• اكتب معانا
  • ماتنسناش
  • تابعنا
الموضوع اللي جاي
"اعرفي راجلك وعلمي عليه" كتاب جديد لإسماعيل قاسم هيفهم الستات دماغ الرجالة
الموضوع اللي فات
عمرو دياب هينزل ألبوم مع روتانا بعد خلافات 3 سنين

أخيرًا بقينا على الخريطة.. يوم في أول مهرجان للجيمز في مصر

أخيراً روحنا شوفنا يعني ايه معرض و مهرجان للجيمز

بعد ما الواحد كان فقد الأمل الكام سنة اللي فاتوا دول في إن يبقى فيه اهتمام واضح بعالم الجيمنج والجيمرز، فجأة صحينا على خبر إن Insomnia UK هتيجي مصر وتعمل أول معرض ومهرجان في الوطن العربي للجيمرز، تحت اسم Insomnia Egypt، صدمة طبعًا ومش عارف أصدق  ولا لأ؟ خصوصًا إن من كتر ما الواحد بيتفرج في اليوتيوب على معارض في أوروبا وأمريكا ودبي، بقى حاسس بذل ونفسه يحضر حاجة زي دي في بلده، أخيرًا الموضوع اتحقق وبقى في معرض ومهرجان جيمنج في مصر! لأ وكمان مستمر 3 أيام

المهرجان كان في أرض المعارض الدولية اللي في التجمع الخامس -آخر الدنيا- والتذكرة لليوم الواحد 400 جنيه وللـ 3 أيام ب 900 جنيه، ورغم كده المكان كان زحمة، خصوصًا إن Insomnia Egypt ظبطت الناس في خصم يوصل ل 70 جنيه لو ركبوا أوبر عشان توصل لمكان الإيفنت، البعيد نسبيا، بسهولة.

طبعاً الناس هتقول السعر ده غالي جداً، بس بالسعر ده تقدر تعمل كل حاجة جوه المهرجان، والمهرجان كان فيه حاجات كتيرة تتعمل وتتشاف. وبما إني كنت من المحظوظين اللي حضروا، اسمحولي أقول أنا شفت إيه حلو وإيه وحش.

فيديو من اليوم الأول للمعرض

الجيمز ثم الجيمز ثم الجيمز

كان في جيمز موجودة في المهرجان لسه نازلة طازة ما بقالهاش كتير، الواحد كان لازم يجربها زي Spider-man اللي كانت الشركة SONY جايبها على ال PS4 و لعبة Assassin creed odyssey،  ده غير  Call of duty Black Ops 4 نزلت يوم 12 أكتوبر على مستوى العالم، وكان في ليها zone برضه عشان الناس تجربها في نفس يوم نزولها. كان في كمانلعبة Shadow of the Tomb Raider برعاية NVIDIA GeForce Middle East ، يعني أسماء تقيلة في عالم الجيمز داخلة المعرض، وكل ده بالتنظيم ورعاية ArabHardware . 

 و طبعاً FIFA19 كان في ناس كتير جداً بيلعبوها والمهرجان اتعملت فيه بطولة إجمالي جوايزها 45 ألف جنيه.

 ده غير ال Dynamic Simulators من أكاديمية رامي سري، عشان الناس اللي عايزة تجرب يعني إيه Simulators، تجربة مختلفة تمامًا بس كان عليها طوابير!

نيجي للمسابقات بقى، ودي في ناس رايحة مخصوص عشانها، كده كده التذكرة بتديك كل الصلاحيات إنك تشترك في أي مسابقة، زي league of legends و Fortnite و Counter Strike Global Offensive و tekken 7 وطبعاً overwatch. وصل إجمالي مبلغ الجوائز لحد 500 ألف جنيه على مدار ال 3 أيام وفي جوائز من أول 500 جنيه لحد 5000 جنيه أو أكتر، ده غير مسابقة rainbow six siege برعاية Slice n Dice Gaming

أنا مالعبتش قبل كده Fortnite، باعتبار إني بحب نوعية ألعاب تانية، بس ملاحظ إن في إقبال كبير أوى فى مصر على اللعبة دي، وكان مخصص ليها جوائز إجمالية 50 ألف جنيه. وأنا قاعد كده لقيت ولد صغير ماشي ماسك الشيك الكبير ده البلاستيك، اللي المفروض يصرف بيه الفلوس ومعاه تلاتة صحابه، سألته كسبت كام ومن لعبة إيه وناوي تعمل إيه بالفلوس دي؟ قالي: "كسبت 1000 جنيه من لعبة fortnite"، على طول سألته عندك كام سنة؟ قالي: "عندي 12 سنة وناوي اشتري بال 1000 جنيه حاجات في اللعبة عشان أقوي مستوايا".

لو مهتم بالجيمز أو بتتفرج على أفلام ومسلسلات لها علاقة بعالم الكوميكس، هتبقى عارف إن ال Cosplay ده حاجة مهمة جدًا وصعبة جدًا عشان تتعمل ومكلفة عشان تعملها صح أو بجودة عالية، يعني مثلا سألت واحد هو اللي عامل ال cosplay بتاعه بنفسه، ومستخدم 3D Printer عشان يطبع ال mask بتاع الشخصية واللبس هو اللي عامله بنفسه، وعشان ال 3D printer بتاعته، فالموضوع يدوبك مكلفه 2000 جنيه تمن المواد الخام، لكن لو هتعمل الكلام ده عند حد من بره، هيكلفك 8000 جنية بالميت! ده غير إن كان في Cosplayer جايين من إنجلترا مخصوص عشان يشاركوا في المهرجان.

قابلنا هالة شريف هناك، جايز ماتعرفهاش، هي مش ممثلة، هي جيمر محترفة وبتطلع مسابقات برة مصر وبتحضر معارض برة مصر وبتلعب جيمز زي overwatch و battlefield و Call Of duty ومستواها ممكن يزعل ناس كتير ويخلي الناس تكسر الجهاز. سألتها رأيها في المهرجان، جاوبت:"مبسوطه جدًا إن في حاجة زي كده في مصر أخيرًا بعد انتظار طويل جدًا". 

حضرت حاجة أول مرة تحصل في تاريخ مصر تقريبًا، إن يكون في معرض بالحجم ده، رغم بعض الإخفاقات، زي مثلا إن ال minecraft zone كانت معمولة بشكل وحش جدًا، يعني أنا كنت متخيل هيبقى في ديكور كبير ومناسب للعبة، لكن هما يا دوبك حطوا أجهزة كمبيوتر جنب بعض وخلاص، برضه كان في ناس بتشتكي من سرعة النت وده أمر طبيعي أنت في مصر، يعني النت مش ثابت، كويس أصلاً إن المهرجان تم بنجاح، وغير الزحمة، كان في زحمة على ألعاب زي Fortnite

تاني حاجة مش عجباني هي ال VR Zone، عشان هما كانوا جايبين جيمز قديمة وتقريبًا من اللي بتنزل ببلاش مع ال VR، يعني في جيمز كانت هتبقى قوية على الـ VR لو اتجربت، بس ارجع وأقول إن مستوى المهرجان، رغم شوية الإخفاقات دي، حلو وكويس وخطوة كبيرة جدًا في عالم الجيمنج في مصر.  أخيرًا مصر طلعت على الخريطة.

Home
خروجات النهاردة
Home
Home