومرقص


The Departed
إنك تصحى من النوم كل يوم مطلوب منك تكون شخص تاني مختلف تمامًا عن طبيعتك، أنت هتكون ممثل، لكن مش هتسمع أبدًا المخرج بيقول "Cut"، هتبقى متحاصر في الفيلم، هيبقى حياتك من غير ما تنسى شخصيتك الأصلية، نفس الصراع النفسي اللي في فيلم "أرض الخوف"، الجمل اللي استخدمها داود عبد السيد في السيناريو، "Howard Shore" ترجمها لمزيكا، حتى لو مش بتتفرج على الفيلم، بمجرد ما بتسمع المزيكا بتتخيل نفسك ماشي جوه دماغك، وأبوابها بتتفتحلك، بتدخل متاهتها وغالبًا ما بتعرفش تخرج تاني، من أهم مقطوعات الموسيقية اللي اتعملت للأفلام، ويمكن أهم مقطوعة في المقال ده، "هاورد" أخد عليها أوسكار بالمناسبة

في أفلام كتير جدا المزيكا لعبت فيهم دور البطولة، وجود المزيكا في السينما كان من أجمل الاختراعات اللي صنعها الإنسان على مدار حياته على الأرض، ما يفوقوش غير اختراع المزيكا نفسها.