أكتر وقت بتستمتع بيه وأنت قاعد في البيت قدام التليفزيون ماسك البطاطس في إيدك وبتاكل وجبة حلوة كده، كل حاجة ممكن تنتهي وتقف في اللحظة دي، بس اللي يكدرك بقى إنك تبقى نفسك في كبدة و"سدق" إسكندراني مثلًا، ومكسل تنزل ومش عارف توصلهم ازاي؟ أنت محظوظ لو أنت من سكان الإسكندرية، علشان أبليكشين "طياري" بقى هو الحل.

"طياري" أبليكشين جديد متخصص في تسليم الأكل من المطاعم، خصوصًا اللي ماعندهاش خدمة ديلفري، يروح هو يشتري الأكل ويقف في الطابور بدالك ويجيبلك الأكل لحد بابك، إسكندرية دلوقتي بقت مجمعة كل أنواع المطاعم والناس بتسافر مخصوص علشان تأكل وجبة حلوة من ألبان سويسرا مثلًا، وعلشان كده "طياري" حل عظيم هناك.

الألطف بقى إنك ممكن تجمع كل الأوردر سوا، يعني تخيل إنك تجيب ساندوتشات من ألبان سويسرا، مع عصير خروب، وفي أي وقت خلال 24 ساعة /7 أيام في الأسبوع. اللي عمل الأبليكيشن 4 شباب أصحاب، محمود حسين مطور أعمال وليه خبرة في التسويق، وملك البهتيمي مسؤولة السوشيال ميديا، وطارق الشافعي مسؤول البرمجة والتكنولوجيا، واللى بيدير كل ده عمرو عبدالفتاح. مصطفى الدالي اتكلم مع محمود حسين اللي ابتكر الأبليكشين ده.

سألناه ازاي جتلك فكرة "طياري" خصوصًا إن في خدمات ديلفري في كل حتة في مصر، قالنا "محمود": "أيوة في منافسين، بس احنا فكرنا نجيب للناس الأكل اللي مابيعرفوش يوصلوله، زي ألبان سويسرا والاتحاد السكندري ومطاعم السمك وحتى المطاعم الكبيرة اللي ماعندهاش توصيل، هو ده بيكون وقت طياري".

"طياري" ابتدا في يناير، وتقدر تشوف طريق الأكل وهو جاي ليك لحد ما يوصل لباب بيتك. حكالنا "محمود" إن أكبر تحدي واجهه هو إنه يلاقي طيارين في كل إسكندرية ويسلموك في الوقت المناسب، "في الأول لما كان بيجي طلبات زيادة كنا بنعمل ده بنفسنا لأننا مانقدرش نرفض طلب حد، ومع الوقت الأبليكيشن كبر والناس مابقتش مصدقة إنهم يطلبوا أكل من كل المطاعم اللي مافيهاش ديلفري".

في الأول قاعدة بيانات "طياري" كانت المطاعم المعروفة، ومع الوقت بدأت تكبر. كل ما حد يحتاج مطعم ممكن يبلغ عنه والمسؤولين بيفكروا ازاي يقدروا يزودوه. بعد ما عدى حوالي 9 شهور من البداية، الأبليكيشن تجاوز توقعات اللي عملوه، وبقى يجي كل يوم حوالي 100 طلب وهما كانوا متوقعين 40 بالكتير، طياري وعدونا إنهم قريب هيكونوا في القاهرة كمان.

طياري موجود على جوجل بلاش وأبل ستور Tayray.