• اكتب معانا
  • ماتنسناش
  • تابعنا
الموضوع اللي جاي
لعب وفن وهندسة.. يوم في أكبر بطولة للجيمرز في مصر
الموضوع اللي فات
ترميم 1800 حيوان محنط بمتحف حديقة الحيوان في الجيزة

علشان لو دخلت فنون بيتك مايتخربش.. حوار مع أول شركتين بينتجوا ألوان مصرية 100%

الجيش قالك اتصرف

مش لازم تكون حضرت أحداث محمد محمود علشان تحب شارع محمد محمود. بره السياسة، الشارع ده في فترة كان أحسن متحف مفتوح للثورة، بفضل فنانين شباب وثّقوا لحظات حياتهم يوم بيوم على حيطان الشارع. السياسة مش هي بس اللي "مرمطت" مجتمع الرسامين ومسحت شغلهم بأستيكة، التطورات الاقتصادية دخلت وأدلت بدلوها، أزمة دولار وتعويم جنيه، حاجات رفعت أسعار الألوان والخامات لأرقام فلكية، كمان الحكومة بقت تعتبر بعض الخامات دي من السلع الاستفزازية أو غير الأساسية، وعليه، بقى استيرادها أصعب وبجمارك أكبر، ما هي أصل الحياة صعبة وأنت في مصر معلش.

"نور كامل" طالبة لسه في السنة الأولى من فنون جميلة، بس بتوصف تجربتها في الكلية بإنها اتخرب بيتها. بلاها مستورد يا جماعة، نروح للمصري، مصر مابتعملش ألوان؟ مابنصنعش خامات؟ مافيش حاجة خالص؟ "أحمد فتحي" صاحب صفحة "النقاش" وواحد من "عتاولة" الرسم في مصر، سألته السؤال ده وقالي المشكلة مش في إن اللون محلي ولا مستورد، "أنت ممكن ترسم بأي لون عادي، بس بعد فترة اللوحة بتاعتك شكلها هيبقى عامل ازاي؟ ده اللي بيخلي "FABER CASTELL" مثلا غالية، إن فان جوخ كان بيرسم بيها وشوف بعد كام سنة لسه اللوح بتاعته زي ما هي".

لسه ماجاوبناش على السؤال، في ألوان مصري، سواء حلوة أو وحشة؟ "عمر هشام" خريج الفنون التطبيقية، بيقول إنه اه في، وهما عبارة عن شركتين اسمهم "أوركا" و "هاوس أوف آرت". عمر كان سبب في إن ناس كتير تسمع عن الشركتين دول، ببوست صغير على فيسبوك، بيقول فيه للناس جربوهم ووفروا فلوسكم بعد ما أسعار الألوان بقت جنونية، مين أوركا وهاوس أوف آرت دول؟ مين أصحابهم وبيقدموا لون جودته عاملة ازاي، روحنا بالسؤال ده لصفحة كل مشروع منهم، وعن طريق رسايل الصفحة وصلنا لأرقام المؤسسين، ماشي، نكمل..

أوركا: فنانين شغالين من 2009

الناس دي طلعت شغالة من 2009 أصلًا، أن أن ااااه! أوركا شركة مصرية القائمين عليها بيشتغلوا في مجال الفن، كانوا مرة قاعدين كدة في 2009 وعندهم شوية طموح، قالوا يلا نعمل كيان يوفر الخامات والأدوات لكل الفنانين المصريين، هنوفر عليهم فلوس وهنقدملهم حاجة بنفس جودة المستورد. "محمد وصفي" واحد من اللي عملوا "أوركا"، بيقولنا: "الفنانين والطلبة سواء في فنون جميلة أو تطبيقية أو تربية فنية، بيعانوا من الأسعار وكل سنة بتزيد، في مستوردين كبار بطلوا يجيبوا ماركات معينة لأن أسعارها بقت جنان".

بدأ وصفي وشركاه يشتغلوا على إنتاج ألوان "جواش" مصرية 100%، وده نوع من الألوان هو الأكتر شيوعًا بين اللي بيرسموا، وعلشان الموضوع يبقى ماشي بخطوات سليمة، كانوا لازم يجربوا الخامة اللي صنعوها مع طلبة الكليات والدكاترة، وردود الأفعال اللي جاتلهم كانت مشجعة. بس كان مهم آخد السؤال اللي قالهولي "فتحي" عن جودة اللون اللي مابتظهرش فعليًا غير بعد سنين، وأرميه عند "وصفي" اللي جاوبني: " اه النقطة اللي هو قالها دي مش هتقدر تتأكد منها غير بعد سنين، وإن كنا احنا بندعي إننا مذاكرين ده لاننا بنجرب من 2009، في حاجات تانية كمان مهمة علشان تعرف جودة اللون، بتشف؟ بتبوظ أو بتنشف بعد قد إيه، بعد ما تنشف هل ممكن تسيلها تاني بالمياه؟"

حسمًا للجدل، سألته السؤال المباشر: انسى إنك بتصنّع أوركا وقولي، لو معاك فلوس كتير وقدامك أوركا وقدامك اللون المستورد، هتشتري أوركا؟ رد بثقة: "يقينًا اه احنا عملنا اختبارات شهور، جربنا وتعاونا مع أكبر أسامي وأساتذة، ماجالناش رد فعل وحش، فضلنا ماشيين ورا الألوان واحدة واحدة، كل ميزة وكل عيب وكل خاصية جوّه الألوان فضلنا ماشيين وراها". كده يبقى فاضل الفلوس، المشروع بتاعكم بيوفر للفنانين كتير؟ بيرد "وصفي": "المستورد بيتباع ال30 ملي منها ب15 جنيه وفي ماركات تانية بيبقى ال10 ملي منها ب5 جنيه أو ب5.5. احنا بالنسبالنا بننزل الألوان ال90 ملي يعني 3 أضعاف، ب20 جنيه. يعني بدل ما تدفع 45 جنيه هتدفع 20 جنيه بس".

أوربيو: أول ما بدأت أنتج الجنيه اتعوم

"أنا خريج تجارة القاهرة لكن من وأنا في ثانوي بشتغل في الرسم على الإزاز واشتغلت بشكل احترافي في اتيليه، في 2003 تقريبًا، كنت بشتري الخامات من وسط البلد زي كل الناس، لما الأسعار ابتدت ترفع، فكرت أصنع لنفسي خامة اشتغل بيها" بيبدأ محمد محيي الدين، مؤسس "هاوس أوف آرت" كلامه معانا. قدر محمد إنه يوصل لخامة ولون يخليه مايحتاجش يشتري جاهز، لكنه عمره ما فكر في مسألة إنه ينتج اللون ده ويقدمه للسوق. "لحد سنة 2010، قابلت فنان كبير اسمه جمال مليكة، شاف شغلي وعجبه وعرف إن أنا اللي بصنع الخامة بتاعتي بنفسي، فقالي ليه ماتنزلهاش السوق؟"

في 2010 ظهرت الفكرة، لكن علشان تتنفذ، "محمد" كان محتاج ينتج خامة تنافس الخامة الموجودة في السوق وإلا يبقى الموضوع مالوش لازمة، " كنت بشتري الخامة المستوردة واعمل تجارب علشان أشوف الفرق، واقعد مع فنانين واعرف منهم محتاج إيه علشان أحسن الخامة بتاعتي وأدرس الموضوع أكتر، لحد ما وصلت لخامة كويسة جدا وعرضتها على فنانين ودكاترة من فنون جميلة وقالوا إنها ممتازة". الخطوة الجاية ليه، كانت إنه يشتري الماكينة اللي تعبي اللون في العبوات، واتفاجئ إن تكلفتها ممكن توصل ل50 ألف جنيه، "رقم كبير ومش معايا، فبعد شغل ومذاكرة ونزول لمصانع وتدوير على النت، قدرت خلال 6 شهور أعمل الماكينة دي بنفسي، أينعم حاجة صغيرة كدة، لكن بتقوم بالغرض وبفينش معقول".

بعد ما وصل للخامة بتاعته وبدأ في الإنتاج، هوب الجنيه اتعوم، والمستورد اللي كان بحاجة وعشرين نط لحاجة تمانين، خراب بيوت، "أنا كنت بنزل الأنبوبة بتاعتي من نوع الألوان الأكريليك ب15 جنيه، ولما رفع المستورد والخامات كلها غليت، اضطريت أخليها ب20 جنيه ووقفتها على كدة، لأن الطلبة اللي اتعاملت معاهم لاقيت فعلا إنهم بيصرفوا مبالغ رهيبة على الخامة دي، فحسيت إن الموضوع بالنسبالي كدة كويس وفيه ربح ومكسب وممكن كمان أوسع نشاطي، بدل ما هو ألوان أكريليك بس، وهشتغل لحد ما اعمل سمعة كويسة". الموضوع كان في الأول One Man Show، بس لما نشاط محمد كبر بقى في عمالة بتساعده في التعبئة والتوزيع، وإن كان التصنيع لسه بيقوم بيه لوحده تمامًا.

نفس السؤال اللي سألته لأصحاب "أوركا"، كررته لصاحب "أوربيو"، الجودة، رد محمد: "في اختبارات تخليك تختبر اللون وكأنه فات عليه سنة في خلال أيام، تعرضه لعوامل زي الشمس والهوا لأيام متواصلة وشوف إيه اللي اتغير، الاختبارات دي أنا كنت بعملها مع نفسي، وفي لوحات من شغلي اترسمت وبقالها سنين ماتغيرتش، كمان رسمنا لوحات على خامات مختلفة وعرضناها لعوامل علشان نختبر جودتها". ألوان "ORBIO"  اللي بينتجها محمد في مصنعه، أسعارها معقولة مقارنة بالمنافس، " في أنواع ألوان مستوردة بتوصل ل3 و 4 أضعاف سعر اللون بتاعي، أنا بتكلم على المنتج اللي يتقارن بمنتجي زي الهندي والفرنساوي، في الصيني ده موجود في السوق لكن مافيش جودة خالص".

تابع الشركتين واطلب منتجاتهم من هنا:
https://www.facebook.com/OrkaArtSupplies

https://www.facebook.com/orbio.1

 الصورة الرئيسية: رسم مينا ساويرس
Home
خروجات النهاردة
Home
Home