إيطاليا مشهورة بالبيتزا، إنجلترا مشهورة بالشاي، كندا عندهم صوص الـmaple ومصر مشهورة بالأهرامات مش كده؟ في الواقع مصر فيها أكتر من كده بكتير، فيها تاريخ، أكل وثقافة وكل محافظة فيها حاجات كتير مستخبية في الأغلب ماحدش يعرف عنها أي حاجة، علشان كده احنا عملنا ليست بالحاجة اللي كل محافظة مشهورة بيها.

١- الإسكندرية: الطيران الرخيص

عروس البحر المتوسط مشهورة بحاجات كتير، بس الأهم إنها مشهورة بالطيران الرخيص نسبيًا

٢- أسوان: السباحة في النيل

أول حاجة بتيجي في بال أي حد لما نقول أسوان، هو الجو شديد الحرارة وماكناش عارفيين ازاي ممكن حد يستحمل يعيش هناك، لحد ما اكتشفنا إن أسوان المكان الوحيد اللي ممكن تعوم فيه في النيل.

٣- أسيوط: العسل الأسود

مصر فيها ٤ مصانع للعسل الأسود وكلهم في أسيوط، احنا بنتكلم عن أسطورة هنا

٤- البحيرة: وأوبرا دمنهور

كلنا عارفيين الأوبرا في القاهرة وإسكندرية، الجديد هو إن في أوبرا في دمنهور، ده كان اكتشاف بالنسبالنا

٥- بني سويف: الهرم الأوسط

أول حاجة بتيجي في بال حد أجنبي لما تسأله عن مصر هي أهرامات الجيزة، بس قليلين أوي اللي يعرفوا إن في هرم في بني سويف اسمه الهرم الأوسط.

٦- القاهرة: الزحمة
أعتقد مش محتاجين نقول حاجة عن الموضوع ده، اللي مش عارف، يطلع كوبري أكتوبر يوم الاتنين ساعة انصراف الموظفين وطلبة المدارس

٧- الدقهلية: الرعاية الصحية العالمية

بغض النظر عن شهرتهم بالبنات الحلوة، الدقهلية فيها تاني أحسن مؤسسة لعلاج أمراض المسالك البولية وأمراض الكلى في العالم بجامعة المنصورة

٨- دمياط: الزفة

أثاث دمياط مشهور عالميًا، بس قليل اللي يعرفوا إن أشهر حاجة جاتلنا من دمياط هي الزفة، أيوة هي الشئ المزعج اللي بيبقى قبل الفرح

٩- الفيوم: متحف الكاركتير وسلال النسيج

قرية يونس في الفيوم مش بس مشهورة بمدارس صناعة الفخار ومزارع الفراخ، بس مشهورة كمان بمتحف محمد عبلة للكاركتير اللي فيه أكتر من ٥٠٠ رسمة كاركتير من ٥٠ فنان مختلف من مصر والوطن العربي. الفيوم برضه مشهورة بصناعة السلال واللي يعتبر تقليد بيعود لأيام الفراعنة، غالبًا السبت اللي عندكم في بلكونة بيتكوا جاي من هناك

١٠- الغربية: مهرجانات الصوفية

طنطا عاصمة الغربية مشهورة بالاحتفال الصوفي السنوي، وده نسبة للسيد البدوي اللي مدفون في مسجد متسمى باسمه

١١- الجيزة: سوق الجمال

طبعًا أشهر حاجة في الجيزة هي الأهرامات، بس اللي ماتعرفوش بقي إنها معروفة بسوق الجمال العملاق اللي موجود في كرداسة. ملحوظة صغيرة: لو روحت بدري ممكن تاكل كبد جمل ني، عارفيين إن الموضوع يبدو مقزز شوية بس في الحقيقة طعمه حلو!

١٢- الإسماعيلية: بحيرة التمساح

يمكن ماتكنش عارف المعلومة دي، بس الإسماعلية بتقع على بحيرة التمساح، شط البحيرة مشهور عند السكان المحليين، ممكن يقضوا وقت هناك يشوا وياخدوا الشاي بتاعهم ويعوموا لو حابين.

١٣- كفر الشيخ: الفسيخ والسجاد

ملوك وملكات الفسيخ عايشين في كفر الشيخ وبيقعدوا على سجاد يدوي برضه معمول في كفر الشيخ!

١٤- الأقصر: الموز

الأقصر مشهورة بكونها واحدة من أهم الجهات السياحية اللي مليانة آثار في مصر، بس حاجة مهمة ماتعرفهاش، الأقصر فيها جزيرة الموز اللي بتعتبر مصدر لأغلب محصول الموز في مصر.

١٥- مطروح: اللب

أي مصري أصيل عارف قيمة اللب وأحسن لب ممكن تاكله هتلاقيه في مطروح

١٦- المنيا: يافطة المنيا

ممكن تفتكر إن أهم حاجة بخصوص المنيا هي البطاطس، بس في الأهم بقى، هي يافطة المنيا اللي اتعملت علشان تبقى شبه يافطة هوليوود بس ضربت منهم.

١٧- المنوفية: الفطير المشلتت

طبعًا كلنا كمصريين بنحب الفطير وبندعى إننا جربنا، بس أنت ماينفعش تعبتر نفسك كلت فطير طالما مادوقتش من إيد حد منوفي أبًا عن جد

١٨- الوادي الجديد: الكوخ الصحراوي

يمكن تفتكر إن أشهر حاجة في الوادي الجديد هي كمية الرملة اللي مش منطقية هناك، بس في الواقع هو مشهور أكتر بالفندق اللطيف دا

١٩- شمال سيناء: الفيروز

أكتر حاجة بتميز شمال سيناء هو الحجر الكريم العظيم ده

٢٠- بورسعيد: المعمار الفرنسي

لما الفرنسيين بنوا قناة السويس، قعدوا شوية في بورسعيد وسابوا وراهم معمار جميل واللي بتشتهر بيه المدينة دلوقتي

٢١- القليوبية: العسل الأبيض

أحلى عسل ممكن تاكله هتلاقيه في بنها، واللي معروفة برضه باسم “بنها العسل”

٢٢- قنا: قصب السكر

قصب السكر اللي في قنا أكبر دليل إن ربنا موجود وإنه بيحبنا

٢٣- البحر الأحمر: أشجار المانجروف

معروف إن شهرة البحر الأحمر بتتمحور حوالين الطبيعة، بس الشهرة الأكبر تروح لأشجار المنجاروف، المكان مابيخلاش منهم

٢٤- الشرقية: الحوواوشي

لو ماكلتش حوواوشي من الشرقية فأنت ماكلتش حوواشي أصلًا، وفي قرية هناك اسمها العزيزية بياكلوا الحوواشي كل يوم أربع بقالهم ١٨ سنة!

٢٥- سوهاج: مدينة أبيدوس

سوهاج مش مجرد مدينة زراعية، لكنها واحدة من أهم المناطق الأثرية في مصر

٢٦- جنوب سيناء: الأعشاب

جنوب سيناء مشهورة أوي بالشواطئ والحياة البرية بس الأهم من دا كله…الحشيش!

٢٧- السويس: الأكل البحري أو السي فوود

معلومة صغيرة ليك وللزمن: أحلي سي فوود في مصر هتلاقيه في السويس والإسكندرية