• اكتب معانا
  • ماتنسناش
  • تابعنا
الموضوع اللي جاي
دليلك المصري لخروجات العيد
الموضوع اللي فات
مصور بيعمل منتجات مستوحاة من شخصيات فنية

أفضل 8 مؤلفين موسيقى تصويرية للمسلسلات المصرية

إسم المؤلف الموسيقى على التتر شهادة جودة

عمر خيرت
مؤلف موسيقي وموزع وعازف بيانو مصري، واحد من أهم المؤلفين الموسيقيين في العصر الحديث، كان من أوائل اللي دخلوا الأوركسترا في الموسيقى المصرية، سبقه في الموضوع ده عمه العظيم "أبو بكر خيرت"، علشان كدة بنقول إن عمر خيرت هو الوريث الشرعي لعمه.

بتتميز المزيكا بتاعته اللي ألفها كموسيقى تصويرية، بدخول الجزء الأوركسترالي الشرقي، مع بيانو المايسترو، عنده أعمال موسيقى تصويرية كتير لمسلسلات زي "اللقاء التاني، قضية عم أحمد، ضمير أبلة حكمت، ملح الأرض، دهشة، الخواجه عبد القادر، البخيل وأنا، صابر يا عم صابر، وأعمال تانية كتير. تقدر تقول إن مزيكته أنيقة شبهه، لابسة التوكسيدو، وقاعدة على بيانو، وبتحكيلنا القصة.



عمار الشريعي
واحد من أعظم المؤلفين الموسيقيين المصريين على الإطلاق، تحس مزيكته شبهه، المزيكا اللي طالعه من صاحبك المزيكاتي اللي قاعد معاك ع القهوة ومطحون وياك ويا همومك، بيطلع ألحان بريحة البيوت القديمة والبحر والذكريات، ضربة عود ما بتترددش زي اللي عنده حدوتة طويلة وبيحكيها بحماس شديد.

شوية تلاقيه في لحن "الراية البيضا" اللي مليان طيبة ومالينا تحدي للشر اللي بتمثله فضة المعداوي، لكنك ما تقدرش تفصل نفسك عن جمال الفيلا وكل تفصيلة المزيكا بتتكلم عنها. عمار الشريعي حكى حواديت كتير للمسلسلات، حكى حواديت "الزيني بركات"، و"نصف ربيع الآخر"، "أرابيسك" و"حسن النعمان" و"الولا سامبو"، و"زيزينيا" الجميلة، ورائعته "رأفت الهجان" وغيره كتير

ميشيل المصري
واحد من شيوخ الموسيقى التصويرية المصريين، من مواليد سنة 1933، على الرغم من إن أغلب إنتاجه من الأفلام، لكنه أعماله للمسلسلات المصرية كانت مميزة جدًا وعاشت معانا، يكفي إني أقولك إنه صاحب موسيقى مسلسل "ليالي الحلمية"، مزيكته دايمًا أقرب لقلب المدينة، من حواديته الموسيقية لحنه ل "من الذي لا يحب فاطمة" و "الفنار" و "أبناء ولكن".

جمال سلامة

دكتور الموسيقي التصويرية، تقريبًا كل ألحانه المشهورة ليها تيمة إنها بتعلق جدًا في الدماغ، هتفهم قصدي لما تعرف إنه اللي لحن "قال جاني بعد يومين" و "احكي يا شهر زاد"، و"ساعات ساعات"، وتتر مسلسل "محمد رسول الله". كان أول حد يدخّل آلة البيانو في تلحين حاجة دينية، للدرجة اللي خلت مخرج "محمد رسول الله" يقوله أنت هتكفر؟! درس في الاتحاد السوفيتي وعزف ورا أم كلثوم، لحن مجموعة كبيرة من المسلسلات، منهم "جمهورية زفتى"، "الإمام الأعظم أبو حنيفة النعمان"، "حارة المحروسة"، "الفرسان". "ذئاب الجبل".

بالإضافة لمكتبة كبيرة جدًا من الموسيقى التصويرية للأفلام المصرية، اللي أهلته يكون من أفضل من قدموا الموسيقى التصويرية للأعمال الفنية في مصر.

ياسر عبد الرحمن 

واحد من أفضل من قدموا الموسيقى التصويرية المصرية، وادوها طابع وشكل مميز مرتبط بالشجن في أغلب الأحيان، ليه حواديت موسيقية كتير مع موسيقى أفلام مشهورة مميزة جدًا، زي "المواطن مصري، الامبراطور، عرق البلح، ناصر 56، أيام السادات، الطريق إلى إيلات، ملاكي اسكندرية، حسن ومرقص، ليلة البيبي دول وغيرهم كتير هنتكلم عنهم بالتفصيل في موضوع تاني بيتكلم عن الموسيقى التصويرية للأفلام، لكن احنا بنتكلم عن الموسيقى التصويرية للمسلسلات.

أسلوب "ياسر عبد الرحمن" مميز جدًا، بيعتمد بشكل أساسي على آداته الموسيقية المفضلة "الكمان"، المزيكا بتنطق شجن مصري، بتحكيلك الحكاية فبتشوفها وتتأثر وتغلبك عينيك. من المسلسلات اللي موسيقى "ياسر عبد الرحمن" اديتلها الحياة "السقوط في بئر سبع" الرواية اللي كتبها والده الأديب "عبد الرحمن فهمي" وجسدت عملية من عمليات المخابرات العامة المصرية، "المال والبنون" واحد من روائع التسعينات، واللي موسيقته عايشه للنهاردة، ومافيش حد ما يقدرش يميزها من اللحظة الأولى، ورائعته "الضوء الشارد"، مافيش شخص ممكن يسمعها في أي وقت غير ويشوف وشوش صعايدة بالعمم والنبابيت، يمكن ده اللي خلاه برضه من أفضل اللي عبروا في مسلسل زي"خالتي صفية والدير"، ولسه بيحكي حكاوي كلها شجن بموسيقته واحنا لسه بنسمع ونهز راسنا ونستمتع.

تامر كروان
واحد من 3 عواميد قايمة عليهم الموسيقى التصويرية في آخر 4 مواسم رمضان، للدرجة اللي تخليك لما تقرأ اسم واحد فيهم على التتر تتوقع إنك هتتفرج على مسلسل جميل هيبسطك. تامر دخل مجال التأليف الموسيقي سنة 1998، لكنه درس قبلها الموسيقى في الأكاديمية الملكية للموسيقى بلندن، "كروان" بيحب كتير يدخل أصوات من البيئة في المزيكا بتاعته، يعني تلاقيه في "واحة الغروب" مدخل أصوات من الصحرا والإبل، "شقة مصر الجديدة" مدخل أصوات مصر الجديدة الصبح والحركة الجميلة الهادية، تحس إنك سامع في المزيكا ضوء الشمس اللي داخل من ورا الستاير يغازل عينين بنت الصعيد اللي وصلت القاهرة تدور ع الحب، فتسمع صوت زقزقة العصافير على الشجر، مقطوعة مزيكا قدرت تخليك تشوف المشهد تحس بإضائته تشم ريحة كل تفصيلة في المكان وقلب يرقص مع المزيكا.

في رمضان السنة دي عملنا "واحة الغروب" وهو اللي اختار يقدملنا واحد من أجمل المواهب اللي اتقدمت خلال الفترة اللي فاتت، "وائل الفشني"، مزيكا تامر وصوت الفشني مع أحلام الدنيا المهددة طول الوقت، خلوا قلوبنا تتحرك وهو بيقول "والله فراق الحبايب مر يوجعني"

أمين بوحافة
العمود التاني من عواميد الموسيقى التصويرية اللي أثبتوا حضورهم بقوة آخر 3 سنين، الملحن والموسيقي الأصغر سنًا في القايمة، من مواليد سنة 1986 في تونس، ابتدى إنتاج أول موسيقى تصويرية لأول مسلسل ليه في 2014 من النجم محمود عبد العزيز في مسلسله "باب الخلق"، ومن أول عمل فني ليه وهو حاطط بصمة مبهرة تقدر تشوف بيها روحه جوه موسيقته، تفضل تتنقل مع أعماله في السيدة الأولى وطريقي وجبل الحلال، لحد ما تدخل معاه حارة اليهود، فتتحول كل مزيكته لبنايين ونقاشين وصنايعية بيبنولك المشهد تشوفه قدام عينك، تضحك وتعيط معاهم وتسمع جواب ليلى ولو غمضت عينك هتبقى برضه شايفها هي، وعلي وكل واحد فيهم عينيه وقلبه بيقولوا إيه.

لكن أعظم اللي قدمه من وجهة نظري كان "جراند أوتيل"، المسلسل نفسه جميل جدًا وظهرت المزيكا كبطل من أبطال المسلسل، دوره ما يقلش بأي حال عن محمد ممدوح وأنوشكا وأحمد داود، وكل أبطال المسلسل، والسنة دي أتحفنا ب "لا تطفئ الشمس"، فيبقى حاجة من الحاجات الجميلة اللي أنقذت المسلسل، و"هذا المساء" اللي كمل بيها الوجبة العظيمة اللي عملها "تامر محسن" 

هشام نزيه
الضلع التالت الأقدم من أضلاع موهوبي الموسيقى التصويرية اللي مسيطرين حاليًا على مسلسلات رمضان واللي بتطمن على إني هتبسط بالمسلسل لمجرد إنهم فيه، أول ما تسمع الموسيقى التصويرية لفيلم"هيستريا" سنة 1998، أول موسيقى تصويرية من تأليف "نزيه" تقدر بكل سهولة تكتشف إنك قدام موهبة عظيمة بتتولد، وإيمانك بيكبر مع الأيام، لما تشوف إبداعه في "السلم والتعبان"، الفيلم اللي ارتبط بجيل كامل، وموسيقته كانت أحد أهم أبطاله، تحس إن موسيقى هشام بتكبر وبنكبر معاها.

لحد ما ييجي فيلم "تيتو" واحد من أكتر الأفلام اللي مزيكته أثرت في حياتي، يمكن ده اللي بيخلي موسيقى "هشام نزيه" هي الأقربلي على الإطلاق، آخر 4 سنين، هشام متعنا بموسيقته التصويرية بداية من شربات لوز سنة 2012، بعدين تألق جدًا في موسيقى مسلسل "نيران صديقة" اللي تحسه بداية مرحلة جديدة من الموسيقى التصويرية للمسلسلات في مصر، أكد ده في السنة اللي بعدها لما عمل الموسيقى التصويرية لمسلسل "السبع وصايا"، ودمج الألحان والأغاني الصوفية مع موسيقته كونت مزيج من وجهة نظري لو ماكانش موجود ماكنتش هقدر أكمل المسلسل للنهاية، لإنه فعلا واحد من الأبطال الرئيسيين، مسلسل العهد مزج ألحان قبطية قديمة بالموسيقى، عملت مزيج أثار الجدل في الوقت ده، لكنه أثبت موهبته كالعادة.

Home
خروجات النهاردة
Home
Home