لو كل معلوماتك عن الجيمرز هي السايبر وماتشين فيفا اللي بتلعبهم أنت وأصحابك، فأنت فايتك كتير. الGamers مجتمع كبير، وصناعة بتطور يوم عن يوم، كل ده بيقول إن طبيعي يبقى في يوم يجمّع كل المهتمين بالصناعة دي، علشان يلعبوا ويتبسطوا ويفكروا ويبتكروا، يشوفوا وصلوا لفين، وهيتطوروا أكتر ازاي. من هنا جات فكرة "Run Double Jump"، واللي خلاص على الأبواب.

يوم التلات 14 سبتمبر في معهد التكنولوجيا بأكتوبر، هيقضي مجتمع الgamers يومهم مع بعض، وهياخدوا فرصة إنهم يعرضوا أفكارهم وشغلهم على جمهور بيشاركهم نفس شغفهم واهتمامهم، فيكون الناتج إفادة ليهم وإفادة للمجال بشكل عام. اليوم هيكون فيه أنشطة كتيرة، عندك مثلًا: معرض للألعاب المستقلة، ومعرض للشركات الموجودة في السوق حاليًا. هتسمع محاضرات ودروس من مطورين ومصممين بيشاركوا الحضور بخبراتهم. هيتم كمان ترشيح لعبة من الألعاب المعروضة لأكبر حدث للألعاب المستقلة في العالم Casual Connect، للمشاركة في مسابقة Indie Prize التابعة للحدث ده، واللي هتكون كاليفورنيا في 16 يناير 2018.

واحدة من المحاضرات المهمة اللي هتسمعها هتكون عن معمل الواقع الافتراضي (VR) اللي بتقدمه شركة MO4 بالتعاون مع فيسبوك. MO4 هتشرح أهمية الVR في عالم الألعاب وأهميته للصناعة كلها، ولأول مرة هتشوف لعبة "Carnak" في معمل MO4 للواقع الافتراضي. موقع STARTUP SCENE هيكون حاضر بقوة في اليوم ده، كونه دايمًا مهتم بأخبار المطورين وأصحاب المشاريع والأفكار الجديدة.

تذكرة حضور اليوم موجودة مجانًا، ولو عاوز تعرف تفاصيل أكتر، شوف الإيفنت من هنا