من سنين مش طويلة ظهر "أشرف عبد الباقي" في دور من أحلى أدواره في نظري، في فيلم "خالي من الكوليسترول". كان بيلعب دور "أيوب" اللي شغال في شركة إعلانات، في وقت ماكانتش فيه ثقافة الإعلانات والماركتينج منتشرة أوي. وفي مشهد هو الأهم والمرتبط بموضوعنا، أخد والدته، صاحبة عقلية الطفل، الاستديو معاه لتصوير إعلان لبن، وده الحوار اللي دار هناك:

 - ده مش لبن يا ماما، ده بوية

= أيوب غشاش وبيكدب!

- يا ماما أنا مابكدبش، بصي حضرتك اللبن اهه شكله بيبقى خفيف يا ماما قدام النور. فـ عشان كده بنعمل بوية أكنها لبن يعني!

وقت ما شفت الفيلم وقفت قدام المشهد وماعرفتش هو مبالغ فيه ولا حقيقي، ولو حقيقي يبقى كده إعلانات الأكل بتغشنا ولا "ده عشان الإضاءة" والموضوع يعدي؟ بعد سنين كنت قاعدة في محاضرة عن تحليل الخطاب الإعلامي، كان موضوعها هو إعلانات الأكل وازاي بتضحك علينا. بعد سنين تانية سمعت للمرَّة الأولى عن الفوود ستايلنج، كنت بسأل نفسي هو الضحك علينا في الإعلانات بيكون لأي مدى؟ اللي شغالين في  المجال شايفين ده خداع ولا المهنة تحكم؟ وأصلًا دورهم مفهوم في مصر ولا زي معظم الوظائف ماحدش عارف هما بيعملوا إيه؟ اتكلمت مع ٣ اتخصصوا في المجال ده، سواء بدافع الشغف أو الصدفة، عشان يجاوبوا على أسئلتي اللي بدأت بمشهد في فيلم.

الأكل في الإعلانات حقيقي ولا مضروب؟

لمَّا فكرت "عمر هشام" الفوود ستايلست بمشهد الفيلم، قاللي: "ده احنا بالظبط!"بدأ من الأول وقال إنه كان في الأول مصور وبحكم دراسته ليه في مجال الـ Art Direction، "مابحبش أصور أفراح، فـ الخيار التاني قدامي إني أصور منتجات، من هنا جه تصوير الأكل". ولمَّا سألت "نهى بحر" اللي بدأت شغلها كفوود ستايلست عن طريق الصدفة، أو بمعنى أصح كانت تدبيسة: إحنا بيتضحك علينا؟ قالت: "أيوة دي حقيقة، الأكل طبعًا مش زي ما بيبان في الصور". أما "هبة عبد العليم" مديرة الحسابات السابقة والفوود ستايلست الحالية، قالت في إجابة نفس السؤال: "في حاجات لازم نستخدم لها بدايل وده مابيبقاش خداع. لكن الفوود ستايلست اللي بيعتمد بس على الـ Fake Food ده بيبقى غير متمكن".

ممكن تشوف أكتر عن الخدع اللي بتتعمل في الأكل من الفيديو ده.

 العين بتاكل قبل الفم

من المساكرا والكحل للروج وورنيش الجزم والقطن والمقصات، الحاجات دي وغيرها بتعتبر "عدّة" الستايلست

وبيستخدموها التلاتة، اللي اتفقوا على المقولة اللي فوق دي. وزوِّد "عمر" إن ريحة الأكل كمان ليها دور كبير لكن في الصور مش هتبقى واصلة، عشان كده بيبقى الاهتمام الأكبر بشكل الأكل، بتكمِّل "نهى بحر" في نفس السياق وتقول: "أصلًا حتى لو الأكل شكله حلو، بيجي قدام الكاميرا ويبقى مش فوتوجينيك ماعرفش ليه وتبدأ تبان ديفوهات غريبة!" فـ الموضوع بالنسبة لها مشكلة تصوير مش "جودة أكل". مثلًا تلاقي العيش أكبر من البرجر ومغطي عليه، الجرجير مش باين كفاية، "هنا دور الفوود ستايلست، كنت مثلًا أقص العيش والطماطم" ده غير حشي السندوتش بـ "خلل ومسامير" عشان يبان منفوش أكتر، "البرجر نفسه بنحشيه عيش عشان يبان أضخم وجميل". بس طبَّاخ السم مابيدقهوش، بتكمِّل "نهى"، "بس في الآخر مابيتاكلش طبعًا مننا من كتر ما اتلعب فيه".

بمناسبة سندوتشات البرجر، "هبة" بتقول إنه من أصعب الأطباق اللي ممكن تشتغل عليها، وده راجع لتعدد طبقاته ومكوناته، "مكوناته كتير بس ترتيب الطبقات بشكل يبرز كل طبقة ويوضح مكونها، بتكون دايمًا عملية مش سهلة". الموضوع بياخد من ربع ساعة لساعة، حسب مكوناته وطريقة ترتيبها وتداخلها في بعضها".

في خلال كلامي معاهم اتأكدت من حاجات معينة، منها إن الآيس كريم طلع بطاطس متلونة بألوان مياه، والكريم شانتيه اللي على الكب كيك عبارة عن معجون حلاقة، والتفاحة اللي بتلمع مرشوشة مزيل عرق، والفرولة الحمراء اللي بتلمع فيها نقط بيضاء بس متغطية بروج، والعيش المحمص هو في الحقيقة مرسوم عليه خطوط بني متوازية بس، والفطيرة السخنة اللي على وشها قطعة زبدة سايحة، هي من الأصل مجمدة عشان كده قطعة الزبدة مابتسيحش بسهولة!

على الجانب المشرق، "نهى" طمنتنا إن لسّه فاضلنا وقت لحد ما نوصل لمرحلة الخداع في فيديوهات الأكل، "الفراخ بتبقى ماكيت متلون، كوباية الشاي بتبقى شفافة ومتلونة بلون، زي شغل المسرح يعني، وده في الغالب بيكون عشان التكاليف"