مجلس النواب وافق في جلسته العامة النهاردة على مشروع قانون الأبحاث الطبية الإكلينيكة، المعروف بـ"التجارب السريرية"، اللي هيكون أول مشروع قانون بيعمل تجارب طبية على المرضى.

القانون الجديد بيتضمن بنود مهمة، زي إنه هيتم إنشاء مجلس أعلى للبحوث، وهيتشكل بقرار من وزير الصحة، وهيكون له مهمة وضع الضوابط الخاصة بالبحث العلمي وأخلاقياته، وإن القانون بيلزم المجلس الأعلى لأخلاقيات البحوث الطبية بإرسال البحوث الطبية للأجهزة الأمنية قبل موافقته عليها نهائيًا، وده بغرض الحفاظ على الأمن القومي. 

بنود تانية بيقرها القانون زي إنه بيدي الحق للمريض إنه ينسحب من البحث في الوقت اللي هو عايزه وبدون ما يقول أسباب، وإنه بيشترط موافقة الوالدين في حالة إجراء بحث طبي على أي طفل طبيعي أو من ذوي الإعاقة، وده بهدف زيادة حمايتهم.

القانون حدد عقوبات زي السجن وغرامة ماتقلش عن 50 وماتزيدش عن 100 ألف جنيه للي هيجري أبحاث بدون ما ياخد موافقة من المريض، ولو حصل عاهة مستديمة للمريض نتيجة البحث هتكون العقوبة السجن المشدد وغرامة 500 ألف جنيه، والعقوبة في حالة التسبب في موت المريض هتبقى السجن لمدة 10 سنين والغرامة هتوصل لمليون جنيه.