صعدنا أخيرا كأس العالم، نبتدي نتكلم بقى الكلام المهم، الحدث ده يمكن ما نشوفوش تاني قبل 30 سنة كمان، ووقتها مش عارفين حتى لو سننا يسمح نسافر هيبقى سعر صرف الجنيه كام، يمكن يكونوا لغوا الجنيه أصلا وبقينا شغالين بالمقايضة، ففكرنا أكيد في ناس هتحب تروح روسيا تتفرج ع الماتشات وتشجع المنتخب، ومعاينة المنتج المحلي من الروس والروسيات، مش هيضر برضه، الأول هنبدأ بتذاكر الطيران.

بص خلينا نتفق كل ما تحجز بدري في أي حاجة هتاخد أفضل أسعار ووش القفص في كل حاجة، هتتأخر هتكع دم قلبك ده لو لقيت أصلا، البطولة هتبدأ يوم 14 يونيو وهتخلص 15 يوليو، طبعا انت هتحجز في اتجاه واحد لإننا مش عارفين مصر هتكمل لحد فين، مش يمكن ربنا ينفخ في صورتنا ونشوف المربع الدهبي، ولا ناخد كأس العالم، وسعت شويتين أنا عارف بس يعني أدينا بنحلم.

أسعار الطيران بتبدأ من 3750 جنيه مصري ولحد 22450 جنيه مصري بأسعار النهاردة، طبعا أسعار تذاكر الطيران بتتغير كل يوم، وبما إننا مش عارفين انت هتعرف تزوغ من مديرك وشغلك وكل التزاماتك امتى، فهنديلك الويب سايت ده، اسمه Sky Scanner هتقدر تعرف من عليه أفضل أسعار للرحلات من القاهرة لموسكو، وغير العملة للجنيه المصري عشان ما توجعش دماغك في الحسابات

تذاكر الماتشات دي طلعت حوار، "أدهم الهمشري" واحد من مدونين السفر حوالين العالم كتب بوست على الفيسبوك بيشرح فيه موضوع التذاكر بالتفصيل وقال على معلومة مهمة إنك مش هتحتاج فيزا لو عملت اللي هيقولك عليه في البوست

بالنسبة للإقامة هناك، لو انت مقتدر وربنا كارمك وهتقعد في الفنادق الخمس نجوم يبقى انت مش محتاجنا، على وضعك يا معلم، دلوقتي انت مش رايح روسيا ودافع المصاريف دي كلها عشان تقعد في الفندق، يعني انت محتاج مكان تنام فيه مش أكتر، حاولنا ندور على أفضل سعر في "هوستيل" يكون معروف، اتفاجئنا بإن الأسعار بتبدأ من 73 جنيه مصري! يعني أرخص من ليله في دهب، هنديلك الويب سايت ده "Booking.com"، هتلاقي عليه الأسعار وصور الأماكن وريفيو الناس، وتقدر تعمل سيرش بشكل موسع بحيث تشوف اللي يناسب احتياجاتك، بس الحق احجز، انا بعمل ريفريش لقيت "هوستيل" فيهم خلص الأوض كلها.

طبعا لما أقولك روسيا لازم أول حاجة تيجي في دماغك البرد والتلج وجيش هتلر اللي اتجمد في روسيا، فطبعا قولنا ندور على درجة الحرارة هتبقى عاملة ازاي هناك عشان نعرف هنطلع م البيت لابسين اللحاف ولا كفاية البطانيات، لقينا درجة الحرارة على موقع "hikersbay" بتقول ان يوم 14 يونيو درجة الحرارة هتبقى العظمي 21 والصغرى 10 دي درجات الحرارة سنة 2014، والمتوسط للشهر كله هو 17 درجة مئوية بالإضافة لسرعة الرياح 10 كم في الساعة والجو هيبقى بيمطر، يعني الجو شبه الجو عندنا في الشتا بالظبط، هواء ومطر ودرجة حرارة قليلة لكن مش عواصف تلجية، معلش مش هتلعب في التلج المرة دي، بس على ما نتأهل تاني بعد 60 سنة هيكون العصر الجليدي دخل وهتعرف تلعب في التلج براحتك.

معلومة على جمب الموقع ده برضه تقدر تعرف من عليه إيه الوقت المثالي عشان تسافر لأي دولة في العالم، وفيه المزرات وأسعار الأوتيلات وكل حاجة، هينفعك يعني.

بالنسبة للأكل، فطبعا انت ما بقالكش عشرين سنة بتاكل من إيد الحاجة ناتاشا، وبطنك ما بتاكلش غير روسي، هتبقى خايف تعك في الأكل فبطنك تبهدلك وتضيع السفرية بين الحمام والسرير، فغالبا هتاكل أكل تعرفه، هديك فكرة عن الأسعار هناك، سعر ال"بيج ماك" في ماكدونالدز روسيا 174.5 روبل روسي، ما تتخضش من الرقم، الجنيه المصري يساوي 3.31 روبل روسي، *بيعمل مروحة أبو تريكة"، يعني البيج ماك بما يساوي حوالي 53 جنيه مصري، ماروحناش بعيد يعني، لكن لو بطنك هفتك على مطعم روسي فالأكل هيكلفك حوالي 1000 روبل يعني ما يوازي 300 جنيه مصري.

 

Москва - первый город Макдоналдс в России! #макдоналдс #макдональдс #mcdonalds

A post shared by Макдоналдс Россия (@mcdonalds_rus) on Oct 5, 2016 at 10:38pm PDT

في ويب سايت كامل عملته الفيفا عشان تفهم برضه كل المعلومات اللي حابب تعرفها عن البطولة وأماكن الاستادات وأشكالهم وشركات السفر
تقدر تعرفهم من هنا

نصايح أخيرة، جريدة الوطن نشرت كلامها مع "محمد رأفت" اللي بيشتغل في روسيا وقال حبة نصايح مهمة عشان تعرف تسلك هناك وما تققلبش، ولا يتقبض عليك، ولا تلاقي نفسك مضروب علقة، عينفين الروس دول
منهم النصايح دول
- الروس عنصريين ومش بيحبوا الأجانب عمومًا.
- اعمل أي حاجة في روسيا إلا الاغتصاب والمخدرات والإرهاب، غير كده عيش يا معلم.
- لو بصيت على واحدة وتنحت ممكن تقولك بتبص على إيه وممكن تتخانق معاك.
- الروس عندهم استعداد للاشتباك بالأيدي والمشاجرة في أي وقت وأي مكان.
- أبوس إيدك بلاش تحرش، بلاش تحرش، وكررها ثلاثا.
- ليك مهلة أسبوع من وصولك البلاد وتعمل حاجة كده اسمها ريجستراتسا (ورقة كده مكتوب فيها مكان إقامتك ومدة إقامتك جوه البلد)، ولو مش معاك الورقة دي والشرطة وقفتك المفروض قانوني بتدفع غرامة 7000 روبيل في البنك الوطني الروسي أو بتاع الشرطة هياخد منك فلوس ويسيبك.
- ممنوع السير في الشارع وأنت شايل في إيدك إزازة خمرة وماشي بتشرب منها.
- في روسيا محلات السلاح أكتر من مطاعم ماكدونالدز وغالبية الشباب معاهم سلاح أبيض أو مسدس بيضرب بلي بيعور.
- حاول متتصاحبش على حد علشان هم أصلا مش بيحبوا الأجانب في الغالب هيبقى عايز يعمل عليك مصلحة ويستغلك.
- حاول متغيرش فلوس غير في البنك أو مكاتب الصرافة وخلي بالك الفلوس المضروبة كتيرة هنا.
- نسبة كبيرة من الروس نزلوا مصر واتقلبوا من المصريين، هو كاس وداير بس بلاش يدور عليك
- هتعدي الشارع بص على الإشارة ومتعديش غير في إشارتك علشان لو اتمسكت هتدفع غرامة.
- كل محطة أوتوبيس بيبقى متعلق فيها يافطة مكتوب فيها أرقام الأوتوبيسات اللي بتعدي عليها ومواعيدها.
- روسيا فيها كاميرات في الشوارع والمحلات ومداخل البيوت والمولات والعمارات ومفيش خرم إبره مفيهوش كاميرا.. الكل متراقب.
- باسبورك زي جلدك متروحش في حته من غيره هو والريجستراتسا والورقة الصغيرة اللي هتاخدها من ظابط الجوازات في المطار.
- باسبورك لو ضاع تتوجه لأقرب قسم شرطة وتعمل محضر وبعدين تتوجه للقنصلية وتشوف هيعملوا إيه معاك.
- موسكو فيها شبكة مترو أنفاق كبيرة جدًا وكلها تحف معمارية من ثلاثينات القرن اللي فات وبيسموها قصور الشعب نحو 14 خط مغطية العاصمة كلها حاول متتحركش جواها لوحدك وأنت لسه جديد علشان هتتوه.
- موسكو من أغلى العواصم في العالم أعمل حسابك في فلوس كتيرة.
- معظم المحلات والمولات والمطاعم والصيدليات بتقفل من 10 مساء ما عدا محلات الورد 24 ساعة شغالين وبعض الصيدليات.
- حاول تعرف كام كلمة روسي غير خراشو علشان تعرف تتعامل هنا "اسمها خراشو مش خراشوف على فكرة".
- أول ما تقوم من النوم أعرف الطقس ظروفه إيه علشان هتلاقي شمس وهوا وسحاب وبرق ورعد في يوم واحد ولازم يبقى معاك شمسية وإلا هتتبل بجد.
- عادي أوي أن حد يوقفك و يشحت منك سيجارة، هنا الكيف مناولة مش مقاولة.
- معظم الشعب معندهمش ثقافة الاستئذان من حد علشان يعدي فطبيعي لو لقيت حد زقك في طابور أو في المترو أو أي حتة علشان يعدي أوعى تقفش وتتخانق لأن ده الطبيعي بتاعهم هو مش شايف نفسه قليل الذوق وبعدين حضرتك تركب.

كده معاك كل العلم اللي ينفعك، تذكرتك في جيبك، الريجستراتسا هتاخدها هناك، اللي يقولك خراشوا قوله الله يسامحك.