الموسيقى التصويرية هي مود أو إحساس الفيلم أو المسلسل، درجة إحساسك بالعمل اللي بتشوفه بيتقاس على حسب تأثير المزيكا اللي بتسمعها، وجزء مهم من نجاح الفيلم بيكون معتمد على نجاح الموسيقى التصويرية، عشان ببساطة هي وجبة متكاملة، يا كل مقاديرها تطلع مظبوطة، وهتحس طعمها، يا مُكون من المكونات هيحسسك بإن الطبخة دي باظت أو ناقصة.

أفلام كتير ماكانتش حلوة، ومسلسلات كتير حبكتها ماكانتش كويسة، واللي أنقذها عامل المزيكا. رغم إن فيه موسيقى تصويرية اتكتب لها النجاح وفرقعت مع الناس، فـ على الجانب التاني فيه أكتر من موسيقى تصويرية اتظلمت وما أخدتش حقها بالكامل.
 
مسلسل بدون ذكر أسماء – محمد مدحت
أحداث المسلسل بتدور في التمانينات، والموسيقى التصويرية كانت مناسبة جدًا لأجواء المسلسل وادتني إحساس بالأحداث الاجتماعية والسياسية اللي بيدور حواليهم المسلسل. محمد بدأ بتأليف موسيقى تصويرية لأفلام قصيرة، وبدأ في الأعمال الدرامية بـ مسلسل "حكايات بنات" وألف الموسيقى التصويرية للـ 3 أجزاء، كمان مسلسل "كلبش" و"30 يوم".

فيلم ديكور – خالد الكمار
الاسم ده لسه ما أخدش فرصته، بس هو من أشطر مؤلفين الموسيقى التصويرية دلوقتي، وهيكون له مستقبل عظيم. "خالد" ألف مزيكا فيلم "ديكور" اللي فاز بـ جائزة أفضل موسيقى تصويرية بالمهرجان الكاثوليكي في 2015. ولو تابعت مسلسل "أفراح القبة"، يبقى حبيت الموسيقى التصويرية بتاعته. خالد كان مُدون موسيقى المسلسل بجانب هشام نزيه. "خالد" ألف مزيكا مسلسل "الخانكة"، وتوزيع الأوركسترا في فيلم "لا مؤاخذة".

 فيلم الوتر – أمير هداية
الفيلم ماحققش النجاح المطلوب، بس المزيكا سمّعت مع الناس. بطلة الفيلم غادة عادل كانت بتلعب كمانجا، وده ساعد "أمير" إنه يألف مزيكا عظيمة، تحسسك المود العام الدرامي للفيلم. "أمير" ألف الموسيقى التصويرية لأفلام زي "على جثتي" و"بشتري راجل".

  مسلسل الكابوس - أحمد عاطف
الاسم ده لسه ماتسمعش كويس، بس هيبقى له بصمة واضحة في مجال تأليف الموسيقى التصويرية.

فيلم برتيتا – خالد حماد
اسم لِيه تُقله، والجوايز والشهادات اللي فاز بيها بتتكلم عن إبداعه المتواصل. "خالد" ألف الموسيقى التصويرية لأكتر من 50 فيلم، و20 مسلسل. ومن أهم الحاجات اللي عملها وما أخدتش حقها، هي مزيكا فيلم "برتيتا"، حتى لو ماتفرجتش على الفيلم، كفاية تسمع المزيكا وتعيش معاها، مش بس مزيكا الفيلم ده، لكن أي مزيكا بتخرج من تحت إيد "خالد".

فيلم نوارة – ليال وطفة
نادرًا لما بنلاقي مؤلفات موسيقى تصويرية في الوطن العربي، بس "ليال" عملت الفرق ده. موسيقية سورية بدأت في تأليف الموسيقى التصويرية وهي عندها 22 سنة، ومن أهم أعمالها (نوَّارة – قبل زحمة الصيف) بجانب الموسيقيى التصويرية العظيمة لمسلسل "موجة حارة"، ومسلسلات عربية.

مسلسل الحصان الأسود – مصطفى الحلواني
مصطفى من أشطر الملحنين ومؤلفي الموسيقى التصويرية الموجودين حاليًا، ومشواره بدأ من بدري بفيلم "عجميستا". شارك في تأليف موسيقى تصويرية لأفلام ومسلسلات وبرامج وأفلام قصيرة وده جزء كبير من شطارته، إن في السنة ممكن يألف مزيكا لفيلم ومسلسل وكل واحدة تبقى أحلى من التانية.

 فيلم فيلا 69 – سمير نبيل
فيه حد قال قبل كده إن ذكاء المؤلف الموسيقي بيعتمد على مدى إحساسه بالقصة المعروضة قدامه، فـ لو الفيلم بيتكلم عن بطل حزين ومنعزل عن الناس، المزيكا هيبقى ليها عامل مهم في التأكيد على توصيل الفكرة دي للمشاهد. "سمير" نجح في ده رغم إن أعماله محدودة جدًا، ومشاركاته بتكون في أفلام قصيرة في الغالب، زي فيلم "17 شارع فؤاد"، وفيلم "ألف رحمة ونور".

فيلم علي معزة وإبراهيم – أحمد الصاوي
"أحمد" وجه جديد في المجال، وهينجح في إنه يحقق حاجات تعلّم مع الناس. ألف مزيكا فيلم "على معزة وإبراهيم" و"زهرة الصبار" وحاليًا بيشارك في تأليف مزيكا الفيلم السوري "قانون نيوتن التالت" ولسه ماتعرضش. 

فيلم هيستريا – هشام نزيه
صوت أحمد زكي في الأغاني اللي ماتتنسيش ودور عبلة كامل، دي الحاجات اللي علّمت مع الناس في فيلم هيستريا. بس كان فيه جزء مهم لـ هشام نزيه اللي نجح في أول اختبار لِيه في الفيلم ده، وحاول يخلي للمشاهد طعم تاني.
آخر عمل شارك فيه "هشام" كان فيلم "تراب الماس"، وكالعادة بينجح كل مرة في إنه يبهر الجمهور.