2017 عرفتنا على مواهب كتير جديدة، التمثيل كان ليه نصيب الأسد، عشان الناس لما بتتعرف فيه بتعلم معانا، لكن كمان كان فيه مخرجين ومؤلفين وموديل إعلانات، اقرأ الـ17 اللي اختارناهم وقولنا رأيك.. الترتيب مالوش أي علاقة مين أحسن.
رمضان اللي فات ماكناش بس بنتكلم عن المسلسلات ونجومها، لكن كمان كان شاغلنا "أوفا"، نجم إعلان "إيجي بنك" اللي ماحدش بيعمله حساب. "عبدالرؤف" اسمه الحقيقي وهو دارس بيزنس ومالوش أي علاقة بالتمثيل أو الموديل أو الإعلانات، كل ده كان صدفة، لكن بقى نجم لسه لحد دلوقتي بنضرب بيه المثل.
علي ممثل كان بيعمل أفلام مستقلة ومسرح شارع، تحسه شبهك كده وبتشوفه في الشارع كتير، في نهاية 2016 أخد جايزة أحسن ممثل في مهرجان دبي عن فيلم "علي معزة وابراهيم"، بس الجمهور ماعرفهوش غير لما الفيلم اتعرض في 2017، وكان مكسب جدًا.
"مها" حرفيًا خطفت قلبي من أول لحظة شفتها فيها وهي بتلعب دور "نعمة" في واحة الغروب، رقتها وقوتها وضحكتها وهي بتحاول تطيب سيدها "محمود" اللي قام بدوره خالد النبوي، كانت عبقرية، ورغم إنها ماظهرتش في المسلسل غير 5 حلقات تقريبًا، إلا إن الناس كلها كانت بتسأل مين البنت اللي عملت الدور ده؟
هي ممثلة أردنية ماكانتش وجه جديد في الأردن، بس في مصر اتعرفنا عليها لما عملت دور "مليكة" في واحة الغروب وأدته ببراعة.
شفت مسلسل "لا تطفئ الشمس"؟ كرهت "أفنان"؟ أكيد حبيت الدكتور سعد بقى! دور معقد، طيب وغلبان لكنه بيحب كمان وذكي، من هنا اتعرفنا على محمود الليثي اللي بيقدم كل أسبوع اسكتشات في SNL بالعربي.
مسلسل لا تطفئ الشمس، تقريبًا كان ليه نصيب الأسد من الوجوه الجديدة، "مريم" أثبتت إنها مش بس بنت أمورة وحلوة، لكنها كمان ممثلة قديرة.
ممثلة وقاصة من إسكندرية، الست عظيمة وبتمثل من زمان واللي بيحبوا المسرح أو الأفلام المستقلة هيكونوا عارفينها أكتر، بس الوضع السنة دي كان مختلف، لما طلعت في مسلسل "لا تطفئ الشمس" وتم اكتشافها من جديد بالنسبة للجمهور.
"تقى" في مسلسل هذا المساء ميزتها إنها شبهنا، زي أي بنت عادية ماشية في الشارع، وعشان كده نجحت بسهولة أسماء ابو اليزيد إنها تدخل قلوبنا وبيوتنا ونبقى مستنيين أعمالها الجاية كمان.
ممثل مصري طلع في فيلم الجيل الرابع، لكن عرفناه أكتر وحبيناه في دور "تريكة" في "هذا المساء"، المسلسل اللي قلب مصر كلها رمضان اللي فات.
أشهر مقطوعة موسيقية في 2017 "مزمار عبد السلام"، يمكن مش بتحب الشعبي، ويمكن مش مقتنع إن ده فن، بس الأكيد إن دي حالة مختلفة سواء حبيناها أو لأ.. وعبد السلام وجه جديد ظهر في 2017 ويمكن يستمر معانا كتير.
ممثل مسرح فلسطيني، مثل سينما أول مرة في فيلم "القضية رقم 23" وأخد جايزة أحسن ممثل في مهرجان فينسيا السينمائي، الراجل يستحق الجايزة عن جدارة لأن دوره كان فيه صراعات نفسية ظهرت كلها في عينيه من غير ولا كلمة.
مصر كلها اليومين دول مالهاش سيرة غير "سابع جار".. بيفسد الأخلاق ولا لأ؟ بس في وسط كل ده، فيه ممثلين شباب أثبتوا قدرتهم الفنية في المسلسل، فدوى اللي عملت دور "دعاء" ببراعة، رغم إنه أول دور تمثله وعرفته بالصدفة، كانت واحدة من المواهب اللي كسبناها في 2017.
"ميسون" أصلًا مخرجة أفلام قصيرة، لكنها كمان أثبتت إنها ممثلة شاطرة في مسلسل "سابع جار" ودور "نرمين" اللي عملته بسهولة وهي "سايبة ايدها" زي ما بيقولوا كده.
هو كاتب ومخرج تونسي عمل فيلم "نحبك هادي" الفيلم كان في 2016، لكننا اتفرجنا عليه في 2017. الفيلم شارك في مهرجان برلين في المسابقة الرسمية وكسب جايزة العمل الأول، وخلانا مستنيين العمل الجاي لمحمد بن عطية.
الثلاثي ألفوا فيلم الأول، صاحب أطول اسم في تاريخ السينما "عندما يقع الإنسان في مستنقع أفكاره فينتهي به الأمر إلى المهزلة"، يمكن الفيلم ماحققش النجاح المنتظر بس قال إن فيه ناس بتكتب كوميديا مختلفة، ويمكن بعد كده أفلامهم توثق مرحلة احنا عايشينها خصوصًا إنهم شباب شبهنا.
هي مخرجة لبنانية أخت المطربة "جوليا بطرس"، "صوفي" مخرجة فيديو كليب، آخر أعمالها كان "سوء تفاهم" لجوليا بطرس، لكن السنة دي فاجئتنا بفيلمها السينمائي الأول "محبس"، وهو فيلم عن تطور العلاقات اللبنانية السورية من خلال قصة حب، الفيلم جرئ واتعرض في عدد من المهرجانات، آخرها كان مهرجان القاهرة السينمائي.
هيثم صحفي وكاتب مصري معروف لناس كتير، وتامر كان مساعد مخرج، لكنهم الاتنين اجتمعوا في تجربتهم الكاملة سينمائيًا "فوتوكوبي".. الفيلم بيتعرض الأيام دي في السينمات، لازم تشوفه، يمكن ماتحسش إنه فيلم عظيم، بس الأكيد هتحس إنه فيلم قريب منك، حنين على القلب وحالته مختلفة، ومن بعده كسبنا مخرج ومؤلف رائعين.