لو سألت أي شخص مهتم بالسينما عن أول عرض سينمائي في التاريخ، هيقولك كان في ديسمبر 1895 في باريس، وتحديدًا في الصالون الهندي بالجراند كافيه، لكن بعد التاريخ ده بأيام، كان فيه حدث أهم لينا، يناير 1896، كان أول عرض سينمائي في مصر وأفريقيا، اتعرض في قهوة "زوانى" في إسكندرية، وبعده بأيام برضه، 28 يناير 1896 كان أول عرض سينمائي في القاهرة، في المكان اللي اتعرف بعد كده ب "سينما سانتي"، لكن أول دار عرض سينمائية بالشكل المعروف كانت سنة 1897، لما قدر "هنري‏ ‏ديللو‏ ‏سترولوجو" إنه يشتري حقوق الاختراع بتاع العرض السينمائي من الأخوين "لوميير"، وعمل "سينماتوجراف لوميير" في شارع مصر في إسكندرية، في يناير 1897، وبعدها في شهر إبريل كانت أول دار عرض في القاهرة "سينما فرنسيس" في ميدان حليم باشا، ومن بعدها وانتشرت السينمات في مصر كلها. جايبنلك صور لمجموعة من أقدم السينمات في القاهرة.

سينما راديو

اتعملت السينما دي سنة 1948، في البداية كانت تعتبر أكبر دار عرض سينمائي في القاهرة، لكن بعدين اتقسمت لجزئين، جزء مسرح وجزء سينما، في 2012 اتحولت لمكان عرض برنامج "البرنامج" اللي كان بيقدمه الإعلامي "باسم يوسف"، وحاليًا هو مسرح للعرض التليفزيوني "أبلة فاهيتا". مكانها بالظبط في شارع طلعت حرب - وسط البلد

سينما ريفولي

السينما تم إنشائها سنة 1948، وبرضه مكانها وسط البلد، السينما اتعملت بأمر من بريطانيا اللي كانت لسه بتحكم مصر في الوقت ده، طبعًا مع وجود الملك فاروق في الحكم، السينما كانت تعتبر عملاقة لإنها بتستوعب 2150 شخص في قاعاتها
عنوانها 26 يوليو أمام دار القضاء العالي.

سينما ديانا ( ديانا بلاس)

اسمها الأصلي كان "ديانا بلاس"، وتم إنشائها سنة 1930، لكن دمرتها قنبلة سنة 1952، واتجددت تاني في الستينات، باسم "سينما ديانا". مكانها في 17 شارع الألفي وسط البلد - القاهرة - مصر

سينما كريم

أنشئت السينما دي سنة 1940، بس تحت اسم "فيمينيا"، بعدين اتجددت تاني في الستينات تحت اسم "سينما كابيتال"، ومؤخرًا اتجددت تاني تحت اسم "سينما كريم". مكانها بالظبط 15 شارع عماد الدين - وسط البلد - القاهرة

                                                                           سينما مترو

أنشئت سنة 1940، واضح إنها كانت سنة ازدهار للسينمات. السينما دي تحديدًا اتعملت عشان تعرض أفلام الشركة العالمية "MGM" في مصر، وأول عرض اتعرض فيها هو الفيلم الأمريكي "Gone With the Wind"، كل الأجهزة والتجهيزات كانت من أمريكا، وكانت أول دار عرض مكيفة في مصر، انفجر أجزاء منها سنة 1947 في تفجير اتنسب للإخوان، وبعدين اتحرقت في حريق القاهرة، واتعاد تجديدها بعد كده. مكانها 35 شارع طلعت حرب - وسط البلد - القاهرة

سينما ليدو

اتبنت في الأربعينات، لكنها اتحرقت في حادثة سنة 1994، عشان ترجع تتجدد تاني بعد 20 سنة، وهي حاليًا بيتعرض فيها الأفلام. مكانها في 23 شارع عماد الدين - وسط البلد - القاهرة

سينما ميامي

من أقدم السينمات في القاهرة، لإنها اتعملت سنة 1923، وكانت متخصصة في عرض الأفلام العربي، كانت من السينمات اللي اتحرقت في حريق القاهرة، لكن اتعاد تجديدها بعد كده
مكانها في وش سينما مترو بالظبط، تحديدا في 38 ش طلعت حرب - وسط البلد - القاهرة

سينما كايرو بلاس

اتبنت سنة 1945، وكان أول عرض ليها فيلم لممثلة الإغراء Betty Grable، ولسنين طويلة فضلت دار العرض الوحيدة اللي بتعرض أفلام الشركة العالمية "20th Century Fox pictures". عنوانها بالظبط شارع زكريا أحمد - متفرع من شارع 26 يوليو- وسط البلد - القاهرة

سينما أوديون

أنشئت في الأربعينات، وكانت متخصصة في الأفلام الروسي والإيطالي، حاليًا في جزء منها اتعمل سينما باسم "سينما زاوية"، وبيتعرض فيه الأفلام اللي ما بتتعرضش في دور العرض العادية، اللي تعتبر إنتاج مستقل، ودي من أجمل الحاجات اللي حصلت في السينما في مصر. عنوانها بالظبط 4 شارع عبد الحميد سعيد - متفرع من طلعت حرب - وسط البلد - القاهرة