ممكن يكون في ناس كتير فاكرة إن الراب هو بس "مكي" أو "زاب ثروت" و "الفيشاوي" و"إم تي إم"، وماتعرفش إن في مشهد كبير تحت الأرض. كمان ممكن يكون في ناس فاكرة إن الراب لفئة عمرية معينة أو لطبقة اجتماعية معينة أو مثلًا إن الراب كله شتايم بقى والكلام ده. مهما كان تصوركم عن الراب الأكيد إن مش كل الناس عارفة إن الراب المصري فيه مواهب قوية جدًا، من أول الكتابة لحد المواضيع نفسها، كمان مستوى الرابرز نفسهم، يعني من الآخر ما تتخيلش إنه يكون موجود في مصر.

شاهين: حديث مع الأنا

شاهين في الأغنية دي عمل حاجة قريبة للناس جدًا إنه كلم نفسه، فطبيعي جدًا مين فينا مش بيكلم نفسه؟ كمان شاهين استخدم مزيكا مناسبة للموضوع، وممكن اللي أنتوا ماتعرفهوش إن من الناس اللي اشتغلت على الفيديو (اه ما هي لها فيديو كليب) كانت ناس بتغني راب زمان، زي بدر ضاحي المونتير ومخرج الأغنية  وتامر عوض هو مدير التصوير. حاجة تانية عن شاهين، إنه عمل أغنية قريب مع أدهم اسمها "الوزة الرمادي" بس مش هتكلم عنها.

مروان موسى: اللي نسيته

مروان موسى يكتب ويلحن ويوزع  وكل ده لوحده، في ناس كده في الراب العربي. الأغنية من ألبومه بالمناسبة (ده اسم الألبوم على فكرة). المهم بقى الأغنية دي مروان موسى عمل حاجة جميلة جدا، إنه عمل راب وعمل R&B، فالأغنية أخدت شكل مختلف، المزيكا بيانو مع الدرامز من غير تعقيد. الجامد في الموضوع إنه معتبر نفسه جزء من النظام الموسيقي واندمج مع اللحن الأساسي من خلال صوته. أكتر حتة شايف إنها بتعلق في الودن هتلاقيها في الثانية 44.

يوسف الجوكر: تغريب

إيه المهم في الأغنية؟ الكلمات ولا المزيكا ولا الصوت؟ كل حاجة مهمة في الأغنية عشان كده اسمها أغنية، ويوسف (معروف باسم يوسف الجوكر) عمل أغنية بشكل مصري جدًا، من أول الطريقة اللي البنت بتغني بها اللي في شكل كورال وكانت مناسبة لموضوع الأغنية، والمزيكا وحالة الأغنية من إنها بتناقش موضوع مهم من وجهة نظره ومن وجهة نظر ناس كتير.

ديابلو: بتلف في دوائر

ديابلو هو مهندس صوت ومخرج سينمائي وشارك في إخراج مسلسل السبع وصايا، بس فكه من المجال ده وقعد يعمل مزيكا لنفسه وللناس. اخترت الأغنية دي بالتحديد عشان مود الأغنية ممكن يكون غريب، بس جميل وهيأثر بشكل ما. المزيكا هنا دورها مهم عشان بتعزز المشاعر عند اللي بيسمع.

ابيوسف: بغبغان

ممكن يكون في ناس كتير تعرف ابيوسف وفي ناس تعرف الأغنية دي، بس الليست دي مش للناس اللي بتسمع راب أو بمعنى أصح ماتعرفش حاجة عن الراب أصلا. التراك ده مش معمول عشان يعلمك حاجة أو تستفيد منه، بس معمول عشان تستمتع بيه من خلال المزيكا اللي عملها مروان موسى وطريقة إلقاء وكلمات ابيوسف.  المميز في الأغنية هي اللازمة (الواصلة) اللي بيعيد فيها جُملة ملك الراب التافه عشان هو طبعا بيتريق على الناس اللي بتقول الراب تافه لو مافيش موضوع محدد في الأغنية و الكلام ده.

الواى كرو: منطق الفول

البلد كلها فول، فريق الواى كرو بالاشتراك مع هالة شريف، عملوا أغنية اسمها منطق الفول، على مزيكا DJ وائل محمد، يعني هما الواى كرو بيحاولوا يسخروا من المنطق المصري اللي تدهور حاله بسبب أكل الفول، بس مين فينا يقدر يستغنى عن أكل الفول؟ أنا عن نفسي ماقدرش ولا هما نفسهم اللي بيغنوا يقدروا، بس لازم يكون في أغاني على الفول يعني، ما احنا في مصر.

سلايفر: ماما ساكتة

مش طالب منكم غير إن كل اللي بيسمع التراك ده يدعي لأمي بالرحمة..

دي جملة كاتبها الرابر نفسه، كلنا عارفين فن الرثاء طبعًا والراب فيه الجزء ده، بس مالوش علاقة بالعرب وفكرة أصله عربي واللي حصل في ألبوم مكي (خلوني ساكت). في الأغنية دي رابر اسمه سلايفر بيغني لوالدته (متوفية). في ناس كتير عملت الأغاني دي، بس أنا فاكر أما إمينيم عمل أغنية شتم فيها أمه. الأغاني دي بتكون فيها حاجات مشتركة بين الناس، بسبب إن كل واحد فينا عنده حد بيحبه مات.

توفيق: جف الريق

الأغنية دي مش متعبة ولا مرهقة سماعياً، يعني اللحن الثابت ده هيخليك مركز أكتر في طريقة إلقاء وكلمات الرابر، خصوصًا إن طبقة صوته مميزه جدًا ومخارج الألفاظ عنده واضحة، وده خلى الأغنية سهلة جدًا إنها تتسمع، بس يمكن اللي يكون غريب عليكم شوية، هو إنه بيتكلم على نفسه بس ودي حاجة معترف بها في الراب، بمعنى إنه بيعمل مقدمة عن نفسه عشان المستمعين يعرفوه أكتر.

لو باندا مع ال5: الكون فج

مش لازم نفهم كل الأغاني وبرضه مش لازم يكون لكل أغنية شكل واحد أو اتجاه محدد أو حتى موضوع واحد، عشان ببساطة الأغنية هي نظرة الفنان للعالم. هنا بقى الأغنية دي أنا بعتبرها أغنية معناها بيختلف أما بسمعها في الشارع عن لما بسمعها في المكتب. كمان المزيكا واللازمة كئيبة أوي، إيه ده!

الأغنية العاشرة: المهمة جدًا بقى

الأغنية العاشرة، هو الصراحة مافيش أغنية عاشرة، بس احنا عايزين إنكم اللي تختاروا الأغنية العاشرة اللي شايفين إنها تبقى موجودة في القائمة دي من رأيكم.