مطب هو أول أبليكيشين بيحل مشكلة المطبات في مصر، وده عن طريق إنه بيحدد المطبات على الطريق اللي أنت ماشي عليه وينبهك قبل كل مطب بمسافة معينة عشان تخلي بالك وتهدي، ببساطة ده تعريف "مطب" وفقًا لصفحتهم على الفيسبوك. الفكرة جت لما أحمد الشاعر –واحد من فريق عمل الأبليكشين- كان ماشي بعربيته بليل ومش فاكر المطبات اللي في الطريق ده، فقرر إنه يشارك أصحابه ويقترح عليهم ينفذوا مشروع يحذر الناس من المطبات قبل الوصول عندها.

بدأ تنفيذ "مطب" من نوفبر 2016 عن طريق طلبة في الهندسة الإلكترونية في المنوفية، والهدف كان إنه يخلي السواقة في مصر أمان أكتر، ومتوقع إن خلال شهر أو 2 من دلوقتي، مطب هيبقى قابل للاستخدام من كل الناس، بكل بساطة هتدخل على ستور الأبليكشين وتحمل "مطب" وتعمل تسجيل على موبايلك، وتختار الطريق اللى هتمشي فيه وتبدأ تمشي عادي بعربيتك وتستخدمه زي ما بتستخدم google maps مثلًا، وقبل مسافة كافية من المطب هيقولك بالعربي وبالإنجليزي خلي بالك، ده غير إنه هيقولك المسافة والوقت والأماكن الزحمة.
طبعًا فريق العمل ممشيش في كل شوارع مصر، وعلشان كده الأبليكشين بيعتمد بشكل أساسي على الداتا اللي بيدخلها المستخدمين، ويقولوا هنا فيه مطب والأبليكشين يتحدث ويحذر باقي المستخدمين.

أكتر حاجة اهتم بيها فريق العمل وهو شغال على الأبليكشين كانت الدقة، علشان تعرف مكان المطب بالظبط ومايحصلش أي غلط إنك تلبس وبعدين تاخد بالك خصوصًا إنك هتبقى ماشي بالعربية متطمن وواثق أوي فاللبسة هتبقى وحشة وقتها. الأبليكشينز على مستوى العالم كله ممكن تتباع بالملايين، مثلًا سناب شات جاله عرض 30 بليون دولار من جوجل، بس مش ده هدف الفريق دلوقتي، اللي عايز بس إنه ينشر الأبليكيشين ويخلي الناس تستخدمه الأول.
في النسخة الجاية من مطب هيكون في مساعدة للطرق بكل حاجة فيها، حتى لو كمان عايز حد على الطريق فجأة يصلح على عربيتك هتلاقي ده على الأبليكشن.

ممكن تشارك وتقول لمطب إيه أكتر طرق فيها مطبات من هنا
وممكن تتابع معاهم لحد ظهور الأبليكيشن للنور من هنا.