الرياضة مش في الملاعب بس، ده كان زمان قبل التطور اللي حصل في التكنولوجيا وعالم الالعاب الإلكترونية video games. الجيمز مش تافهة، دي النظرية السطحية، بس الموضوع دلوقتي أخد شكل تاني، وبقى في كلام إن الألعاب الإلكترونية ممكن تشوفها في الأوليمبيات وتكونلها ميداليات بحلول سنة 2022، بشرط إنها ماتكونش ألعاب فيها عنف وقتل، حسب كلام Thomas Bach رئيس اللجنة الأولمبية الدولية، وفي مباحثات شغالة على نوعية الألعاب الإلكترونية اللي ينفع تدخل في الأولمبيات وتبقى جزء من الحدث ده.

كواحد بيحب الجيمز جدًا، قررت أروح أشوف بنفسي الحدث اللي نظمته gamers lounge في الجريك كامبس، الحدث عبارة عن بطولة محلية في ألعاب معينة زي fortnite ولعبة league of legends وFIFA. ماكنتش متخيل إن مصر فيها العدد ده من الجيمرز، دايمًا بكون متخيل إن المهتمين بالجيمز آخرهم كورة، الانطباع ده ممكن يكون وصلي من الإعلام الجميل بتاعنا، عشان كده لما روحت اتصدمت.

 الجمهور الحاضر كان كبير، معرفش قد إيه، بس كبير ومن جميع الأعمار والأنواع، بنات وولاد كلهم مهتمين بحاجة واحدة بس وهي الجيمز بكل فروعها، زي ال "Cosplay"، اللي هو الواحد يلبس لبس شخصية في الجيمز أو الكوميكس أو الأفلام (زي الحفلات التنكرية عشان الفكرة تكون واضحة يعني). أول ما شوفت ال Cosplay والشاشات والزحمة والناس اللي كلهم مشتركين في نفس الاهتمام، قلت لنفسي خسارة؛ كان مليك ابني اللي عنده 6 سنين هيحب الجو ده. كمان كانت في مسابقة عن أحسن Cosplay بالاشتراك مع EgyCon.

كل ما تمشي وتتوغل في المكان، تلاقي ناس قاعدة بتلعب ألعاب حتى لو قديمة زي medal of honor و red alert اه ما الناس دي طلبت معاها بنوستالجيا، هتلاقي برضه بنات جيمرز، عشان الناس اللي بتقول البنات مالهاش في الجيمز.

مرة واحدة سمعت حاجة متعود اسمعها في ماتشات الكورة بس حرفيًا، وهي صوت تهليل وتشجيع من الجمهور على واحد كسب في لعبة fortnite، ماكنتش متخيل إن ده فعلاً حقيقي وفي مصر وتشجيع وناس بتشجع، زي بالظبط لما مصر تجيب جون في بطولة، لكن المرة دي التشجيع كان على الجيمز، في بطولة المفروض إن عدد المتنافسين 1000 وكل 100 بينزلوا ضد بعض على 100 جهاز كمبيوتر وهكذا لحد ما الـ1000 واحد يفضل منهم 100 والمفروض إن واحد بس هو اللي يكسب جائزة 30 ألف جنيه.

الجيمرز عارفين إن كان في بطولات ثانية ليهم، زي بطولة العالم لشركة "ريد بول" Red Bull M.E.O by ESL للعبة كلاش رويال، كان مشارك فيها المفروض 900 لاعب، والمركز الأول يمثل مصر في بطولة العالم في ألمانيا قصاد 35 دولة  وغير كده كان في بطولات تانية زي بطولة لعبة league of legends، يعني الموضوع فعلاً أخد منعطف تاني.

ده حتى سوق دوت كوم كان عامل بطولة للعبة Tekken 7

عشان نفهم الدنيا أكتر، اتكلمت مع أحمد علي، وهو Co-founder & Marketing Manager وسألته:

من كام سنة ماكانش في إيفنت عن الجيمز في مصر، أو كان في إيفنت بس جيمرز لونج أخدت الموضوع لشكل تاني؟

الجيمنج بدأ بمسابقات بيشارك فيها أعداد بسيطة، سواء في مصر والشرق الأوسط، والجوائز كانت متواضعة وكان ماحدش مستوعب إنها ممكن تكبر عن مسابقات بيشارك فيها 50-100 لاعب على الأكثر، وكان بيبقى الهدف الوحيد هو الربح المادي السريع مش صناعة رياضة تنافسية عادلة بين المشاركين، وعلشان الأعداد كانت قليلة فكانت أماكن التنظيم معظمها سيبرات.

بدأنا بإننا نصلح المشاكل في مجتمع الألعاب ونبني كل جزء، لأننا مقتنعين إننا عمرنا ما نقدر نكبر لوحدنا وكان لازم مستوى السايبرات يتطور ولازم يبقى في اهتمام بالمحتوى اللي في البطولة ويبقى في معلقين عندهم خبرة في معظم الألعاب، ولازم يبقى فيه محللين وتغطية اعلامية ونجوم وفرق محترفة.

عملنا أول ايفينت واللي استضاف أكبر بطولة في الشرق الأوسط وقتها، بعدد فرق 32، سنة 2015، وبقينا بنوصل دلوقتي لأكتر من 150 فريق. كنا من أوائل الناس اللي تقنع الجيمرز إن المتعة مش بس إنك تشارك، ده كمان في متعة إنك تتفرج وتشجع. أول إيفينت لينا كان في تقريبا 80 واحد بيتفرج وآخر GLSC  كان فيها أكتر من 2000 مشاهد بيتفرج ويشجع.

 مشهد الجيمنج في مصر بيكبر وآخر كام سنة بقى ليه جمهور كبير وبدأت الناس تاخد الموضوع على محمل الجد خصوصاً ان في ناس بتعتبر الجيمنج في مصر حاجة تافهة وثانوية تفتكر نظرة المصريين للجيمز ممكن تتغير و نظرة الإعلام و الدولة نفسها للموضوع بقى ازاى ؟

فعلا التطور كبير زي ما لسه موضحين في النقطة اللي فاتت، الرياضة بتتطور في مصر بشكل كبير وفي الوطن العربي كله، والجمهور والشعبية الكبيرة هي اللي هتجبر اي حد يهتم بالرياضة ويدعمها و اللي هيخلي ليها مكانها زيها زي اي رياضة

لو اتكلمت على الإيفنت إيه أصعب حاجة مرت عليكم أثناء التنظيم؟

أصعب حاجة هيا إننا كان لازم نهتم بكل الألعاب ومانركزش على لعبة واحدة، والجمهور كان كتير، بس كان لازم نستوعبه ومانمنعش دخول الناس اللي سافرت من محافظات ودول عربية وأجنبية علشان تحضر الحدث الكبير ده.

ماكنتوش متوقعين إن العدد يكون بالحجم ده؟ هو كام واحد حضر الإيفنت؟

احنا الإيفينت كان فيه أكتر من 180 كمبيوتر ولاب توب، غير الموبايلات والبلاي-ستيشن اللي كانوا كلهم متوصلين بالإنترنت، من أول ولحد آخر الإيفينت، وما واجهناش أي مشكلة أو لاج، بس كان فيه مشكلة في سيرفرات لعبة لول (ليج اوف ليجيندز)، واللي كانت بتسبب في إن أجهزة معينة يحصل فيها لاج.

فعلا كانت أعداد الناس فوق أي توقع، ودي الحاجة اللي هتخلي حجم الايفنتات لازم يبقى أكبر ويستوعب عدد أكتر، والدعم اللي هيبقى موجه للرياضة دي هيبقى أعلى. واللي حضر على مدار اليوم كان أكتر من 5000 واحد.

إيه الجديد في المرحلة الجاية بالنسبة لجيمرز لونج؟

إننا نشتغل على دعم اللاعبين والمهتمين بالرياضة وإننا ننظم الايفينت ده على مستوى الوطن العربي.

وأخيرًا المقال ده مجرد نبذة بسيطة عن اليوم واللي حصل فيه وبعيد عن إبراز الإيجابيات أو السلبيات، ده مجرد تجربة شخصية لواحد بيحب الجيمز ونفسه يشوف مشهد الجيمز في مصر بيكبر.