بانوراما الفيلم الأوروبي خلصت وخلصت معاها كل الزيطة بتاعتها، معلش أنا عارف ان الموضوع ممكن يكون أزعجك، مرة واحدة الناس كلها بقت بتتكلم عن السينما وأفلام انت ماسمعتش عنها قبل كده، وصريخ، والتذاكر تخلص قبل ما تبتدي، والفيلم المجري المرشح لسعفة معرفش إيه، عشان كده قررنا نعملك مدخل كده للأفلام الأوروبية، حاجة كده من على وش الققص تخليك تحبها، ده مش معناها إن دي أفضل أفلام عملتها كل بلد، لاء دي حاجة كده تفتح نفسك على أوروبا واللي جي منها.

On Body and Soul - 2017
المجر
الفيلم رومانسي غير تقليدي بالمرة، تخيل قصة حب بين شخصين في السلخانة! كل واحد من الشخصين فيه حاجة بتخليه مختلف عن اللي حواليه، لكن الغريب إنهم بيشوفوا نفس الحلم كل يوم، دي صفحة الفيلم على IMDB

The Brand New Testament - 2015
بلجيكا
تخيل لو ربنا طلع عايش في بلجيكا، قاعد في شقه هو ومراته وبنته، بعد ما سابهم ابنهم عشان يخلص العالم، لكن البنت بتقول اشمعنى اخوها بس هو اللي يخلص اللي العالم، هي كمان هتنزل الأرض، وتلم حواليها تلاميذها، وتكتب العهد الجديد "فشخ"، دي صفحة الفيلم على IMDB

The Lives of Others - 2006
ألمانيا

في كتير جدا اتكلموا عن العلاقة بين السجين والسجان على مر السنين، أحمد مطر كان بيقول
أنا السجينُ ها هُنا
أم ذلك الحارسُ بالجوارْ؟
فكلُّ ما يفصلنا جـدارْ
وفي الجدارِ فتحةٌ
يرى الظلامَ من ورائِها
وألمحُ النهارْ!

مع الوقت بتنشأ علاقة غير مفهوم طبيعتها بين السجين والسجان، كان العظيم داود عبدالسيد عمل حاجة شبهها في "مواطن ومخبر وحرامي"، المخبر اللي بيراقب المواطن لفترة، لحد ما بيحبه، وبيساعده يعدي من مشاكل، الفيلم الألماني بيدور في ألمانيا الشرقية قبل الانفصال سنة 1984، لما كان المواطنين كلهم بتتراقب تليفوناتهم، لكن الظابط اللي بيراقب المواطنين بيتأثر مع الوقت بحياة اللي بيراقبهم، دي صفحة الفيلم على IMDB

The Invisible Guest - 2016
أسبانيا

محتاج تكدب كام كدبة عشان تحمي الكدبة الأصلية؟ وازاي الفرق بين الجريمة إلا ربع والجريمة الكاملة ممكن يبقى تفصيلة واحدة، من أذكى أفلام الجريمة اللي اتعملت، دي صفحة الفيلم على IMDB

Bekas - 2012
سويسرا - فنلندا
طفلين من الأكراد في العراق، ركبوا حمار وابتدوا رحلتهم لأمريكا، عشان يقابلوا سوبر مان! دي صفحة الفيلم على IMDB

I, Daniel Blake - 2016
انجلترا
الوجه القبيح للتكنولوجيا والمدنية، اللي بتدوس على اللي مش قادرين يتكيفوا مع الوضع الجديد من غير رحمة، ممكن تشوفها في قصة نجار إنجليزي، بيلاقي نفسه مضطر يستخدم التكنولوجيا لأول مرة في حياته عشان ياخد حق من حقوقه، دي صفحة الفيلم على IMDB

Perfect Strangers - 2016
ايطاليا
7 صحاب قعدوا يتعشوا، وقرروا لحد ما العشا يخلص كل واحد هيتشارك مع الباقيين أي رسالة نصية توصله سواء واتساب أو رسالة أو ايميل، تفتكر إيه اللي ممكن يحصل؟! دي صفحة الفيلم على IMDB

Loving Vincent - 2017
انجلترا - بولندا
الفيلم عبارة عن 65 ألف لوحة زيتية، رسمها فريق من 100 فنان، وكل الرسومات بطريقة فان جوخ في الرسم، عشان يحكوا قصة الفنان الهولندي، تحفة فنية عظيمة مش هتتكرر، دي صفحة الفيلم على IMDB

The Intouchables - 2011
فرنسا
ارستقراطي فرنسي بيعاني من شلل في أطرافه الأربعة، بيعلن عن وظيفة مساعد ليه، لكنه بيختار الشخص الوحيد اللي ماكنش عايز يشتغل الشغلانة وكان جي بس عشان ياخد اعانة البطالة، لإنهم بيشترطوا عليهم يكونوا بيدوروا على شغل، من أجمل الأفلام الكوميدية على الإطلاق،دي صفحة الفيلم على IMDB، بس عشان الفيلم ده أشهر فيلم في القائمة ووارد تكون اتفرجت عليه هديلك كمان Amélie، و Love Me If You Dare