عدد من أعضاء مجلس النواب بيطالبوا بإنشاء هيئة رقابية على التبرعات اللي بيتم جمعها للمستشفيات للمساعدة في علاج المرضى، ويتم تشكيلها من رئيس الوزراء وعضوية وزير الصحة ووزارة التضامن والرقابة الإدارية والبنك المركزي، بهدف الرقابة على التبرعات وكيفية جمعها وصرفها.

النائبة إيناس عبد الحليم عضوة لجنة الصحة بمجلس النواب بررت مطالبها بإنشاء الهيئة، بإن فيه كتير من الجهات اللي بتطالب بالتبرع، بترفع شعار الدعاية أهم من العلاج، وبتتم التبرعات فعلًا، لكن فين الرقابة؟ وقالت إن فيه شكاوى كتير بسبب عدم حصول بعض المرضى على العلاج بحجة الإمكانيات، وشكاوى تانية رفضت المستشفيات علاجها بسبب عدم وجود الأجهزة، يبقى بتروح فين التبرعات؟ ومين مسؤول عن مراقبة جمعها؟ 

وعلى جانب آخر، طالب النائب يوسف الشاذلي بنفس الشيء، ووضح إن الإعلانات هي الوسيلة الأسرع في الحصول على التبرعات للمستشفى، لكن مستشفيات حكومية كتير بتعاني من قلة التبرعات بسبب إنها مابتعملش إعلانات زي ما بتعمل المستشفيات الخاصة والخيرية، وده بيرجع لعدم وجود ميزانية تكفي لتخصيصها للإعلانات، وبيزيد عليه سبب تاني وهو ارتفاع أسعار الإعلانات التليفزيونية خصوصًا في شهر رمضان. 

وطالب النائب الحكومة بعمل خطة لدعم المستشفيات وتوفير ميزانية لتطويرها، وقال إن مشكلة قطاع الصحة بتزيد لإنها بتعتمد بشكل رئيسي على التبرعات، خصوصًا في الأمراض عالية التكلفة زي الأمراض السرطانية واستمرارها بيتطلب استمرارية التبرعات وده أمر مش مضمون.