مقدمة لابد منها يمكن تجاوزها

طبعًا كل اللي داخل يقرا داخل يتفرج على فروة نولان وهي بتتقطع، ودول ما يقلقوش هتلاقي كل اللي قلبك يحبه بعد المقدمة، لكن الأول لازم نقول كلمتين حلوين في حق الراجل علشان ما يتقالش علينا مش محايدين.

في البداية عجبك الفيلم أو ماعجبكش خلينا نتفق إننا قدام فيلم بيغير كتير من طريقة رؤيتنا لسينما الحروب، تقدر تقول إنك شوفت فيلم عن الحرب العالمية التانية، لكن ماشوفتش فيه جنود الطرف التاني أو العدو من وجهة نظر البطل ولا مرة طول الفيلم، ويمكن ده اللي خلى تأثيرهم النفسي أكبر بكتير، لو رجعت فكرت فيها هتلاقيها منطقية جدًا؛ بيزيد خوف الإنسان دايمًا من كل شيء مش شايفه أو يجهله، ما شوفناش جنود الألمان غير في آخر الفيلم silhouette وهم بيقبضوا على الطيار "توم هاردي".

علشان نفهم قصة "Dunkirk"، فهو آخر ميناء فرنسي فضل في إيد الحلفاء قبل استيلاء الألمان عليه في يونيو 1940، اللي بيخلي القصة مميزة ويخلدها التاريخ هوالجزء الإنساني من القصة. وضع الجيش الإنجليزي والفرنسي كان الأسوأ في الفترة دي، الجيش الألماني محاصرهم من كل الجهات في وضعية من وضعيات العدو أمامكم والبحر خلفكم، عدد الجنود المحاصرين من كلا الجيشين حوالي 400 ألف عسكري متحاصرين على الشريط الضيق الساحلي وأجزاء من المدينة اللي بنى فيها الجيش الفرنسي دفاعاته، مساحة المنطقة المحصور فيها 400 ألف بني أدم هي حوالي 95 كيلو متر، وعرضها من 20 ل 24 كيلومتر. عملية الإجلاء استمرت لمدة أسبوع، "تشرشل" رئيس وزراء بريطانيا ماكانش متوقع نجاة أكتر من 30 ألف جندي من الجيشين، لكن النفير العام اللي أطلقته البحرية الملكية البريطانية خلى المراكب المدنية تشارك في عملية الإجلاء في ملحمة إنسانية، وده اللي خلى النتيجة إنقاذ أكتر من 330 ألف جندي.

"كريستوفر نولان" بيعرف يطوع المعرفة والمعلومات والفيزياء لصالحه دايمًا، تحسه تلميذ شاطر مذاكر دروس الفيزياء والميكانيكا بتاعته كويس، بان ده جدًا في كذا مشهد زي مشهد غرق السفينة في عرض المحيط وانتشار بقعة زيت كبيرة بفعل الوقود اللي اتسرب منها، البقعة  بتبان لأول ثانية إنها ضل السفينة، لكن بتدرك مع اتجاه ضوء الشمس وازدياد حجم البقعة باستمرار إن ده زيت متسرب. المشهد العظيم والمؤسف في نفس الوقت، لما النار تمسك في الوقود وينزل جندي من الجنود تحت المياه علشان يهرب منها، طبعًا لإن الزيت كثافته أخف، فبيفضل على السطح بعيد عن الجندي، لكن أول ما الأكسجين في رئته بيخلص، بيضطر يطلع للسطح علشان يموت غرقان ومحروق في نفس الوقت، في واحدة من أبشع ميتات الفيلم.

هتشوف ده برضه في تحكم الطيارين في مستوى الوقود في الطيارة، عن طريق التحكم في مستوى ارتفاعهم عن سطح الأرض، بغض النظر عن سرعتك كل ما تزيد المقاومة على جسم المركبة هتستهلك وقود أكتر. من أكتر الحاجات العظيمة في الفيلم، ازاي تعمل فيلم بيتكلم عن الانسحاب ويبان على إنه نصر، لإنه نصر فعلا، لو نجاة 330 ألف إنسان من الموت مش نصر أمال إيه اللي ينفع يبقى نصر؟ عمومًا الانتصار الحقيقي للبشرية مش إنك تقتل عدوك، الانتصار الحقيقي هو إنه مايكونش لك عدو، بس ده كلام نظري ما بيتحققش، "تشرشل" اللي كان لسه مستلم مهامه قبل المعركة بكام أسبوع، عمل خطاب في البرلمان الإنجليزي يوضح فيه عظمة رجوع ولاد بريطانيا سالمين ليها، على الناحية العسكرية، الجنود اللي تم إنقاذهم في الإجلاء ساعدوا الحلفاء خلال المعارك التالية، وقلبوا موازين القوة في أماكن مختلفة من أوروبا.

مشهد حصار الطيار داخل طيارته، واللعب بالزمن المفضل عند نولان في كيفية شرح موقف واحد من كذا زاوية في كذا زمن، والأجمل طيران توم هاردي بطيارته لفترة طويلة بدون وقود كطيارة شراعية، والتحكم فيها لدرجة إنه يدمر طيارة قبل ما يقودها لمنطقة على الشاطئ بعيد عن سيطرة الحلفاء ووقوعه في الأسر، لكن بعد انقاذ حياة الآلاف في مشهد تكوينه مع الشمس عظيم جدًا، وهو المشهد الوحيد اللي بنشوف فيه خيال الجنود الألمان للمرة الأولى في الفيلم، وطبعًا إصرار نولان على إن الفيلم يتعمل بمعدات حقيقية، وده اللي خلاه يصرف 5 مليون دولار على تصليح الطيارة علشان تدمر في المشهد الأخير، وموسيقى هانز زيمر اللي محسسانا طول الوقت إن في قذيفة بتقع علينا واحنا مش عارفين نتفاداها.

ليه دانكرك فيلم سيء للغاية
عنوان فرعي: لم علينا عبيدك يارب
الحقيقية مش عارف أبدأ منين، لكن صحيح ماحدش بينجرح قوي غير لما بيحب قوي. كريستوفر نولان من أفضل المخرجين الأمريكيين اللي بحبهم (واللي هم قليلين أصلا)، وسبب عظيم من مضايقتي هو إني بحب أفلامه، وشوفتها كلها تقريبا بإستثناء "Following"

خلينا نرجع من تاني للجزء التاريخي، موقعة "دانكريك" بيتقال عليها في التاريخ أعظم عملية إجلاء بشري، محتمل يكون في أكبر زي عملية إجلاء الرعايا الهنود من الكويت أثناء حرب الخليج، بس الأكيد إن دي أكبر عملية إجلاء لعسكريين في التاريخ، طب هيفرق معانا ده في إيه؟! خليني أسألك سؤال واقف وقفه مع النفس، هل أنت حسيت بحجم الملحمة دي على مدار الفيلم؟!

من أول الفيلم وفي مشكلة كبيرة واضحة مع الأعداد، نسبة الأعداد اللي بنشوفها في كادرات الفيلم بالقياس للأرقام الحقيقية فيها اختلاف كبير جدًا، فاهم طبعا فكرة إنك اخترت تتكلم عن مركب بعينه من وسط مئات المراكب وتلات طيارات بعينهم من وسط مئات الطيارات، بس محتاج أحس بالأعداد دي، على الهامش يعني لازم أحس إن في الآلاف مشتركين في ملحمة وفي معركة عظيمة، بس أنا اخترت إن اللي يبقى in focus هم الشخصيات دي، نولان ما ادناش ال out of focus فيه إيه؟! 

تخيل إن اللي ظهر في الفيلم علشان يوضح أكبر عملية إجلاء عسكريين في التاريخ واللي تم فيها إجلاء 330 ألف إنسان، ما يتجاوزش 3 طيارات "Spitfire" بالإضافة ل 3 أو 4 سفن عسكرية، حوالي 50 مركب مدني، طبعًا الكلام ده كله بلح.

الأرقام الحقيقية بتقول إن بريطانيا خسرت 177 طيارة على مدار الأسبوع اللي تم فيه الإجلاء، يعني لو قسمناهم على الأسبوع يبقى بيخسروا كل يوم 25 طيارة، بس احنا كدة ماحسبناش أصلًا هم كام طيارة بيهاجموا، لو نولان كان ورانا ال 25 طيارة دول، كان إلى حد ما هيبقى منطقي. عدد الطيارات اللي خسرها الألمان في الإجلاء بس كانوا 240 طيارة! كل ده في أسبوع واحد، خصوصًا إن لولا الطيران البريطاني ماكانش الجنود عاشوا أصلا، لإن "هيرمان جورينج" قائد القوات الجوية الألمانية حب ينسب النصر لنفسه، فأقنع هتلر إنهم ما يعملوش هجوم بري كاسح، وإنه كفيل بتدميرهم بسلاح الطيران لوحده. مافيش أي حاجة ورتني إن في معركة جوية بالحجم ده بتحصل في سماء دانكريك.

عدد مراكب الصيد والمتطوعين المدنيين اللي شاركوا في الإجلاء حوالي 700 مركب مدني، كانت البحرية البريطانية وجهت نداء ليهم يساعدوا في عملية الإنقاذ بالإضافة ل 100 قطعة بحرية تابعة للبحرية الملكية البريطانية، وفي أرقام بتقول إنهم 202. اللي إحنا شوفناه في الفيلم لا يرقى بأي شكل من الأشكال للعدد الكبير ده من المراكب.

الفيلم بالشكل ده بيدي إيحاء إن لا الحلفاء كانوا مهتمين ينقذوا الجنود اللي في دانكريك بالقدر الكافي، ولا الألمان كانوا مهتمين إنهم يصفوهم، وده غير منطقي بالمرة، ما يقرب من نص مليون جندي اللي كانوا متحاصرين كفيلين بقلب موازين أي معركة على أي جبهة.

لسبب ما غير مفهوم الفيلم كله، مافيهوش نقطة دم، حقيقي هتضايق جدًا إن نولان يكون عمل ده فذلكة، وإنه عايز يتقال إنه أول مخرج يعمل فيلم عن الحرب العالمية بدون نقطة دم، ما عنديش أدنى مشكلة تعمل ده، بس يبقى ما تجبليش مشاهد جثث، ما تبقاش الجثث بتطير في الهواء بفعل القنابل وتنزل على الأرض مافيش نقطة دم، ده غير منطقي بالمرة!

في مشهد البداية، مجموعة من الجنود الإنجليز بيجروا في المدينة المهجورة بفعل المعارك من رصاص الألمان، وبيقعوا واحد ورا التاني ماعدا شخص واحد هو اللي بيقدر يفلت منهم ويتكلم مع الجنود الفرنسيين علشان مايضربوش عليه نار، ويعدي للمكان اللي متجمع فيه الجيش الإنجليزي والفرنسي المتحاصرين. هنتجاهل للحظة إن وضع القوات كان شبه ثابت على مدار أسبوع، وإن مش منطقي يبقي فيه جنود إنجليز في الجزء الألماني من المدينة، بس خلينا نفرض جدلًا إنهم كانوا في عملية خاصة ما أو اتأخروا لأي سبب من الأسباب، كانوا متحاصرين في مكان تاني مثلا، بتحصل، الجنود هدومهم نضيفة ومكوية أكنها جاية من الدراي كلين، شعرهم بيلمع، المدينة من وراهم جميلة وبتبرق أكنها مغسولة ومدهونة قبل المشهد ب 10 دقايق! على عكس الحقيقة التاريخية إن المدينة كانت هدف للمدفعية الألمانية لفترة طويلة، المدينة اللي بتتعرض للقصف بقالها أسبوع شكلها أنضف من شوارع التجمع الخامس دلوقتي، ومشهد وصول الناجي الوحيد من عملية الهرب لمكان تجمع القوات على البحر تحسه كان متأخر على أوتوبيس المدرسة، مش على عملية انسحاب في الحرب العالمية التانية!

بعد ما اتفرجت على الفيلم بيوم واحد، اترشحلي فيلم "Atonement" وشوفته لأول مرة، التجربة كانت ممتعة جدًا، كنت حاسس حقيقي إن عينيا سعيدة بكل مشهد وكل تفصيلة، الفيلم فيه مشهد مدته 5 دقايق بالظبط، بيدور في "دانكريك"، البطل بيوصل للساحل مكان تجمع القوات بعد رحلة هروب طويلة من القوات الألمانية، مافيش حاجة تقدر توصف جمال التفاصيل اللي اتصورت "one shot" في المشهد، لو جيت قارنته بفيلم نولان كله، هتحس إن "Dunkirk" فيلم عامله إنسان آلي، كل حاجة مرسوم مكانها، الجنود واقفين طوابير، مافيش أي عنصر بشري، مافيش حد بيشرب سيجارة، مافيش حد بيغني، مافيش أي عامل بشري في الموضوع، مش هشرح كتير أنت شوفت الفيلم، شوف بقى الخمس دقايق دول

مش عارف ليه ماحدش اتكلم عن الموضوع ده، لكن السفينة اللي اتدمرت في أول الفيلم اتدمرت بطوربيد بحري تحت المياه، أكيد في حاجة ضربت الطوربيد ده، المفروض إن غواصة ضربت السفينة، طب الغواصة دي عملت إيه بعد كده؟! يعني إزاي المراكب دخلت المرسى وأنقذت الجنود مع وجود الغواصة! طبعًا أسئلة مالهاش إجابة، الفيلم ضايقني جدًا ومش عايز حتى أديله تقييم بالأرقام، خلينا نقول إني هنسى إني شوفت الفيلم ده لحد ما أشوف فيلم نولان اللي جي.

Survival Is Victory But This Movie Didn’t Survive