اليومين اللي فاتوا ظهر فيديو للشيخ "طارق عبد الرحمن فهمي" المبتهل بالإذاعة والتليفزيون ومقيم الشعائر بوزارة الأوقاف، وهو بيبتهل في مسجد القاسم التابع لقرية غمريط بمركز أبو حماد بالشرقية، وبيقول فيها لفظين عن الخمر والحشيش. وده اعتبره الناس فعل لا يليق ببيت ربنا.

رد الشيخ "طارق" على الجدل اللي أثير، اعتذر وقال خلال مداخلة هاتفية في  برنامج "هذا الصباح" على قناة "إكسترا نيوز"، إن الفيديو المتداول مجتزأ وتم اقتطاعه عن سياقه، وظهر كأنه بيمدح شاربي "الخمر والحشيش"، لكن في الحقيقة هو ابتهال بيحمل معاني صوفية عميقة. وفي اعتذاره قال إنه بمجرد الانتهاء من قول الابتهال أدرك إن اللي عمله مش صح، ولفت واحد من الحضور انتباهه وقتها وطلب منه عدم انشاده مرَّة تانية. وأضاف: "وأنا مش أول حد يقولها قالها قبل مني منشدين كتير".

من ناحية تانية أكد الشيخ "جابر طايع"، رئيس القطاع الدينى بوزارة الأوقاف، إن الوزارة ترفض وبقوة الممارسات دي، عشان كده الوزارة أحالت المدعو "طارق" للشئون القانونية في الوزارة لفتح تحقيق موسع معه حيال الواقعة. وطالب رئيس القطاع الدينى بضرورة احترام قدسية المساجد وعدم المساس بحرمة بيوت الله لا من قريب ولا من بعيد. وقال إن الوزارة لن تتهاون مع أى وقائع تنال من حرمة بيوت الله فى الأرض.