من فترة مش بعيدة أوي يعني، كان عشان تصور فيديو كليب وبعد كده تفرجه للجمهور كان يعتبر حاجة شبه مستحيلة، إلا لو أنت فنان (مطرب أو مطربة) زي عمرو دياب و في شركة إنتاج بتعمل كل حاجة من إنتاج الفيديو والاتفاق مع قنوات في الدش تعرضه بشكل مستمر، بس لو كنت رابر أو فريق روك أو بتعمل مزيكا إليكترونيك أو أي نوع موسيقي مختلف، فالموضوع تقريبًا شبه مستحيل وعشان يكون مش شبه مستحيل، لازم تتوفرلك الإمكانيات اللي قولناها في الأول دي. بعد ظهور اليوتيوب وانتشاره بشكل أوسع، الموضوع بقى سهل شوية، يعني بقى في مكان تعرض فيه الفيديو بتاعك ويشوفه ملايين من الناس ومش لازم تدفع للقناة عشان تعرضه، كل اللي أنت محتاجه كاميرا ومن هنا صناعة الفيديو كليب اتغيرت في العالم.

دلوقتي أي موسيقي عايز يعمل فيديو كليب يقدر وده عيب وميزة في نفس الوقت، بس ميزة أكتر منه عيب، عشان لو في حاجة أنت شايفها إسفاف ممكن ماتتفرجش وتركز على الفيديوهات الجامدة اللي عجباك. تقريبًا ممكن يكون اللي بتقرا مش واخد باله إن الراب المصري بقى فيه فيديوهات حلوة هتخليك تهتم بالراب كنوع موسيقي، وغير الراب في أنواع مزيكا تانية برضه فيها فيديوهات حلوة وكله على يوتيوب.

فيديو تي إن تي - رابر ويجز

متصور في إسكندرية من مجموعة صحاب مع بعض عاملين فريق تصوير كامل اسمهم شوترز SHOOTERZ، من أول الإخراج لحد المونتاج وبريك دانس وكل اللي الفيديو ممكن يحتاجه، يعني من الآخر هما عاملين الفيديو من أوله لآخره.

فيديو ثانوس - رابر أبيوسف

آخر فيديو أبيوسف عمله. أبيوسف عمل فيديوهات قبل كده زي "نفتالين" و "شيت مش لاقي ولا تيشيرت" ولسه المفروض إن في كمان فيديو هينزل. الفيديوهات بقت حاجة مهمة جدًا في بناء المشهد الموسيقي مهما كان النوع، يعني هي تعتبر محتوى بصري مهم، و2018 شهدت طفرة في إنتاج الفيديوهات بجودة عالية وأفكار جديدة.

بس مش معنى كلامي إن موضوع الفيديوهات ده حاجة جديدة على الراب والروك أو المشهد الموسيقي المستقل بكل الأنواع، كان في فيديوهات كتير قبل كده من فرق راب زي "الواي فاميلي" مثلاً في 2008 أغنية "لو فاكرين" وكان الإنتاج ذاتي والتكلفة صفر بالمعنى الحرفي للكلمة.

فيديو لو فاكرين فريق واي فاميلي

لكن نقدر نقول إن الفيديو كليب بقى سهل الصنع دلوقتي، مش بس عشان الإمكانيات، بس كمان عدد المشاهدات في زيادة وده خلى الإقبال على صناعة الفيديو أكتر من الأول، و كمان فكرة الربح من الفيديو خلت النظرة للكليب تتغير حتى لو من خلال يوتيوب، بس قبل موضوع الربح كانت الفكرة إنك معاك ناس تعرفهم يكون عندهم عدة تصوير، زي ما الرابر "رابتور" عمل، الكل يبساعد إن الفيديو يطلع حلو، سواء بكاميرا أو كمخرج ومونتاج أو حتى بظهوره في الفيديو

فيديو بهزر معاك - رابر رابتور

ده غير إن في فيديوهات بتعتمد على الفكرة ومش محتاجة تكلفة، زي ما "ليجي سي" صوّر الفيديو بتاعه في الشارع وهو ماشي أو في البيت في كدر واحد ومكان واحد، عشان المهم هو الفكرة هنا، حتى لو اختلفنا في تنفيذ الفكرة.

فيديو 2 بليل - رابر ليجي سي

فيديو Robotic Handshakes من البوم (Bionic Ahmed (UIQ0002 للموسيقي احمد الغزولي

نوع المزيكا: إلكترونيك

ممكن تعمل فيديو كليب كامل بموبايل وهو برضه مش اختراع، بس هو مهم إن الناس تعرف إن صناعة الفيديوهات مش بتقف على نوع الكاميرا، رغم طبعًا أهميتها، بس اللي مش عارف يجيب الكاميرا أكيد هيتصرف ويصور الفيديو بأي طريقة.

كُل شيت - رابر شاهين

فيديوهات الروك العربي مش منتشرة أوي زي فيديوهات الراب والمهرجانات، ده راجع لمشاكل في مشهد الروك المصري نفسه، واستحواذ شكل معين من الفرق اللي بتمسك جيتارات ده خلى الناس تاخد انطباعات إن اللي ماسك جيتار ده لازم يغني ويعزف بالطريقة دي بس، ده لا يمنع إن في فرق بتعمل فيديوهات لنفسها زي فريق بارانويا وقرار إزالة.

فيديو مريض نفسي - فريق بارانويا

فيديو شريط بيسف - فريق قرار ازالة

لو دخلت اليوتيوب هتلاقي إن أكتر نوع موسيقي في مصر أو الوطن العربي له فيديوهات، طبعا بعد المهرجانات، هو الراب العربي. في منها اللي يخليك عايز تنتحر وفي منها اللي يشد انتباهكم وتفضلوا تدوروا على فيديوهات تانية للناس دي، زي فيديو تقدير عجل عزبة الهيب هوب، بس ده بعيد طبعًا عن أغاني البوب المصري والخليجي والمغرب العربي، اللي هي مش محسوبة على مشهد الموسيقى المستقل.

فيديو تقدير عجل - عزبة الهيب هوب