" Vezeeta" هو تطبيق وموقع بيحللك مشكلة إنك مش لاقي دكتور في تخصص معين، أو مش عارف هو شاطر ولا لا وخايف تجرب في صحتك، طيب أسعاره كام؟ مكانه فين؟ أنت بتدخل وتحجز من الويب سايت وبتعرف هتستنى قد إيه وبتقرأ تقييمات الزوار اللى قبلك عن الدكتور ده والموضوع بيبقى بسيط، "Vezeeta" بيتعالج بسببه أكتر من مليون مريض وبعد 10 مليون دولار تمويل، قدر رجل الأعمال المصري مؤسسه أمير برسوم يفتح فرع للويب سايت في لبنان والأردن كمان.

أمير برسوم بيقولنا: "الرعاية الصحية في الشرق الأوسط فيها مشكلة، فمثلًا في أمريكا، المسؤول عن الموضوع ده شركات التأمين وبيضمنوا عدم سوء معاملة المريض وإنه هياخد علاجه، في المملكة المتحدة الحكومة اللي بتعمل ده، لكن هنا المرضى بيكونوا لوحدهم وده ممكن يتسبب في تعرضهم لسوء المعاملة أو يدفعوا فلوس كتير مقابل خدمة مش كويسة". مصر بتنفق على الصحة حوالي 5% من الناتج المحلي الإجمالي، وفقًا لمنظمة الصحة العالمية، وفي الوقت ده بتحاول "Vezeeta" إنها تسمح للمريض يقيم الطبيب عشان المرضى ياخدوا رعاية كافية ليهم.

في 2012 اتأسست المنصة الطبية على الإنترنت ودلوقتي وصلت إنه بقى فيها 5000 دكتور وحوالي 110 ألف حجز كل شهر في مصر بس، موقع "فوربس" صنف الويب سايت إنه من أفضل 5 شركات ناشئة في الشرق الأوسط. في البداية الموضوع كان صعب إن الناس تقتنع إنها تدخل تحجز دكتور عن طريق الإنترنت، بس بعد كده الموضوع بقى أفضل.

سألناه: امتى نقطة التحول اللي حصلت لـ Vezeeta ؟

نقطة التحول كانت لما قررنا إن الدفع يبقى بعد مالناس تروح، بدل ما كان الدكاترة بيدفعوا رسوم ثابتة، فده خلى دكاترة أكتر يكونوا موجودين، السبب التاني كان اعتمادنا على الموبايل وإنه يكون فيه "ابليكشن".

إيه أكبر تحدي قابلك في مصر؟

أكبر تحدي إن مفيش شركات ومنصات تأمين بتساعد المرضى فعلًا في الرعاية الصحية، وعشان كده لسه محتاجين نبني صناعة ناضجة في مجال الرعاية الصحية، التأمين حاجة مهمة جدًا وأنا سعيد إن قانون التأمين الوطني بيمر. المشكلة التانية إننا دايمًا بنقول إن مقدمي الرعاية الصحية زي المستشفيات والدكاترة مش قريبين من بعض في جودتهم، فبتلاقي ناس على مستوى عالي جدًا وناس عكس ده تمامًا، عشان مافيش مقياس للرعاية الصحية في مصر.

أي صناعة في العالم محتاجة "حامي" عشان يبقى فيه تقييم ومراجعة، وعشان كده احنا في Vezeeta بنخلي المرضى يعملوا تقييم ومراجعة عشان نحميهم ونقدملهم رعاية صحية مضمونة ومحترمة، ونعرفهم التكلفة كمان.

ازاي بتصنف من خلال منظور اجتماعي الـ 100 مليون شخص اللي بيتعالجوا من خلال Vezeeta؟

أكتر حاجة مثيرة للاهتمام في الموضوع ده، إنك هتكسب أكتر بكتير لو بتقدم خدمتك في منطقة منخفضة الدخل، لأن بالرغم من انخفاض سعر التذكرة، لكن ممكن تعمل 50 كشف في اليوم، لكن في هليوبليس أو المهندسين أو الزمالك مش أكتر من 10 كشوفات، ارتفاع عدد السكان في المناطق الأكثر فقرًا بيخدم بشكل جيد توفير الرعاية الصحية للفقراء بسبب عددهم.

طيب ده مبيأثرش على جودة الزيارة؟

طبعا بيعمل ده لكن على الأقل بيلاقوا علاج كويس.

أنت بدأت مشروع في لبنان والأردن وبتبحث إقامته في السعودية، ده مختلف عن مصر؟

السعودية شبه مصر جدًا من خلال ثقافة المريض والرعاية الصحية، لكن مع وجود اختلافات لأن عندهم مستشفيات متقدمة أكتر، الأردن كمان متشابهة جدًا في ثقافة المريض، لكن الرعاية الصحية هناك متقدمة أكتر وفيها تقنية مختلفة، لبنان بقى العكس، الرعاية الصحية شبه مصر جدًا، لكن ثقافة المريض مختلفة تمامًا.

شركتك من أنجح الشركات في صناعة الرعاية الصحية، هي كمان فريدة من نوعها في مصر، ده ممكن يأثر ازاي على سوق الشركات الجديدة؟

الموضوع مثير جدًا إنك شايف ازاي الناس طريقتها اتغيرت في إنهم يلاقوا دكاترة وبدل ما كانوا بيسألوا معارفهم مابقاش الموضوع ياخد أكتر من دقيقة، في الأول بدأنا نفكر ده هينجح ولا لا، بس ده يثبت إن المغامرة مفيدة وإن المشاكل اللي مرينا بيها هي السبب في نجاح الشركة دلوقتي.

ممكن تقرأ الموضوع بالإنجليزي من هنا.

photography: @MO4Network's #MO4Productions.