وما يَشُقُّ عَلى الكَلبِ أَن يَكونَ اِبنَ كَلبَة

ما ضَرَّها مَن أَتاها وَإِنَّما ضَرَّ صُلبَه

قُتل المتنبي بسبب شعره، الجُملة دي صعبة أوي لما تفكر فيها. وبعيدًا عن أسباب القصيدة واللي حصل مع المتنبي عشان مش موضوعنا، اللي يهمني هنا هو واقعية الموضوع وخطورته وقوة فن الشعر ودوره وتأثيره في الحياة الاجتماعية، وإنه ممكن بسبب أبيات شعر تنتهي حياة ناس وتحصل خلافات وتتغير حياة ناس!

هجاء المتنبي اللي تسبب في قتله، كان لواحد مجرم خطير، فكانت النتيجة مأساوية، على عكس هجاء الشاعر جرير بن عطية في هجائه لشاعر تاني زى الفرزدق مثلا، كانت النتيجة تكون رد من الشاعر التاني، يعني هجاء يقابله هجاء ويفضل الموضوع مولع ما بينهم ونوعية الشعر ده اسمه شعر النقائض وده بحر كبير. النقائض كان لها دور إيجابي في قيمة اللغة العربية نفسها. 

هي تعتبر حروب كلامية، وزي ما في حروب في الشعر، في حروب في المزيكا برضه وفي كل حاجة وبتكون على شكل منافسة شريفة أو خلافات شخصية أو اسباب تانية، هنشوفها كلها مع بعض في سلسلة مقالات اسمها "حروب المزيكا" ولكل جزء نوع من المزيكا، نتعرف فيه على الحروب اللي بتحصل في نوع المزيكا والنتائج اللي بتحصل وأسباب الحروب دي.

الجزء الأول: حروب الراب

الحروب في الراب اسمها "دس" وكلمة دس مأخوذة من الكلمة الإنجليزية Diss اللي مأخوذة من كلمة Disrespect (عدم احترام الآخر) يعني تقلل من احترام الرابر التاني أو المغني. أغاني النوع دي مش بس بتكون ضد مغني ولكن ممكن تكون موجهة ضد أي حد، زي ما امنيم عمل دس في رئيس أمريكا ترامب. بس مش معنى كده إن الأمريكان أو غيرهم أخدوا فن الهجاء من العرب وعملوه دس، لكن دي طبيعية بشرية ليس إلا.

وزي ما في ناس تقيلة في الهجاء، في ناس برضه في الراب المصري "دساتهم" بتكون قوية ولها تأثير سلبي على الخصم (الرابر اللي تم دسه) بس قبل ما نخش في أسماء الرابرز  وتفاصيل أكتر، لازم تعرفوا إن الدس مش مقتصر على جنس بعينه، ممكن الدس يطلع من بنت على ولد والعكس، وكمان أسباب الدس مختلفة ومتنوعة، يعني في دس عشان يسرق جمهور الرابر التاني وفي دس عشان اختلاف في وجهات النظر، وفي دس لأسباب شخصية جدًا، وفي دس عشان أقول للجمهور إن أنا أقوى من الرابر اللي أنتوا معجبين بيه ده (اقوى فنياً في الكتابة وطريقة الأداء و غيره).

بس الدس في الراب مختلف بكتير عن أى أنواع موسيقية تانية، عشان حرفياً مفيش حدود للكلمات اللي ممكن الرابر يستخدمها ولا حصر للتشبيهات واستخدام اللغة بطريقة مبتكرة، يعني ممكن تلاقي دس فيه أبشع الألفاظ في نظر الشخص المتحفظ أو تلاقي دس مافيهوش ولا شتيمة، بس قوي بسبب التشبيهات والمزيكا وطريقة الأداء، زي دس ابيوسف على العفريت بسبب خلافات فنية

أنت تسيب الراب ده خالص وتروح تشتغل مترجم

زعانفي موضة.. لو جعان في شوكة

هتحتاج سابورت.. جيبتلك من عندي توكة

سرقت مني.. هخليك إنسان تعيس

خلصت عليك ب #هاشتاج زي ريهام سعيد

وطبيعي إن الآراء بتختلف بين أهمية الحروب في الراب وبين إنها حاجة بتاخد كل الطاقة وتضيع الوقت وتقتل مشهد الراب. بسبب الحروب دي ممكن الانطباع اللي يتاخد عن الراب إنه فن هابط أو فن قبيح وكله شتايم، ده على أساس إن لو حد سمع أول ما هيسمع راب هيسمع دسات (جمع دس). بس في الحقيقة الدسات عنصر مهم جدًا في ثقافة الراب وعنصر حيوي ونشيط جدًا، بس هو فعلاً آخرته بتكون مهلكة للطرفين، عشان النتائج بتكون مأساوية لما تكون الدسات على شكل (بيف)، كلمة إنجليزي دارجة معناها مشاكل بين طرفين (رابرز)، والمشاكل دي بتبدأ شخصية وتتنقل للأغاني، وتنتهي بمأساة، زي اللي حصل بين رابرز امريكا (بيجي وتوباك) بس ده أنا بعتبره تطرف وعدم سيطرة على المشكلة. غير لما تكون المنافسة كلها دايرة في إطار فني فقط وبتدور عن اختلاف الآراء الشخصية في الوضع السياسي والاجتماعي في مصر ما بين الطرفين، زي دس الهيذام في إبراهيم.

مخك مليان صديد فراغ سوائل محيرة

انت نتيجه مجتمع ذكوري الميول

انت شخة انسانية بدايتها كانت بول

انا مش مثقف انت اللي بصمجي في العلام

اتعلم التأليف قبل ما تتكربج من الهيذام

برضه الدسات ممكن تكون بين ولد وبنت لأي سبب، حتى لو كان بداية الخلاف بوست على الفيسبوك، زي الدسات اللي كانت ما بين يوسف الجوكر ويوكا شاهين.

(دس يوسف الجوكر في يوكا شاهين و اخرين)

نوعية الخلافات دي بتنتهي بطريقة واحدة بس، (انسحاب) البنت طبعاً من المنافسة أو من الخلاف لأسباب كلنا عارفينها، زي إن الجمهور بيكون تأثيره سلبي على البنت وبيهاجمها عن طريق مواقع التواصل الاجتماعي في الرسايل والتعليقات وبيديها صك إنها بنت قليلة الأدب عشان بتقول الألفاظ قبيحة، بس دور الشتائم في الدس مش ضروري بس برضه مش غلط لو تم توظيفها صح من غير ما يبان إنه مجرد حشو لغوي.

الدسات مش بتنتهي عند بنت وولد بس، ممكن يكون في خلاف ما بين بنت وبنت، زى الخلاف اللي حصل ما بين يوكا شاهين (رابر مصرية) وكيكي (رابر اللبنانية) وكان مجرد خلاف موسيقي فقط على مين أحسن من التاني.

عالم الراب فيه دسات بكل أشكالها، من أول الفضايح الشخصية لحد التحدي الموسيقي، وفي دسات تسمعها كأغنية بسبب قوتها الفنية، وتنسى إن ده كان دس. مش معنى وجود الدسات في مشهد الراب المصري إن الراب ده فن قبيح، لأ طبعاً، دي منافسة شريفة بس بتخرج عن الحدود والراب موسيقى متمردة بطبيعتها، يعني طبيعي جداً يكون فيها الدسات، عشان في الراب مسموح بكل حاجة، من أول إن الرابر يطلع في أغنية يقول إنه اقوى واحد فنيًا، لحد إنه يقول إن فلان وفلان مالهمش في الراب.

الدسات كتير جدا في مشهد الراب العربي مش المصري بس، من أول بلاد المغرب العربي لحد السعودية، ده اللي مخلي مشهد موسيقى الراب مختلف عن أي نوع مزيكا تاني والمقالة دي مجرد نبذة بسيطة عن عالم الدسات في الراب ومش عن تاريخ الدسات ولا عن أحسن دسات في المشهد العربي ولا عن الخلافات، بالعكس دي عن حروب المزيكا والراب هو الجزء الاول.

دس اصب اسفلت رابر شيبوبه سعودي