حوار مع "ديلر": ليه ممكن تشتغل في المخدرات؟
كلمة "ديلر" بنتعامل معاها إنها كلمة مشبوهة، عشان هو ببساطة الراجل اللي بتقدر تشتري منه المخدرات من غير ما تبقى بتتعامل مع تجار مخدرات كبار يعني، والصورة النمطية اللي بتشوفها في فيلم "الباطنية" مش هي الحقيقة، "الديلر" غالبًا هيكون شبهك عادي، ومش ماشي مسطول علطول، خصوصًا مع انتشار ثقافة "الهاش" أو الحشيش في مصر، فدايمًا فيه عرض وطلب، واحنا مابنفكرش "الديلر" ده عايش ازاي وبيفكر في إيه، ايه اللي خلاه يشتغل في المهنة دي؟
فرح حسني جربت تتكلم مع واحد من الناس اللي بيديروا كشك عادي في القاهرة، بس من ناحية تانية، بطريقة سرية بيشتغل "ديلر"، ولحماية خصوصيته مش هنقول اسمه الحقيقي.
ازاي بدأت المجال ده؟
ديلر؟ بدأت في 2005 لما اتهمت ظلم بسبب إني كنت مع أيمن نور ضد مبارك في الانتخابات، وقتها ناس كتير منهم أنا اتحبسوا ظلم واترمينا في السجن، وماحدش كان عارف هي إيه تهمتنا أساسًا ومافيش حاجة ممسوكة علينا، عشان كده اتلفقلنا قضايا وكان من ضمن التهم اللي وجهت لينا التجارة في المخدرات، وناس تانية اتهمت بالتجارة في السلاح، وناس تانية بنشاط إرهابي، رغم إني كنت خريج سياحة وفنادق وشغال كويس ومش بعمل أي حاجة من دي.
في 2008 خرجت من السجن، كنت حاسس بظلم ولاقيت إن وضع البلد ماتغيرش، وكل ما امشي خطوتين الاقي عسكري ويوقفني ولما يعرف إني سوابق ياخدني القسم بدون أي داعي، ولأن كده كده الأخلاق مش هتوصلنا لحاجة، فخلاص بقى الجأ للمخدرات زي ما هما بيتهموني.
ازاي جيبت المخدرات أول مرة؟
الصحاب الشمال كتير، لما بيتعلق الأمر بالمخدرات كله بيساعد، عكس عمل الخير، وعشان كده وصلتلها بسهولة جدًا.
أنت بتتعامل مع "الحشيش" بس ولا مع مخدرات تانية؟
الحشيش بس، ومش جملة، أنا ببيع لأصدقائي اللي هما مدخنين بالفعل، تليفونات شخصية وبيبعلهم، لكن ماعنديش أي نية إني انزل وابيع للناس في الشارع مثلًا.
أنت مش عايز تتعامل مع أي مخدرات تانية؟
لا مش عايز طبعًا، أنا بتمنى إني ماعملش كده أصلًا، بس لازم الاقي مصدر دخل متاح ليا، والدولة ماساعدتنيش في أي حاجة بعد ما خرجت من السجن، ادوني كشك سجاير، بس لأني سوابق فمش عارف اشتغل في أي مكان، لكن الفلوس اللي بيجيبها الكشك مش كافية عشان افتح بيت، ولا إني حتى اشتري بضاعة للكشك ده، مالقتش طريقة حلال تخليني افتح بيت، ولو عوزت امشي في طريق الحرام هلاقي فلوس كتير، لكن لو عايز أخدم بلدي واعمل اللي شايفه صح بطريقة قانونية مش هلاقي أي نتيجة كويسة زي ما حصل معايا، فكفاية عليا الحشيش.
كام من دخلك بيجي من بيع الحشيش وكام من الكشك؟
لو الكشك بيدخلي جنيه، فالحشيش بيدخلي 100 في المقابل
بتشرب حشيش؟
طبعًا طباخ السم لازم يدوقه.
أنت شايف الحشيش حرام؟
أيوه، شايفه حرام عشان أي شئ بيضر بصحتك هو حرام.
لو شايفها حرام، ليه بتبيع أو بتدخن حتى؟
90% من حياتنا اليومية حرام، كلها غلط في غلط، بس مفاهيم الحلال والحرام مدرجة، فيه درجات عالية ودرجات أقل، وأنا بتمنى إن ربنا يغفرلي اللي بعمله ده، نفسي أصلي وأكون راجل كويس، أو على الأقل يبقى عندي فرصة أعمل شئ كويس لعيلتي ولبلدي، لكن مافيش فرصة. كل يوم بروح واقعد في الكشك ده واستنى ابيع سجاير أو مابيعش، وممكن اروّح من غير ولا مليم كسبان من السجاير، وحتى السجاير أصلًا حرام لكن بنبيعها عادي في النور، والحشيش بنبيعه في الدرا. فالحلال والحرام حاجة نسبية.
أنت شايف إن الحشيش مشكلة في حياة اللي بيدخنوه؟
بصراحة مش عارف هو مشكلة ولا حاجة بتريح أعصابنا، يمكن لو ماكنتش بدخن وسألتوني السؤال ده أعرف أرد بعد تفكير عميق، بس لأني بدخن فأنا مش عارف أقرر هي حاجة بتخليني استرخي ولا حاجة بتضرني بس.
أنت متجوز؟
أيوه وعندي بنت لسه صغيرة جدًا، نفسي ماصرفش عليها من الحرام وبحاول التزم بده على قد ما أقدر، من يوم ما اتولدت دفعت كل الفلوس اللي تخصها من المال الحلال بس، ونفسي ماعديش بظرف يخليني مضطر أصرف عليها مليم حرام.
عيلتك عارفة اللي بتعمله؟
لا طبعًا، ماحدش عارف خالص، وأغلب أصدقائي مايعرفوش، وعندي أصحاب في النيابة وأصحاب ظباط وماحدش يعرف حاجة، كل الناس شايفاني راجل كويس شبههم، الظروف ظلمتني بس. أنا مابعملش ده عشان عايز أكسب فلوس كتير، أنا بعمل ده عشان عايز أعيش بس، أنا ممكن اشتري كمية كبيرة وابيعها واكسب أكتر، لكن أنا بشتري كمية قليلة للتدخين وببيع منها لأصحابي وبيفضلي حتة ادخنها، وبس كده.
إيه موقفك مع الشرطة؟
الشرطة بتعمل اللي عليها وبتحاول تمنع المخدرات، بس مش هيعرفوا يعملوا حاجة مع الناس اللي زيي اللي بيبعوا كميات قليلة لأصحابهم، عشان أنا مش معايا كمية يمسكوها عليا ومش هيعرفوا يوصلوا لكل واحد زيي، وطبعًا أنا نفسي بلدنا تبقى مافيهاش مخدرات، بس 90% من الناس في مصر بيشربوا مخدرات، وكل واحد عنده مزاجه مش لازم يكون حشيش.
عندك حد في الشرطة بيحميك وبيداري عليك؟
لا خالص، هما بس بيروحوا دايمًا لدولاب المخدرات أو عائلات بتبيع مخدرات بالجملة، وأحيانًا بدل ما يقبضوا عليهم بياخدوا منهم رشوة شهرية، وكل شوية يروحوا يظبطوا كمية بالاتفاق معاهم ويرجعوا ويسيبوهم.
شكل العملا بتوعك عامل ازاي؟
من كل الطبقات، بس أغلبهم بنات ومنهم متجوزين، وساعات بتكلم معاهم عشان أعرف ازاي بدأوا يدخنوا الهاش، أغلبهم من الطبقة الأعلى في مصر، قليل لما أقابل بنت من عيلة فقيرة وبتشتري مني، عشان الستات في الطبقات الأفقر الرجالة بتتحكم فيهم، وبيعيشوا بشكل تقليدي، مش هيعرفوا يخرجوا ويدخنوا عادي كده ويطلبوا مني.
ممكن في يوم تبطل الشغلانة دي؟
نفسي ارجع السياحة وابدأ من جديد، لكن أنا سوابق وده مش سهل يخليني ارجع اشتغل، بس بحاول أشيل التهمة دي من سجلي عشان أعرف اعيش حياتي.
