قال رئيس البرلمان اللبناني نبيه بري إن البرلمان بيدرس تقنين زراعة القنب "الحشيش" لأغراض طبية عشان يعززوا الاقتصاد اللبناني بحسب وكالة "رويترز".  

"بري" قال في تصريحات خلال اجتماع مع السفيرة الأمريكية في بيروت إن المجلس النيابي اللبناني بيحضروا التشريعات اللازمة عشان يقننوا الحشيش زي ما هو مقنن في عدد من الدول الأوروبية  وبعض الولايات الأمريكية، خصوصًا إن فيه عدد من أصحاب الحقول بيزرعوا الحشيش بكميات كبيرة رغم منعه.

وبحسب تقرير مكتب الأمم المتحدة لسنة 2018 لبنان هي تالت مصدر رئيسي للحشيش اللي تم مصادرته من السلطات بعد المغرب وأفغانستان. 

وبحسب تقرير عملته SKY NEWS في 2014 إن مزارعين الحشيش في لبنان لا يخشوا الدولة وبيعتبروا إن ده حق شرعي وتجارة للأموال، وإن نصري شمص واحد من المزارعين دول مستعد لمواجهة القوات الأمنية وإنه عنده 135 فدان بيزرعهم شعير وقمح وبصل وبطاطس لكن الحشيش بيكسبه أرباح أكتر لأن تكلفة زراعة 1000 متر مربع 100 دولار، وقيمة محصول الفدان اللي حوالي 4200 متر مربع بتوصل إلى 3 آلاف دولار بعد بيعه.

ومن السبعينيات لحد دلوقتي بلغ إنتاج القنب في لبنان ما يقارب الألف طن سنويًا.