محافظ القاهرة السابق، "جلال السعيد"، طلع قرار من فترة بتشكيل لجنة لمراجعة الأسماء "الغريبة" اللي مالهاش سبب أو أصل في شوارع القاهرة، وفعلًا بدأوا يغيروا أسماء شوارع وصل عددهم لـ 100 شارع، بس كلهم اتسمَّوا بأسامي شهداء جيش وشرطة فقط. من ناحية تانية، في كام شارع باسم ست في مصر؟ حاولنا ندوَّر على رقم دقيق لكن ماوصلناش لمعلومة، بس لو هنقيسها بطريقة بدائية بسيطة، كام شارع من وسط الشوارع اللي بتمشي فيها كل يوم متسمي باسم ست؟ ونسبة الشوارع دي للشوارع المتسمية بأسامي رجالة ممكن تبقى كام لكام؟

لو حاسس إني بركز في تفاصيل غريبة أو إن موضوع أسامي الشوارع كله على بعضه مايستاهلش، فـ أنت محتاج تعرف إن أسامي الشوارع ليها دلالة رمزية كبيرة، بعد ثورة يوليو مثلًا بدأت حكومة "عبد الناصر" تغيّر أسامي شوارع زي "شارع فؤاد" اللي بقى شارع "26 يوليو" -وده تاريخ تأميم قناة السويس- وميدان التحرير، اللي ممكن تبقى بتعدّي عليه كتير، اسمه الأصلي كان "ميدان الإسماعيلية" نسبة للخديوي إسماعيل، وشارع طلعت حرب اللي كان اسمه شارع "سليمان باشا". مش بس زمان، حتى في عصرنا الحديث، أسامي الشوارع شيء رمزي ومهم. السعودية بدأت مؤخرًا تسمي الشوارع بأسماء ستات، زي "رفيدة الأسلمي" أول ممرضة في الإسلام، و"حياة سندي" الطبيبة السعودية اللي تعتبر من أحسن أطباء العالم. أينعم الشوارع اللي اتسمت على أسامي ستات دي جوا "مجمع طالبات" بس برضه هي خطوة مهمة.

مين بيختار أسامي الشوارع؟

الموضوع في مصر بيبدأ بتقديم مقترح من مواطن أو جهة حكومية للمحافظة، بتغيير اسم الشارع الفلاني للشارع العلاني، غالبًا بتبقى أسماء مالهاش معنى أو معانيها خارجة، وبعد ما توصل عدد المقترحات لـ 10، فيه لجنة في المحافظة بتعقد عشان ياخدوا قرار. اللجنة بتتشكل من: سكرتير عام المحافظة، والسكرتير العام المساعد، أساتذة متخصصين في التاريخ الإسلامي والمعاصر، ممثلي الضرائب العقارية والبريد والمساحة، ممثل من العلاقات الإنسانية في وزارة الداخلية، ممثل عن وزارة الدفاع، مدير مديرية التربية والتعليم بالمحافظة، رئيس الحي، ممثل عن مديرية الأوقاف، ورئيس لجنة الحفاظ على التراث في المحافظة.

هو القانون بيقول إيه؟

طبعًا مافيش قانون بيقول إن الشوارع بأسامي ستات تبقى أقل من الشوارع بأسامي رجالة، القانون المختص بالموضوع ده هو قانون رقم 189 لسنة 1966، وبيشمل "قواعد إطلاق واستبدال تسميات الشوارع ونظام تكريم الشهداء والأعلام الراحلين". بيقول إيه بقى؟ الشوارع العامة بتتسمى بأسماء تاريخية، أو باسم أعظم بناء أثري فيها، أو باسم أشهر حادثة تاريخية حصلت فيها، أو باسم أول من عمرها أو سكن فيها، ويراعى تخليد الأشخاص البارزين في تاريخ مصر في عصورها ((المختلفة)).

لمَّا دوَّرت شوية في الشوارع المتسمية بأسامي ستات، لقيت إن نقطة العصور المختلفة دي مش معمول بيها، ازاي؟ شوف بنفسك إيه أهم الشوارع المتسمية بأسامي ستات:

1) شجرة الدر - 1257

"الموت بضرب القباقيب"، تقريبًا كلنا فاكرين الجملة دي من دروس التاريخ. دي الموتة اللي في الأغلب اتعرضت ليها "شجرة الدر" اللي اتباعت في سوق العبيد وهي طفلة لكن ده مامنعهاش من تولي حكم مصر. المصريين ولاد أصول ولسَّه فاكرينها رغم إنها حكمتهم 80 يوم بس ومسمّين شارع متفرع من 26 يوليو باسمها في الزمالك، وشارع تاني في مدينة دمنهور

2) عائشة التيمورية  - 1840 : 1902

"بيدي العفاف أصون عز حجابي" من أشهر أبيات الشعر اللي كتبتها، والأبيات القليلة اللي نجت من الحرق بعد ما قررت "عائشة" تحرق كل أعمالها الأدبية بعد موت بنتها. شارعها موجود في جاردن سيتي.

 3) هدى شعراوي - 1879 : 1947

من أوائل الـ Strong independent women في تاريخ مصر الحديث، صاحبة أول مدرسة ثانوي للبنات واللي طالبت من أكتر من 70 سنة برفع سن جواز البنات لـ 16 سنة ومنع تعدد الزوجات إلا للضرورة وحق الستات في التصويت في الانتخابات. أبوها كان رئيس مجلس النواب، لكن برغم ده كانت بتلاقي صعوبة في شراء الكتب عشان في زمنها -وهي من مواليد 1879- كان تعليم البنات وتثقيفهم مهمة مش سهلة ومش مقبولة من المجتمع. 

أي حد بينزل وسط البلد عارف إن شارعها متفرع من طلعب حرب، ورابط بين باب اللوق والسيدة زينب. 

4) فاطمة اليوسف - 1898 : 1958

جريدة روزاليوسف يمكن مش هي أهم جريدة في مصر دلوقتي، لكن وقت إصدارها سنة 1925 كانت طفرة بكل المقاييس، خاصةً إن رئيسة تحريرها -اللي اسم شهرتها برضه روزاليوسف- كانت ست، ومش صحفية. الجريدة أول ما بدأت كانت فنية مش سياسية زي ما اتحولت بعد انضمام "فاطمة" لحزب الوفد. "فاطمة اليوسف" اسمه شارع موجود في منطقة سبورتنج في إسكندرية، وشارع تاني موجود في السيدة زينب.

5) أم كلثوم - 1898 : 1975

 الشارع الشهير في الزمالك كان اسمه الجبلاية، وبقى اسمه "أم كلثوم".

ده غير فندق "أم كلثوم" كان زمان بيتها، وبعد موتها اتحول فندق. كمان فيه تمثال "أم كلثوم" اللي محطوط قدام فندقها في شارع أبو الفدا في الزمالك.

"أم كلثوم" شهرتها امتدت لدول كتير ووصلت لإن بقى ليها شارع باسمها في القدس افتتحته الحكومة الصهيونية.

6) أمينة رزق - 1910 : 2003

رمز النكد اللي كتير مننا مش فاكر شكل ابتسامتها والأم الأشهر في السينما المصرية، الشارع ماتسمَّاش باسمها عشان قدمت 96 مسلسل و200 مسرحية و152 فيلم منهم أفلام من أحسن 100 فيلم في تاريخ السينما المصرية بس، لكن عشان هي كانت أول فنانة تدخل مجلس الشورى سنة 1991. الشارع موجود في مدينة نصر.

7) نوال عمر - 1931

أول ست تتعين وكيل برلماني، وصاحبة أول جمعية خيرية للأيتام، عملتها في السيدة زينب، ده غير إنها كرَّست مشوارها البرلماني للدفاع عن العمال. "نوال" موجود دلوقتي باسمها مدرسة في السيدة زينب، والدار الخيرية بتاعتها لسه موجودة وسهل الوصول ليها من محطة سعد زغلول.

حاولت أرتب الـ 7 ستات دول حسب سنهم من الأكبر للأصغر، المفاجىء إن معظمهم اتولد وعمل تأثير من أول لمنتصف القرن اللي فات، يعني في عصر زمني شبه واحد بخلاف القانون. طيب من خمسينات القرن اللي فات لحد النهاردة، فيه كام ست مصرية عملت إنجاز تستحق عليه إننا نسمّي شارع باسمها؟! وليه مافيش إتجاه من الدولة أو أي مؤسسة نسوية حكومية إنها تخلِّد ذكرى سيدة ناجحة بإنها تسمي شارع باسمها زي ما بيحصل مع شهداء الجيش والشرطة؟ مش متأكدة الموضوع له أسباب ولا هو مجرد "تطنيش"، لكن الأكيد إن فيه ستات كتير يستاهلوا نخلِّد أساميهم زي الـ 7 ستات دول.