كل حاجة حالية بتتقارن بكل قديم، وطبعًا المقارنة دايمًا بتبقى في صالح الماضي لأسباب يطول شرحها. تعرف إيه أنت عن السمنة البلدي؟ طيب العشرة واللمة بتاعت مصيف 1987 دي كان فيه زيها؟ إلخ. الحاجة الوحيدة اللي فلتت من المقارنات دي هي جيل الفنانين زمان، اللي يُشاع عنهم إنهم كانوا مقطعين بعض بطرق توصل لمحاولات الاغتيال. على عكس دلوقتي اللي بتلاقي نجوم كتير فيه صحاب شخصيًا بس بيتنافسوا في السوق.

المهم، الخلافات والخصومة الفنّية اللي كانت بتخرج كتير وتطول العلاقات الشخصية، مامنعتش الفنانين إنهم يتجمعوا سوا في قعدة حلوة يدندنوا ويخرَّجوا لنا كوبليهات وأغاني بخفة وروقان أكتر من التسجيلات الرسمية، على عكس دلوقتي نادرًا ما بنلاقي تسجيلات جامعة أكتر من فنان سوا. في الليست دي جمَّعنا 9 تسجيلات نادرة الفنانين اتجمعوا فيها.

1) أم كلثوم وعبد الحليم حافظ - حب ايه وبعد ايه

على مستوى الجماهيرية في مصر والوطن العربي يمكن هما أشهر اتنين، وعلى مستوى النم والحكاوي اللي ماحدش عارف إيه منها صح وإيه غلط، هما برضه أصحاب النصيب الأكبر، خاصةً "أم كلثوم" اللي اتذكر كتير عن طرقها وخططها لقتل شعبية "حليم" وهي لسه في البداية.

2) فريد الأطرش وعبد الحليم حافظ - على حسب وداد قلبي / يا أبو ضحكة جنان

عندي شعور خاص إن الفنانين بيغيروا على أغانيهم لو سمعوها من مغني تاني، مهما كان شاطر هيبقى الوضع غير مريح ليهم. الموضوع ماكنش كده مع "حليم" و"فريد" اللي بدِّلوا أغانيهم في قاعدة حلوة.

3) بليغ حمدي ولطيفة - أنساك

"لطيفة" قالت في حوار ليها إن أول مرَّة شافت الملحن "بليغ حمدي" كانت في أول زيارة ليها في مصر مع عائلتها، وأول ما وقعت عينها عليها قالت له "يالهوي" وكان هيغمى عليها على حد وصفها من الرهبة. في جلسة خاصة ورايقة، "بليغ" غنى على العود أغنيته "أنساك" اللي غنتها "أم كلثوم"، شاركتها غناها المرَّة دي "لطيفة".

4) نجيب سرور - ك**يات

لو الاسم ماخضكش، غالبًا هيخضك إن القعدة اللي اتقالت فيها القصيدة دي كان حاضرها نجوم وفنانين كتير اتقال إن من ضمنهم "عبد الحليم حافظ"، وأخر ذكر للموضوع ده كان في رواية "سرور" للكاتب طلال فيصل والعهدة على الراوي.

5) سيد درويش ونجيب الريحاني - يهوِّن الله، يعوَّض الله

في حديث ليه، قال "نجيب" في وصف "سيد": روح طاهرة وشفافة ونقية، روح غير مستقرة بتستعجل أيامها في الحياة، روح كانت بيتهيألها إنها حمل ثقيل في هذه الحياة وعاوزة تخلص من الأيام.

6) محمد منير وأحمد منيب - مجموعة تسجيلات

اللي بيحبوا "محمد منير" مش شرط يكونوا عارفين "منيب"، لكن اللي بيحبوا "منيب" عارفين "منير" كويس وفي الغالب شايفينه واخد مكان مايستحقهوش، والأحق بيه "منيب". اللي لينا في القصة دي إن الاتنين اتجمعوا كذه مرَّة على المزيكا وللمزيكا بعيدًا عن آراء الجماهير.

ومع "داليدا"

7) حليم وليلى مراد - ليه خلتني أحبك؟

"حليم" و"ليلى" قعدوا يفكَّروا سوا في تاني سؤال مالهوش إجابة بعد السؤال الأهم "كل ده كان ليه؟"، ولمَّا ماوصلوش لحاجة قالوا يغنوا شوية وياللا زي بعضه.

اجتمعوا تاني مع "منير مراد" وغنّوا سنتين وأنا أحايل فيك

8) ليلي مراد وأنور وجدي وتحية كاريوكا ومحمد عبد الوهاب - مجموعة طقاطيق

فن الطقاطيق كان منتشر زمان في مصر، ومن أشهر ملحنينه "سيد درويش" والشيخ "زكريا أحمد" و"محمد عبد الوهاب"، وهو عبارة عن مقاطع عامية بتتقسم لكوبليهات. ممكن تعرف عنها أكتر من هنا:

9) الشيخ زكريا أحمد وليلى مراد - غني لي شوية شوية