يوم 14 سبتمبر اللي فات في المعهد العالي التكنولوجيا في أكتوبر، كان في إيفنت مهم لكل مجتمع الجيمرز. "Run Double Jump" بيكون فرصة لمجتمع كبير بيتطور كل يوم، يلعبوا ويتبسطوا ويبتكروا، يتناقشوا في اللي عملوه قبل كدة، ويفكروا هيعملوا إيه بعد كده. كل ده حلو، بس مهم كمان إن كان في مجموعة جوايز هتتوزع على المبتكرين والجيمرز، ومنهم جايزة هتخلي صاحبها يقدر يشارك في مسابقة Indie Prize التابعة للحدث ده، واللي هتكون كاليفورنيا في 16 يناير 2018.

 أول جايزة في المؤتمر كانت لأفضل لعبة بتصويت الجمهور. كسبت الجايزة لعبة “The Hero” من تطوير "Dark space studio". السنة اللي فاتت نفس الجايزة دي كان فاز بيها وبرضة بتصويت الجمهور، لعبة "Beats Of Fury" من تطوير "Bubble "Head. تقدر تشوف تريلر اللعبة اللي كسبت في 2017 من هنا.

جايزة Indie prize هي اللي هتخلي صاحبها يقدر يشارك في المسابقة اللي بتكون بنفس الاسم في كالفورنيا. الجايزة دي فازت بيها لعبة "Skelewton's First Law" من تطوير Youmaku Games، وممكن تتفرج على تريلر للعبة اللي رايحة أمريكا من هنا. الجايزة التالتة بخصوص الVR وألعاب الواقع الافتراضي وقيمتها 5000 جنيه، وفازت بيها لعبة Chronoka. اعرف عنها أكتر من هنا.

آخر جايزة كانت دورة في لعبة فيفا 17 من GBarena. تفتكر مستواك في اللعبة كان يخليك تكسب أي حاجة؟ لو جامد كان ممكن تكسب 1000 جنيه أو 500 جنيه.