عشان كلنا بندوَّر على الاختلاف، خاصةً في أذواق اللبس والموسيقى، قررت "دانيا غنيم" تأسيس Canvas عشان تقدم جواكت مختلفة شوية، كل قطعة بتصميم اتعمل مرَّة واحدة بس ومش هيتكرر تاني. يعني هاتلبس وأنت مطمِّن إن التصميم ده ماحدش غيرك من وسط 7 مليار هيلبسه.

"دانيا" بدأت مشروعها من شهرين بس، وهدفها منه لفت النظر للفنانين المصريين وخلق فرص ليهم عشان يتحدوا الإنتاج العالمي الضخم، عشان كده اتعاونت فيه مع مصممين أزياء زي ديالا نجيب و Shanwar Illustration وراما دسوقي وسلمى زكريا. وسمِّت خطها الأول Drama Volume  وكان عبارة عن تصميمات Denim Jackets.

بتقول "دانيا" إن كل قطعة بيصممها فنان مختلف، فـ طبيعي تبقى روحها كمان مختلفة مش بس التصميم والشكل، "كنت عايزة شيء صادم وفيه فن، وده اللي قولته للفنانين وطلبته منهم."

فيه فن اسمه فن الشيء الفريد من نوعه، ده اللي كانت بتحاول "دانيا" تشتغل عليه وتنجح فيه، وفعلًا حققت ده من خلالها تعاونها مع الفنانين اللي اتكلمنا عنهم. وفي الفترة اللي جاية ناوية تتعاون مع موسيقيين و DJ عشان تشوف هيقدروا يخرَّجوا ايه في تصميم اللبس. بتقول: "نستاهل نكون مميزين مش كلنا نسخ من بعض, وبدأت باللبس عشان نفسي كل واحد يلبس حاجة بتعكس شخصيته"

"دانيا" بتقول إنها بترحب بأي فنان مصري، وإن الموضوع غير مقتصر على تصميم الأزياء بس. "عايزة أبقى مشاركة في المشهد الفني بشكل عام."

القطعة الجاية هيكون مكتوب عليها "التكرار يقتل"، ودي من أكتر الجمل اللي بتعكس نظرة "دانيا" في الحياة وكرهها للروتينية والتكرار.

شوف Canvas من هنا.

واقرأ الموضوع بالإنجليزي من هنا.