كل دروايش سيوة واللي اتفتنوا بحبها أجمعوا انك مش محتاج غير رحلة واحدة عشان النداهة تندهك، وتلاقي نفسك مسحور بيها، ويمكن تقرر تسيب القاهرة للأبد وتنقل حياتك هناك، زي ما ناس كتير مصريين وأجانب هجروا حياتهم، وراحوها يبتدوا حياة جديدة .
لما روحت سيوة لأول مرة من 4 سنين مع قافلة طبية لعلاج أهل الواحة البعيدة، اتسحرت زيهم، أكتر مكان في العالم حسيت فيه بالسلام النفسي، انت مش مهدد، ولا في حد بيجري وراك، والناس كلها بتحب بعض، لو نسيت اللابتوب بتاعك في الشارع هترجع تلاقيه مكانه! فبقيت بمعدل كل شهر هناك، وانا برمي الكورة في ملعبك دلوقتي، أنا هحطك على باب الجنة، وقرارك تدخل ولا تستنى.

هروح سيوة ازاي؟

عندك كذا طريقة من القاهرة:
1 - ممكن تحجز أوتوبيس سيوة من شركة غرب ووسط الدلتا، ينفع تركبه من محطة ألماظة أو محطة عبد المنعم رياض، التذكرة ب 150 جنيه، والأوتوبيس بيطلع كل يوم سبت واتنين وخميس، وبيتحرك الساعة 12 بالليل، الرحلة من 12 ل 13 ساعة، وفي 3 ريستات في الطريق، خد معاك شال عشان التكييف ساعات بيبقى بارد جدًا

2 - تركب مكروباص مطروح من منطقة مشعل في الهرم، بياخد حوالي 4 ساعات ونص، بعدين بتركب من مطروح ميكروباص تاني لسيوة بياخد حوالي 4 ساعات ونص برضه، ده أسرع لكن الأوتوبيس بيبقى في الأغلب أريح

3 - تاخد العربية بتاعتك الخاصة، الطريق هياخد 7 ساعات، بس هتحتاج تسأل شخص سافر بعربيته قبل كده على الطريق، عشان يقولك إيه الاحتياطات اللي محتاجها، بتاخد طريق العلمين - الساحل - مطروح - طريق سيوة علي طول ... ساعتين ونص بعد مطروح أو ثلاثة. وممكن بدل طريق العلمين طريق الضبعة وبيبتدي من أكتوبر. خلي بالك مافيش محطات بنزين علي طريق مطروح/ سيوة، وآخر محطة تقدروا تاخدوا بنزين منها هي محطة البنزين اللي في مدخل مطروح.

لو من إسكندرية فهي هياها نفس ال 3 طرق، بس هتركب أوتوبيس غرب ووسط الدلتا من الموقف الجديد في محرم بك والتذكرة ب 95 جنيه، ممكن تحجزها من الموقف نفسه أو من محطة الرمل.

هقعد فين في سيوة؟
سيوة متنوعة جدا في الأماكن اللي ممكن تقعد فيها، يعني لو على المستوى المادي، هتلاقي حاجات من أول 80 جنيه لحد 10 آلاف جنيه في الليلة (مش مبالغة.. فيه فندق الليلة فيه ب 600 دولار). لكن الأهم تشوف أنت عايز تسكن في مكان عامل إزاي، في هناك فنادق بيئية، مبنية من مزيج الملح والطين، فيه كامبات، فيه فنادق عادية، فيه بيوت سيوية. كل حاجة فيهم ليها مميزاتها، وأنت وذوقك والمكان اللي بترتاح فيه، عشان كده هتحتاج تسأل نفسك:

- المكان يكون بيت سيوي ولا فندق ولا شقة فندقية ولا كامب؟
- لو فندق يبقي بيئي ولا عادي مسلح وخرسانة ؟
- لو كامب يبقي خيمة ولا غرف بيئية مجهزة؟
- بكهرباء ولا من غير؟
- تحب المكان بعيد عن السوق ولا قريب؟
- هل ممكن حمام مشترك ولا لازم خاص؟

أنا هقولك أسماء الفنادق وأنت هتحتاج بس تعمل بحث سريع على الاسم في tripadvisor، هيوريك صور من كل مكان فيهم وسعر الليلة فيه

فنادق بيئية:
بتبقى فنادق مبنية بالطريقة السيوي القديمة (بالكرشيف)، جميلة جدًا، وكلهم بيطلوا على بحيرات مياه، والمناظر الطبيعية فيهم ما تتنسيش
تازيري: على الطراز الأمازيغي المغربي بيئي مافيهوش أي كهرباء

جعفر: نظام بيئي على الطراز السيوي، بيربوا جوه الحيوانات والخضار عشان يبقى أكلهم نضيف وصحي
تاليس/تاليست: صاحبته اسمها نبيلة، هي وأسرتها اللي عاملين ديكورات المكان كله بإيديهم وهي اللي بتعمل الأكل بنفسها في المطعم والكهرباء بالطاقة الشمسية

ريلاكس: كامب وسبا مبني على الطراز البيئي ومنار بالطاقة الشمسية وبيطل على البحيرة الكبرى
فندق ادرير اميلال: من أغرب الفنادق في العالم؛ مبني بالكامل من الملح، بما فيها الحيطان والسراير ومافيش كهرباء
طغاغين: شاليهات جميلة في وسط البحيرة الكبرى فيها كهرباء وفيها عين مياة عذبة

فنادق عادية
باراديس - جاردين - الباب ان شال - كنوز- دريم لوج

أو ممكن تنزل في بيت سيوي، في ناس هناك بتأجرلك بيوت، وفي الأغلب بتبقى قريبة من السوق

ممكن تاكل إيه في سيوة؟
بص يا سيدي، سيوة هتلاقي فيها أغلب أنواع الأكل العادية اللي بتاكلها في القاهرة، لكن المحلات محدودة، بس أنت مش جي من القاهرة عشان تاكل أكل القاهرة، نجدد شوية. هتلاقي هناك مطاعم زي: بابا عبده، نور الواحة، المطعم السيوي، علي عليوة، كلهم أكلهم حلو جدًا، والأسعار نفس الأسعار اللي بتدفعها للغداء أو الفطار في القاهرة، لا أغلى ولا أقل.

في أنواع أكل سيوي لازم تجربها، على راسهم طبعًا الفراخ واللحمة اللي معمولين بطريقة "أبو مردم"، دي طريقة تسوية للأكل، اللحمة أو الفراخ بتتبل كويس لكذا ساعة، بعدين بتتحط في باستيله حديد بتدفن في حفرة فيها نار، عشان كده اسمها أبو مردم، عشان بيتردم عليها، وتتساب تستوي ساعات كتير برضه، بس النتيجة هتبقى من أجمل الحاجات اللي هتاكلها.

في كمان أكلات سيوي ممكن تسأل عليها، بس غالبًا هتتعملك مخصوص لأنها بتتعمل في البيوت زي:
كسكس بالخضار - مكرونة جارية - رز أحمر - الملوخية الناشفة السيوي - شكوكة سيوي (لحمة أو كبدة مع بصل وخضار وطماطم وبيض) - رقاق (عامل زي طبقة أو طبقتين من الفطير المشلتت)- مجردج (نوع من العيش بيتعمل بيه الفتة) - ايغيارين، بتتعمل من الرجلة والفول - مكناف والرقاق (حلويات بتتعمل في العيد) - اشنجوت (لحمة أوز وبيض بلدي بيتلفوا في عيش ورقاق وده بتاع العرسان) - مفقد، دي الفتة بس مختلفة عننا إن مافيهاش رز - تارفنت (عيش ونوع بلح وزيت زيتون) - أنجيل (نوع من العيش معمول من البلح بيتاكل مع الفول المحمص) - تاجلا (بلح ودقيق وزيت زيتون)

هتعمل إيه في سيوة؟
سيوة أكتر حاجة مميزة فيها هي الطبيعة البكر، من أقل الأماكن اللي الإنسان حط فيها التاتش بتاعه، فيها مزارات كتير تتراح، لكن الأجمل هو الاستجمام في الأماكن الطبيعية والعيون الكبريتية وأجمل منظر للنجوم ممكن تشوفه في حياتك.

أهم المزارات في سيوة:
- منطقة الحفريات في بحر الرمال الأعظم، دي فيها حفريات من من ملايين السنين أيام ما كانت المنطقة دي جزء من المحيط، هتشوف بقايا عظم حوت ضخم، وقواقع ونجوم بحر متحجرة.
- قلعة شالي (سيوة القديمة)، دي المدينة اللي كان عايش فيها أهل سيوة زمان، وكان ليها سور من بره وبوابة، لكن السيول هدتها، ونزل أهل سيوة للعيش تحت، لكن بقايا المدينة لسه باقية بطرازها البيئي الفريد.
- جبل الدكرور، واحد من أكبر جبال سيوة، تقدر تشوف من فوقيه سيوة والمناطق المحيطة بيها، وهو نفس الجبل اللي بيتعمل فيه عيد السياحة، العيد اللي بقاله أكتر من قرن ونص، وبيبقى في الليالي القمرية اللي بتصادف في شهر أكتوبر من كل سنة

- جبل الموتى، اتسمى بالاسم ده، بعد ما اكتشفوا فيه مقابر بترجع للعصر البطلمي، المقابر محفورة في الجبل أكنها خلية نحل.
- معبد آمون/ معبد الوحي، ده معبد اتعمل في العصر الفرعوني لنشر عبادة الإله آمون، وهو المعبد اللي توج فيه الإسكندر كإله.

- معبد أم عبيدة، ده معبد تاني للإله آمون، قريب من المعبد الأولاني، لكنه متدمر مش باقي منه غير بقايا صغيرة، ده نفس المعبد اللي كان في رواية ومسلسل "واحة الغروب"

- ممكن تطلع الصحراء: الصحراء بيتعمل حاجات كتير، ممكن تعمل سفاري هناك وساند بوردنج، ممكن تشوي أنت وصحابك وتاكلوا، بعدين تقضوا ليلة في الصحراء في حضن النجوم، وممكن تلاقي حفلة سيوي ترقص على المزيكا السيوي للصبح.
- سوق شالي: تقدر تشتري من هناك المشغولات اليدوية والتمور والزيتون وأنواع مربات مش موجودة غير في سيوة، زي مربى كركديه وبلح وزيتون.
- بلاد الروم: دي مجموعة مقابر صخرية بيرجع تاريخها للعصر الروماني، كان بيبقى قدام كل مقبرة عمودين أو تلاته، والمومياء بتتحط على سرير جوه قبر بيطل من الصخر، لكن اللي باقي منها حاليًا هي الفتحات في الصخر وقواعد العواميد

- البيت السيوي، بيت بيجمع التاريخ والتراث السيوي

- أقدم معصرة زيتون في سيوة في قرية زيتوني
- من أقدم طبعات القدم في العالم، عمرها ملايين السنين، على بعد 35 كيلو قرية بهي الدين
- فطناس، من أجمل الأماكن اللي ممكن تشوف الغروب فيها على الإطلاق

- البحيرات المالحة، ألوانها سماوية ونسبة الملح فيها عالية جدًا، لدرجة إنك مستحيل تقدر تغطس فيها هتلاقي المياه بترفعك

- لازم تنزل عيون سيوة الكبريتية، في منها الساقع والسخن، غير فايدتها للجسم، فهي تجربة استرخاء واستجمام لازم تجربها. منهم:
- فطناس في جزيرة فطناس

- كليوباترا جوبا
- عين أبو شروف (كبريتيه)
- منطقة بير واحد فيها عين مياه سخنة وقريب منها بحيرة ساقعة (بحر الرمال الأعظم)

إيه المواصلات اللي تقدر تستخدمها جوّه سيوة؟
اللي مش جي بعربيته الخاصة أو مش جي تبع رحلة منظمة، هيحتاج مواصلة معاه أثناء رحلة المزارات الداخلية أو الملاحات البحرية والأوسط أو غرب سيوة.
1 - ممكن تأجر عجل من مدخل شالي المدينة القديمة، إيجار العجلة في اليوم من 40 ل 50 جنيه

2 - ممكن "كاريته" ودي مناسبة لرحلة المزارات الداخلية، وبتبقي بالاتفاق مع صاحب الكاريته، وممكن 3 يركبوها سوا.

3 - توكتوك أو تروسيكل، ده الاختيار الوسطي الجميل، مش غالي، والمشوار ما بيبقاش وقته طويل، بيبقى في حدود من 30 ل 50 جنيه في الساعة أو بالاتفاق، وتقدر تتفق معاه إنه يمشي ويجيلك في وقت محدد، كل اللي اتعاملت معاهم كانوا ناس محترمين جدًا وذوق للغاية وبيحترموا مواعيدهم وشغلهم جدًا.

4 - "تمناية" ودي السوزوكي الصغيرة، بتشيل من 4 ل 5 أفراد وسعرها بالإتفاق
5 - عربية ملاكي، العربيات هناك بتبقى عربيات كبيرة، وبتشيل لحد 6 و 7 أفراد، لكن طبعًا غالية، مش أقل من 1000 جنيه في اليوم.
6 - ميكروباص يشيل لحد 14 شخص وبيبقى بالاتفاق برضه مع صاحب الميكروباص

محتاج إيه وأنت مسافر سيوة؟
1 - أهم أهم أهم حاجة، لازم يكون معاك حاجة للناموس، دي الحاجة الوحيدة اللي لو نسيتها هتعيش رحلتك متكدر وهتبقى لقمة سهلة ليهم، عندك حاجتين ممكن تجيبهم، سبراي OFF من أي صيدلية، مش هقدر أقولك سعره لإنه بيزيد كل يوم، في اختيار تاني أفضل وأرخص، ممكن تجيب "Lemongrass" من فروع نفرتاري، فيه فرع في سيتي ستارز وفرع في الدقي

2 - صورتين من البطاقة وش وظهر (واحدة لمكان الإقامة - الثانية لتصريح المخابرات لدخول الصحراء/السفاري)
3 - جاكيت تقيل، شراب تقيل، كوفيه/شال تقيل، الجو بالليل بيبقى سقعة، وهات لبس خفيف للنهار لإنه أغلب الوقت دافي.
4 - لو مسافر ومعاك مشروبات كحولية لازم تبقى مقفولة ومعاك الفاتورة بتاعتها
5 - خد معاك كروكس/جزمة بحر عشان تقدر تنزل بيه البحيرات المالحة
6 - خد معاك مايوه طبعًا عشان تنزل العيون الكبريتية
7 - كاميرا، المناظر اللي هناك هتجننك وهتبقى عايز تصورها أكيد، ولو بتحب تصوير النجوم يبقى أنت لقيت الجنة بتاعتك، هات معاك ترايبود

معلومات عامة
- الصحراء مافيهاش شبكة، لكن المدينة كلها هتلاقي فيها شبكة عادي، ممكن تشتغل هناك بس نصيحة بلاش، اتبسط بالطبيعة الفرص اللي زي دي ما بتتعوضش
- في هناك محلات تشتري منها أي حاجة بقالة تحتاجها، في سجاير، وفيه مصانع ميه، فأنت مش محتاج ميه
- اللبس اللي هناك محدود جدًا، وماعتقدش إنك هتلاقي مايوه مثلا، فياريت تتمم على حاجتك قبل ما تسافر

أخيرا بنتمنالك رحلة سعيدة لواحة الغروب.