الصورة (المتحركة) متكملش من غير مزيكا، لازم المزيكا عشان تعزز وتثير المشاعر عند المتفرج، وعشان تقدر تحط المشاهد في وضعية معينة بحيث يربط مشاعره بالمنظر اللي قدامه. ده بالنسبة للموسيقى التصويرية طب وبالنسبة لتتر المسلسل؟ طبيعي إن التتر يكون مرتبط بالفكرة وجوهر القصة بتاعت المسلسل ومعبر بدرجة كبيرة عن أحداثه، حتى ولو بشكل بسيط جداً أو بشكل صاخب أو بأي شكل.

المسلسلات الأجنبي أبدعت وتنوعت في المزيكا المستخدمة في التتر، ولكل مسلسل نوع و شكل مختلف عن التاني حتى لو نفس الموسيقار، وعشان كده في مسلسلات ماتقدرش تمل من التتر بتاعها ومش بتعدي التتر وتفضل مستنيه وبقي جزء مهم من المسلسل.

مزيكا تتر مسلسل جيم اوف ثرونز GOT للمبدع الموسيقار إيراني الأصل رامين چادي. الطبول في المزيكا بتأهل المشاهد للصراعات اللي مش بتنتهي، ومش مقصود منها الحروب، لكن فكرة الاستعداد الدائم إن أنت في صراع على العرش. الآلات الموسيقية زي التشيلو والكمنجات عشان تدي انطباع درامي متوازن، ما بين قوة الخير وقوة الشر في الصراع.

مزيكا تتر مسلسل ويست ورلد West World لنفس المبدع الموسيقار رامين چادي. بس المرة دي عمل حاجة مختلفة عشان القصة مختلفة بس اما تسمع الاتنين تقول أكيد ده نفس الطباخ، عشان نفسه في الأكل باين. تتر المسلسل (موسيقياً) فيه فكرة التعاطف مع الضحية وفي نفس الوقت الضحية دي ملهاش روح. وبعيدًا عن المسلسل، المزيكا دي لوحدها تتسمع من غير ما تتفرج على المسلسل أصلاً.

في مسلسلات بتعتمد على الممثل الواحد، زي مسلسلات السوبر هيرو، منها دير ديفل daredevil مثلاً. تتر المسلسل للموسيقي John Paesano.

صعب تفصل الصورة بتفاصيلها المعبرة عن شخصية البطل عن المزيكا، بمعنى كله في قالب واحد، العدالة العمياء هو اللحن المتكرر بأصوات مختلفة، والإيمان في محاربة قوى الشر بيظهر في اللحن التاني اللي بيدخل بعد كده عشان يوتر أحداث التتر.

تتر مسلسل Jessica jones للموسيقي Sean Callery اللي قدر يبعد المشاهد عن التركيز على جانب واحد من السوبر هيرو اللي هو القوة الخارقة، وراح لمنطقة تانية وهي فكرة السوبر هيرو ده كإنسان عادي.

المكان والثقافة والمزيكا مرتبطين ببعض وعشان تقدر تخلق جو مناسب للثقافة والمكان، يبقى لازم نوع مزيكا معين معبر عن كل ده في وقت واحد عشان الصورة تكمل، هنا ييجي مسلسل Luke Cage. تتر المسلسل اشترك في صناعته اثنين مع بعض، Adrian Younge و Ali Shaheed. الاتنين عملوا مزيكا تعبر عن الثقافة والمكان اكتر ما تعبر عن فكرة السوبر هيرو.

مجرد 48 ثانية ممكن يخليكم متوترين جدا وال 48 ثانية دول مش هتتوقع امتى هتبدأ، لان التتر بيكون بعد أول دقيقة أو أكتر من الأحداث، ده مسلسل The Walking Dead. التتر للموسيقي Bear McCreary ومن غير ما احرق المسلسل للناس بس فكرة الألحان السريعة دي أكتر حاجة معبرة عن توتر الأحداث، لدرجة إن في ناس مش قادرة تكمل المسلسل بجد.

دلوقتي بقى في مسلسلات لها طابع وجو عام كده، يعني مسلسل معبر عن فترة زمنية معينة وجيل معين أو عن فكرة وفئة معينة من الناس زي stranger things. تتر المزيكا للموسيقيين Kyle Dixon وصديقه Michael Stein ودي ناس بتعمل مزيكا الكترونيك وفعلاً قدروا يعملو مزيكا تناسب فترة الثمانينات اللي أحداث المسلسل بتدور فيها، وكمان خلقوا جو الخيال العلمي بتاع نفس فترة أفلام التمانينات.

مسلسل الكرتون Rick and Morty. تتر المسلسل للموسيقي المبدع Ryan Elder اللي أصلا كان عامل المزيكا لمسلسل تاني، بس في الآخر الموضوع ركب على المسلسل ده، عشان الصفارة طبعاً اللي بتدي انطباع الفضاء والخيال العلمي.

وطبعاً مانقدرش نفوت مسلسل زي تتر اكس فايل عشان ده ترسخ في دماغنا من أيام القناة الأولى. قدر فعلاً الموسيقار العبقري Mark Snow إنه يخلق انطباع صوتي يدوم مدى الحياة، اللي هو استخدام الصفارة بصوت معين مع مزيكا معينة، يدي انطباع الفضاء والغموض.

أكيد في تترات لمسلسلات تانية قوية وكمان ممكن نكون مش واخدين بالنا منها، عشان كده احنا كتبنا 9 مسلسلات بس والعشرة دي بتاعتكم أو حتى اكتبوا القائمة بتاعتكم.